खाहुन् 5
5
याम्बोःप्मा याःम्बक् चोःक्मा मेःन्
1आस्साए, आसिक्कुम्निङ्वाॽओ निङ्वाॽ पिरे़ॽओ
हे़क्क्याङ् आघासिङ्निःप्मा पाःन्हाॽ नुरिक् खे़प्से़ॽओ॥
2अक्खेलॽरिक् खासिङ् के़निःप्पा के़बोङ्लो,
हे़क्क्याङ् के़म्ब्राःल्ले़ ने़हिनिङ्वान् के़से़ःप्तुरो॥
3थेआङ्भे़ल्ले़ ये़म्बा हङ्जेना मे़न्छुमाःल्ले़ कुम्ब्राओलाम्
सक्वाघु कुइसिक् कुजागे़नुॽबा पान् लःन्लो,
हे़क्क्याङ् कुबान् सुत्लान् निःङ्गेॽनुःल्ले़ के़ले़ःम्बा चोक्लो॥
4कर कुनुप्मोग खे़न् सुङ्घिःङ् हे़क्के पघिःक्खिःक्लो
हे़क्क्याङ् नाहाङ् कत्नाहाङ् ले़प्माङ् कुहे़क् के़बप्पा
ताभे कुइसिक् हागे़सुक्मा पोङ्लो॥
5खे़ल्ले़ कुलाङ्हाॽ सिमालाम् ले़प्माङ् सङ्माङ् पेःक्लो,
खे़ल्ले़ कुलाङ् ताप्पेॽहाॽ कुदोःप्मा
खे़मा यङ्सङ्पिसाङ् थासिङ्ङाङ् पत्लो॥
6खे़ल्ले़ हिङ्मा लाम् ले़प्माङ् निङ्वाॽए मे़बिरुन्लो,
खे़ल्ले़ कुये़प्ले़क्किन् ताप्फे़ःम्बा चोक्लो,
हे़क्केसाङ् कन् पाःन्निन् खुने़ॽ निङ्वाॽ मे़घोसुन्लो॥
7आल्ल आस्सासे! आबाःन्निन् खे़प्से़म्मे़ॽओ
हे़क्क्याङ् आङ्गाॽ मे़त्निङ्बा पाःन्हाॽलाम्
खिनिॽ मे़घे़त्तासिम्मिन्ने़ मे़बेगे़म्मिन्ने़ॽओ॥
8हे़क्तङ्मा मे़न्छुमान्नु लाःत्लाःत् वये़म्मे़ॽओ,
खे़ल्ले़ कुहिम् लाम्धेत् पेसाङ् मे़बेगे़म्मिन्ने़ॽओ॥
9मेःन्ने़भग्र खिनिॽ मिङ्सोइङ्धाःङ्ङिन् वेॽइन् के़बिरुम्लो,
हे़क्क्याङ् खिनिॽ वे़म्मे़न् कुॽइगे़भे़म्बे़ल्ले़ कुहुक्को थारो,
10वेॽ लाजेॽबाहाॽरे़ खिनिॽ याङ्साकुन्धेन् मे़ज मे़धुङुरो,
हे़क्क्याङ् खिनिॽ होःम्ब्रिक्वा के़से़सुम्माङ् के़धगुम्बे़ल्ले़
वेॽहाॽरे़ खुन्छिॽ हिम्मिन् सधे़क् तिम्लो॥
11हिङ्मे़ल्ले़ निन्धासेःक्ओ खिनिॽ मे़रिङ् के़धक्तिरो,
खे़न् ये़म्मो खिनिॽ ने़क्सान् नु होरिक्पान् यःत्चुत्ताङ् पत्लो॥
12खे़ब्याङ् खे़निॽ अक्खे के़बाःत्तुम्लो,
“आयाक्को आङ्गाॽ हे़त्थिम्मिन् चिःत्तुङ्लो,
हे़क्क्याङ् तोःम्मा नु फे़ःक्मे़न् आनिङ्वाॽओनुए नाॽरुङ्लो॥
13आसिक्साम्बाहाॽरे़ खुन्छिॽ पाःन्निन् खे़म्मा मे़न्दे़म्बारो,
हे़क्क्याङ् आहुॽबाङ्हाॽरे़ खुन्छिॽ पाःन्नो
आङ्गाॽ निङ्वाॽए मे़म्बिबान्लो॥
14हे़क्क्याङ् आङ्गाॽ के़रे़क् सङ्जुम्भोबा मनाहाॽरे़ खुन्छिॽ तगि
साॽरिक् यम्बा के़साक्पो के़राङ्ङाङ् वाॽआरो॥”
15आप्फेक् के़वगे़ङ्ङोबा च्वाःत्तिन् नु
आप्फेक् के़वाबाक्कोबा च्वाःत्तिन् थुङे़ॽओ॥
16के़वाबाक्कोबा च्वाःत्तिन् माराम् ले़प्माङ् नु
के़वहःङ्ङोबा च्वाःत्तिन् पाङ्जुम् ले़प्माङ् कुङ्मा के़बाङ्घुबि?
17खे़न् खे़ने़ॽ के़लागिरक् पोङ्लरो,
वेॽहाॽ लक्के़घोबा पोङ्मा मे़ङ्घोने़न्लरो॥
18खे़ने़ॽ के़वबुन्दाक्वान् हाङ्वागे़न् मुॽइसाम्ले़ पोङ्लरो,
हे़क्क्याङ् थाङ्बे़न् के़वे़म्मो के़वाॽमा कुमेःत्ते़न्नु सःत्ते़ॽओ॥
19सिराॽ पधाङ् के़धाङ्मा कुम्मामा पे़ःङ्वान् कुइसिक्,
खे़ल्ले़ कुनुबक्को खे़ने़ॽ के़सिक्चिम्से़ॽओ,
आभे़ल्ले़साङ् हाबा खे़ल्ले़ कुलुङ्माॽ हिःम्मो
खे़ने़ॽ नानुॽरे़ॽआङ् वये़ॽओ॥
20आबुगे़न् आस्साए, थेआङ् ये़म्बा हङ्जे़नाःल्ले़
कुलुङ्माॽ हिःम्मो खे़ने़ॽ के़धाबाबे?
खे़ने़ॽ थेआङ् एयाङ्बे़ल्ले़ कुमेःत्ते़न् के़हे़प्तुबाबे?
21थेआङ्भे़ल्ले़ मे़न्छाम् याप्मि ये़प्ले़क्किङ्ग
आभे़ल्ले़साङ् यहवे दाङ्बे़ल्ले़ कुनिमो हाबा वाॽरो,
खम्भ्याङ् खे़ल्ले़ के़रे़क् कुलाम्हाॽ खुने़ॽ साॽरुरो॥
22ताक्के़भे़ॽबा मनाःल्ले़ कुजे़न्नो खे़न् थासुरो,
हे़क्क्याङ् आप्फेक् कुलायोल्ले़ इघेःङ्ङिल्ले़ खे़न् खेःक्खुरो॥
23हे़न्थिम् होःप्मारे़ चोगुल्ले़ खे़न् यगुजङ्सि पेःक्लो,
आबाङे साॽरिक् कुअदङ् चोःक्मारे़ खे़न् ताप्पे़ॽ पेःक्लो॥
© 2009, 2023, Wycliffe Bible Translators, Inc. All rights reserved.