Kəth Apos 26

Bulus Ku Kəcimta Kərni Akəma Agrippa

1Antə Agrippa pəla aka Bulus abbər, “Mdə ku na gə saka ka gə pəla su tə gə kəgari. Antə Bulus haptə tsiyari ka baɗitə kəcimta kərni akwa pəla,

2“Jiri I ku hara sa'a, Kuthli Agrippa, təng tə akəma ga antə I ata kəcimta kərna ashina ata kəra shanga suayeri tə mjir Yahudi burkatə ra kamnyari ni. 3Na olari an kamnyar ga asəndə shanga sur hara mjir Yahudi kəga suayeri tə da ku kampiku ata kər. Antə I akwa kiɗə nga abbər ka gə kətə kanaɗi ka gə psi thləma ga ali.

4“Shanga mjir Yahudi asəndə laku tə I ana ndzəndzi akwa təng sakatə I ɓzərdakwi, watau su na baɗitə təng akwa diyir yeru, ka Urushalima, har ka vədza aka pci na ashina. 5Da səndə suayeri ngəni təng ɗəm, har ma da an ata hirari da ata mzhi seɗa ata kər abbər I akwa nca mjir Farisi, natə akwa shanga mbila mji na akwa addinər mburu da andər ɓəla tsawayeri ta shang. #Kəth Apos 23:6; Fəl 3:5 6Antə kulini I athləthlata azi akwa shariya akwa vəkər ka alkawal tə Hyel kəta aka kəkayeri ar mburu. 7Alkawal natə durayeri ar mburu na kumnya suɗə ni akwa hamta jiri abbər da ata wutə nghyaɓəladzərni, təng tə da akwa kəɗar vəngkər səli aka Hyel pci ka viri ni. Bundi, kamnyar vəkər ngəni antə mjir Yahudi akwa burkatə ra akəma gə ni! 8Kamnyar mi tə akwa ndzi mwavər ala giri ka giri kələngkər abbər Hyel ata mzhi thlentə mda akwa mtəmta nə ri?

9“I ka kəri ku hamta jiri abbər ku ndzi dwali kəi hara suayeri hang kamnyar ɓzamtə thləma Yesu ar Nazareth. #Kəth Apos 8:3; 22:4-5 10Antə I hara akwa Urushalima. Aɗi abbər təng I hambwa mji na ɓɗakkarkara akwa pərsəna daci sakatə dlu dunar harari akəla pristayeri na ol'ola wa. Har ma akwa sakayeri tə mda akwa tsəgəi ɗa, I ana mbwa kir ala ɗa abbər ka mdə tsi ɗa. 11I ku kəɗar hara bwani ala ɗa ka hang akwa mbwayeri ar vəngkər səli, ka bara kəi vu ɗa ka da pəla su na ɗimi ata kəra Hyel. Tsuwa kamnyar ɗəffi na mbwa ata kəra ɗa, I ana hara bwani ala ɗa, kəi nu ɗa har ba akwa diyayeri na akwa tsəɗi damwa.”

Bulus Ku Ngkərɓəla Laku Tə Tsa Tubi Akwa

(Kəth Apos 9:1-19; 22:6-16)

12“Tsu kamnyar su ngəni antə vir laga I tamtə lakur mwari ahar Damaska ka kakaɗər izni tə I dlu akəla pristayeri na ol'ola. 13Sakatə pci ku hara təpkər, ka barkar nga, antə I wutə parakəu laga na thlata amtazi, parakta parakər pci, akwa mbəl ka kalaktə ra kəga mji tə yeru akwa lənggu ni ata kəma duku ni. 14Antə shanga yeru ku ndla ata di. Antə I nggatə kuraku laga akwa pəla ali akwa mnyar mjir Aramiya abbər, ‘Shawulu, Shawulu! Kamnyar mi tə ga akwa hara bwani ali ri? Ga akwa ghərantə kər ngə diya ata hara dawakur ka I ni.’

15Antə I pəla, ‘Gə wa ri, Mthlaku?’

Antə Mthlaku pəla, ‘I an Yesu, mdə tə ga akwa hara bwani alari ni. 16Amma thlatə kara thləthlata. I ncantə kərna ala gə ni, kamnyar I akwa bara ka gə hara ali kəthlər, tsuwa ka gə hara seɗar suayeri tə ga ku wuta ata kəri, ka tsuwa suayeri tə I ata ncanta ala ga akəmazi. 17I ata msərantə nga akwa tsiya mjir nga, ka tsuwa akwa tsiya durayeri damwa tə I ata sə thlentə nga ala ɗa. 18Ga ata sə kəlar nca ɗa, kamnyar ka da zhar surharar ɗa na akwa kuthlu ka da səkwa parakəu, ka da msər ta dunar Shatan ka ndzi akwa dunar Hyel. Kamnyar atar apani antə mda ata mzhi tifəmta ala ɗa bikər ɗa, ka wutə vəi ndzəndzi akwa nca mji na ɓɗakkarkara kamnyar hamta jirər ɗa akwa Iya.’ ”

Bulus Ku Ngkərɓəla Su Ata Kəra Kəthlərərni

19“Antə apani, kuthli Agrippa, I aɗi ndzi kula kələngkər aka su na kəlardzi ali amtazi nə wa. 20Ntangkəma I baɗitə ngkər ni ahar Damaska, kambəla I mwari akwa Urushalima, kambəla I mwari akwa shanga tsəɗi Yahudiya, ka mwanta aka durayeri damwa tsuwa. I akwa ngkər ala ɗa abbər ka da tubi ka da ngka adzə Hyel, tsuwa ka da hara su na ata ncanta abbər da ku tubi jiri. #Kəth Apos 9:20,28-29 21Kamnyar su ngəni antə mjir Yahudi ngkəi ra sakatə I akwa mbwar vəngkər səli ni, ka kəɗar abbər ka da tsi ra. 22Amma har ba ashina Hyel akwa dlar ra, an su na hara tə I mzhi thləthlata azi akwa hara seɗa ata kərari aka ol ka ntsaha, abbər tsu su tə naɓiyayeri ka Musa pəla ni an ata sə hara, 23abbər tar ka Kristi ɗar bwani, ka tsa ndzi mdə na ntangkəma na ata thlata akwa mtəmta. Atar apani antə tsa ata psəmnya parakəu aka mjir Yahudi ka aka shanga durayeri damwa.” #1 Kor 15:20

24Sakatə Bulus ku gari ar kəcimta kərni ni, antə Festus haptə kuraku ka pəla, “Bulus, gə ka cicu! Karatər nga na hang ni akwa shinantə nga ka cicu!”

25Amma Bulus pəla, “Ka barkar nga, bundi, I aɗi ka cicu wa! Jirkur antə I akwa pəlari ka hangkali. 26Kamnyar kuthli asəndə suayeri ngəni, an su na hara tə I akwa gari alari kula thlivər ni. Kamnyar I ka hamta jiri abbər su aɗi na hara akwa nca suayeri ngəni kula səndərni wa, təng tə mda aɗi hara ɗa akwa ɗuwari wa. 27Kuthli Agrippa, ga ku hamta jiri aka naɓiyayeri ya? I ku sənda abbər ga ku hamta jiri ala ɗa.”

28Antə Agrippa pəla aka Bulus, “Akwa saka ngəni raka ni, antə gə tamata abbər ga ata namtə ra kəi ndzi Krishan ya?”

29Antə Bulus pəla, “Wala akwa saka na raka, wala akwa saka na saɓəlari, adduwarna aka Hyel abbər an aɗi təng gə shingə daci wa, amma har kəga shanga mji na akwa nggatə ra ashina ni, ka da ndzi apa iya, təng canayeri ni an aɗi akwa wa.”

30Antə Kuthli ni thlata, ka gwamna, ka Barnis, ka shanga mji na andzəndzi adzə ɗa ni. 31Ləɓəlar ɗa antə da pəla aka nvwa ɗa abbər, “Ai mdə ngəni aɗi hara su na ku mzhi ka mdə tsi ni wa, wala mdə hambwa ni akwa pərsəna wa.” 32Antə Agrippa pəla aka Festus abbər, “Mda ata mzhi psi mdə ngəni ma abbər tsa an aɗi pəla ka mdə mwantə shariya ni akəma Kaisar wa.”

Currently Selected:

Kəth Apos 26: KNB

Highlight

Copy

Compare