Kəth Apos 25

Bulus Ku Mwantə Shariya Ni Akəma Kaisar

1Aghəla vir makər ka səyir Festus akwa Kaisariya kamnyar ka tsa tamtə kəthlər gwamnakur ni, antə Festus təra mwari ahar Urushalima. 2Anda antə pristayeri na ol'ola ka mji na ol'olər mjir Yahuda si ka thlandər alari ata kəra Bulus. Antə da kiɗə kəra Festus 3abbər ka tsa hara ala ɗa mdəkur ka tsa jaktə ngka ka ala ɗa ka Bulus ahar Urushalima, kamnyar da ku ɗəmha abbər da ata thla ni ata laku ka da tsi ni. 4Amma Festus shinau ka pəla, “Bulus tsu akwa pərsəna ahar Kaisariya, tsuwa aɗi ata fəi wa, I ata jaktə ngka anda. 5Antə ka mji ol'ola na akwa nca giri nu yeru ka yeru mwari ahar Kaisariya, ka da burkatə ni anda, ma tsa an ku hara su laga na ɗimi.”

6Aghəla tə Festus jaktə hara vir ncisu wala kuma adzə ɗa, antə tsa ngka ahar Kaisariya. Səɓəla ɗəpari antə tsa ndzəndzi akwa mbwar shariya, ka tsawa abbər ka mdə sənta alari Bulus. 7Sakatə Bulus si, antə mjir Yahudi na thlata ahar Urushalima ni kalaktə ni athləthlata, akwa burkatə ni ata kəra suayeri na ɗimi ɗimi natə da amzhi ndzi hamta seɗa ata kər wa. 8Amma Bulus ku kəcimta kərni ka pəla, “I aɗi ɓzamtə su wala raka akwa Tsawur mjir Yahudi wa, wala ɓzamtə su laga adzə mbwar vəngkər səli wa, wala ɓzamtə su aka Kaisar wa”

9Amma kamnyar tə Festus akwa bara namtə ɗəffa mjir Yahudi, antə tsa yu Bulus abbər, “Nənga ga akwa bara mwari ahar Urushalima ka mdə ra hara shariya ala gə shariya akəmi ri?”

10Amma Bulus pəla, “I athləthlata akəma vəi hara shariya ar Kaisar, vəi tə kalkal ka mdə hara shariya ali ata. I aɗi hara su na ɗimi aka mjir Yahudi wa, apatə ga ma ga asəndə karkar. 11Ma I an ku ɓzamtə su, ka hara su tə kalkal ka mdə tsi ra, I aɗi akwa hwi mtə wa. Amma ma jirkur aɗi akwa su tə da akwa pəlari ata kəri nə wa, mda aɗi na ata mzhi hamta ra ala ɗa wa. I akwa kiɗə ka mdə mwantə shariya ni akəma Kaisar.”

12Antə sakatə Festus ku kəɓa ata kər kəga mjir sauriyir ni, antə tsa pəla, “Ga ku bara ka gə mwari akəma Kaisar, antə ga ata mwari akəma Kaisar.”

Bulus Akəma Agrippa Ka Barnis

13Aghəla virayeri laga antə Kuthli Agrippa ka Barnis ku si ahar Kaisariya kamnyar ka da lalitə Festus akwa səyirni. 14Təng tə da ata hara vir hang anda antə Festus ngkərɓəla wujir Bulus ni aka kuthli ni, abbər, “Mdə laga aɗi azi tə Feliks zhar ali akwa pərsəna. 15Sakatə I ahar Urushalima ni, antə pristayeri na ol'ola ka mji na ol'olər mjir Yahudi ngkər ali damitədzər ɗa ata kərari, akwa yu ra kəi thlamta alari shariya. 16Amma I pəla ala ɗa abbər aɗi sur hara mjir Rom ka da thlangkər su aka mda kula mdə hara alari shariya wa. Dwali ka tsa kəɓa ka mdə na burkatə ni ni nca ka nca, tsuwa dwali ka mdə na alari saka kamnyar ka tsa wutə lakur kəcimta kərni ata kəra nggəl tə mdə kathləmari akwa ni. 17Antə sakatə da si azi ata kəma duku I aɗi shamta saka wa. Səɓəla ɗəpari təkəma antə I lətə kujarar shariya, ka vu tə mdə kəgambwa ni ali. 18Sakatə mji na burkatə ni ni thlata, da aɗi pəla su laga na ɗimi ata kərari apatə I dzama abbər da ata sə pəlari wa. 19Amma da ku beɗi ka tsa ata kəra suayeri laga na ku tsəkwar addinər ɗa, ka ata kəra mdə laga ka thləmari Yesu na ku mti, amma Bulus akwa pəla abbər tsa ka mpikə ni. 20Sakatə I wuta abbər I aɗiya mzhi yuɓəla jirkurər suayeri ngəni wa, antə I yu Bulus abbər wala tsa ata hir mwari ahar Urushalima ka mdə hara alari shariya ata kəra suayeri ngəni ni anda ya. 21Amma Bulus ndzangkir abbər ka mdə mwantə shariya ni akəma Kaisar kuthli na ola, ka tsa an thlamta shariya ni, antə I tsawa abbər ka mdə kəsi ni har ka vədza aka sakatə I amzhi thlentə ni aka Kaisar.”

22Antə Kuthli Agrippa pəla aka Festus, “I ma I ata hir kəi nggatə mdə ngəni ka kəri.”

Antə Festus pəla, “Ga ata nggatə ni ɗəpa.”

23Səɓəla ɗəpari antə Agrippa ka Barnis si ka ləmbwa ka jili kuthlikur tə kuthlyayeri ana ndzi kəgari hwatu. Da si ata kəma duku kəga sojayeri na ol'ola kəga mji na ol'olər kuta di, ka ləkwa mbwar tsaptədzi ni. Antə Festus tsawa abbər ka mdə səmbwa ka Bulus. 24Antə Festus pəla, “Kuthli Agrippa ka shanga mji na ata kəma duku kəga yeru, nggədza mdə tə shanga mjir Yahudi burkatə akəmi akwa Urushalima, ka tsuwa azi, har da akwa hara kuraku abbər aɗi kalkal ka mdə zhar ni ka mpikə wa. 25Amma I wuta abbər tsa aɗi hara su laga na ku mzhi ka mdə tsi ni wa. Antə apatə tsa ka kərari ku kiɗa abbər ka mdə mwantə shariya ni akəma Kaisar, antə I thlamta abbər I ata thlentə ni alari. 26Amma I aɗi səndə su na denggərang tə kəi rəbuta aka Barkarni ata kərari wa. Apani antə I ku səntə ni akəma giri azi, na olari akəma gə na Kuthli Agrippa, natə nuhum aghəla tə mburu ku yu ni, I asə wutə su tə kəi rəbuta. 27Kamnyar ata ndzi kalkal ali kəi thlentə mdər pərsəna kula ngkərɓəla su tə tsa ɓzamtə wa.”

Currently Selected:

Kəth Apos 25: KNB

Highlight

Copy

Compare