Səɓəlari 1
1
Bwani Tə Mjir Israila Ɗari Akwa Masar
1Nayeri ni an thləma maɗashilər Israila na mwari kəga baba' ɗa Yakub ahar Masar, waskəi ka kutakəyirni.
2Ruben, ka Simeyon, ka Lawi, ka Yahuda,
3ka Issakar, ka Zebulun, ka Benjamin
4ka Dan, ka Naftali, ka Gad, ka Asher.
5Ar Yusuf mdə ku kurtə mwantə ni ahar Masar.
Hangkur maɗashilər Yakub kəga kəkayeri arni na maɗashili shang an mji murfəkumari.
6Yusuf, ka shanga maɗama'ni, ka shanga mji na akwa zaman na ndaga ku mtəgəi. 7Amma nyarmbwar maɗa' Israila ku yatədzi hang, ka hara dlama dlama. Da ku jaka har tə mjir ɗa ku ndzi ka duna, antə da ku nghyantə tsəɗi ni.
8Tsuwa akwa saka ngəni kuthli laga bilən ku wutədzi ahar Masar na aɗi səndə Yusuf wa. 9Antə kuthli ni pəla aka mjirni abbər, “Wul giri mjir Israila ni ku hara hang kamta, har da ku təramta duna mburu. 10Asər giri, ka mburu səndə su tə mburu ata hara ala ɗa ta da aləkəma ka yatədzi hang. Kamnyar ma mpa ku sə thlata, da ata sə mzhi paktə kər kəga dawayeri ar mburu, ka da dlərəmta mburu, ka hwi kazhar tsəɗi ni.” 11Antə mjir Masar pugəi helmayeri ata kəra ɗa na ata dwalitə ɗa akwa hara kəthlər mafakur. Antə da vu mjir Israila ni ka da nthləi kauyayeri ar pwi su aka kuthli. Antə da ku nthləi Pithlom ka Rameses. 12Amma apatə mjir Masar akwa ləkəma ka jakəngkər bwani aka mjir Israila, mjir Israila tsuwa akwa vərvər hara hang, ka titiləmtadzi akwa kəlara bwa, har tə mjir Masar ni baɗitə thlivər mjir Israila ka duna. 13Antə mjir Masar ku ləkəma ka hara bwani aka mjir Israila kula kətadza. 14Da hara tə mjir Israila ndzi akwa ɗəffə ɓzəɓza tədəku kamnyar mwavərkur kəthlər ar hər həi, ka caɗu, ka shanga jili kəthlərayeri na akwa fakayeri. Tsuwa mjir Masar ni aɗi akwa kətadzə ɗa wala raka wa.
15Antə kuthlir Masar gari aka Shifra ka Puwa, mwankir kathla ar mjir Ibrani. Tsa pəla, 16“Ma sakatə giri ata dlar mwankir Ibrani akwa kathla ala ɗa ɓzər, ka giri vədzə hangkala giri sakatə da ata kulahər ya ni. Ma giri wuta abbər ɓzər sal antə tsa ya, ka giri tsi ni, amma ma ɓzərngkwa, ka giri zhar ni ka mpika.” 17Amma mwankir kathlə ni ana thlivər Hyel antə da aɗi hir hara su tə kuthlir Masar tsawa ala ɗa ni wa, antə da ku zhar maɗashili ka mpika. 18Antə kuthlir Masar kəga mwankir kathlə ni ka pəla ala ɗa, “Kamnyar mi tə giri hara su ngəni ri? Kamnyar mi tə giri akwa zhar maɗashili ka mpikə ri?”
19Antə mwankir kathlə ni shinau alari ka pəla, “Mwankir Ibrani ni aɗi apa mwankir Masar wa, kamnyar arɗa da ɓəɓal. Antə da ana ya akəmata mwankir kathla amzhətə ɗa.” 20Antə Hyel ku hara ɓɗakkur aka mwankir kathlə ni. Antə mjir Israila ku ləkəma ka jaka har tə mjir ɗa ku hara hang ka ndzi ka duna. 21Kamnyar tə mwankir kathlə ni ana thlivər Hyel antə Hyel ku na ɗa mjir kutakəyir kəra ɗa. 22Aghəla nda antə kuthli ni ku hamta tsawa aka shanga mjirni abbər, “Kəlara ɓzər sal natə mwalar mjir Ibrani ku yaɓəla, ka giri ndzəhəuwa ni akwa Thlyagha Nayil, amma kəlara ɓzərngkwa ka giri zhar ni ka mpika.”
Currently Selected:
Səɓəlari 1: KNB
Highlight
Copy
Compare
Share
Want to have your highlights saved across all your devices? Sign up or sign in
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.
