खाहुन् 6
6
चोःक्मा मे़न्नुॽमनाबा वेॽ पाःन्हाॽ
1आस्साए, खे़ने़ॽ के़हिम्बेसाङ्बे़ल्ले़ कुसिङ्नात्तो
तोःन्दि के़युङ्सिङ्ङाङ् के़वाॽने़भग्र
इग्र कुभानु माङ्गे़हे़क्सिङ्ङाङ् के़वाॽने़भग्र,
2खे़ने़ॽ आप्फेक् माङ्गे़हे़क्सिङ्बा पाःन्नो के़धाने़भग्र,
हे़क्क्याङ् के़म्ब्राओबा पाःन्निल्ले़ इजोओ के़धाने़भग्र,
3हे़क्केने़भग्र, आस्साए, खे़ने़ॽ से़ःप्सिङ्मारे़ लागि
आङ्गाॽ पाःत्तुङ्बा हे़क्केए चोगे़ॽओ,
थेआङ्भे़ल्ले़ खे़ने़ॽ आप्फेक् के़हिम्बेसाङ्बे़ल्ले़
कुहुक्को खे़ने़ॽ के़ध्ये़आङ् के़वाॽरो—
खे़ने़ॽ नःम्नःम्बा चोःक्सिङ्ङे़ॽआङ् खिमो पेगे़ॽओ,
हे़क्क्याङ् के़हिम्बेसाङ्बे़न् इगेःक्काङ् पेलि फाक्ते़ॽओ!
4के़मिक्के़न् इम्मा मे़बाङ्घे़न्ने़ॽओ,
हे़क्क्याङ् सप्फाधिक्काङ् इम्लॽर मे़याःन्दे़न्ने़ॽओ॥
5सावागे़म्बे़ल्ले़ कुहुक्कोलाम् पे़ःङ्वान् खे़त्छिङ्बा कुइसिक्,
पु के़से़प्पे़ल्ले़ कुइओलाम् पुःन् ले़प्पेःक्पा हे़क्के
खे़ने़ॽ आप्फेक् फिःन्छिङ्ङे़ॽओ॥
6ले़म्स्वाबे, सिक्चोबाल्लो पेगे़ॽआङ्
खे़ल्ले़ कुये़प्ले़क् कुयाःम्बक्किन् ओमे़त्ते़ॽओ
खे़म्ब्याङ् खे़ने़ॽ सिक्कुम्साबा पोःक्खे़ॽओ॥
7खे़न् सिक्चेःम्बे़ल्ले़ कुलाम्लोबा होप्लो,
कुसुहाङ्युक्पा इग्र कुयुक्साबा होप्लो,
8हे़क्केसाङ् हाङ्वामा ये़म्मो खे़ल्ले़
कुजा युङ्मा थाःङ् यारिप् चोगुरो,
हे़क्क्याङ् कुजा सुम्मा ये़म्मो कुजा याङ्घोत्तुरो॥
9ले़म्स्वाबे, खे़ने़ॽ आप्फाल्ले़ थारिक् के़इम्माङ् के़ने़बे?
खे़ने़ॽ आप्फाल्ले़ के़मिक्युमोलाम् के़सोबे?
10सप्फाधिक् इम्मा नु सप्फाधिक् इम्धक्वा तेमारे़,
हुक्किन् इभुप्माआङ् सप्माधिक् नाःम्सिङ्मारे़
11याङ्साॽमा सिमे़न् खे़ने़ॽओ फाःन्दा कुइसिक् नु
कुहोःप्मा कुसाक्मे़न् ताभे के़हेबा मना कुइसिक् तारो॥
12खार्मे़न्दक् के़जोःक्पा नु ताक्के़भे़ॽबा मनाःङ्ग आम्भा कन्लो
खे़ल्ले़ फे़त्लाॽमा पाःन्हाॽ पाःत्तुआङ् वाॽगन्लो,
13खे़ल्ले़ कुमिक्किन् चिघिम् चिघिम् मे़त्तुरो,
हे़क्क्याङ् कुलाङ् नु कुहुक्चोःल्ले़ मिक्सेन् चोगुरो॥
14खुने़ॽ इङ्ले़क्के कुनिङ्वाॽओ ताप्फे़ःम्बा पान् इःत्तुरो,
खे़ब्याङ् आभे़ल्ले़साङ् ये़मे़न्दङ् पान् फोःक्खुरो॥
15खे़ल्ले़चोगुल्ले़ खुने़ॽ कुसम्धाङ् चघप् ये़त्तुक्खे तारो,
हिङ्मा लाम् मेःन्ने खे़न् थिक्ले़ङ्ले़ खाप्पुथ्यःङ् पोङ्लो॥
16तुक्सि पाःन्हाॽ वाॽ, यहवे दाङ्बे़ल्ले़ कुसिक्ले़ःङ्लो
नुसिगेक्पा पाःन्निङ्ग खुने़ॽ कुनिमो सिक्के़ले़ःङ्बा चोक्लो—
17आङ्दिङ् के़लॽबा मिक्हाॽ,
इङ्ले़क् के़बाःप्पा ले़सोःत्हाॽ,
कुदोःप्मा मनाःल्ले़ कुमाक्खिॽ के़से़बा हुक्हाॽ,
18ताप्फे़ःम्बा चोःक्मा के़इःप्पा निङ्वान्,
फे़न्याःम्बक् चोःक्मारे़ लागि के़धासिङ्बा लाङ्गाङ्,
19मे़न्वाॽमना पान् के़सःम्बा इङ्ले़क्पा साःक्खि नु
फुॽनुसाॽ लुम्मो खे़माॽ के़भोङ्बा मनान्॥
चाराम्मा याःम्बक् चोःक्मा मे़नुॽने़न्
20आस्साए, के़म्बारे़ कुइङ्जाङ्हाॽ खे़प्से़ॽओ,
हे़क्क्याङ् के़म्मारे़ कुघाहुःन्निन् मे़नाॽरे़न्ने़ॽओ॥
21खे़ङ्हाॽ के़सिक्लुङ्मो आभे़ल्ले़साङ् कत्ते़ॽओ,
खे़न् पाःन्हाॽ के़सित्लाओ खेःक्खे़ कत्ते़ॽओ॥
22खे़ने़ॽ लाङ्गे़घेःक्किल्ले़ खे़ल्ले़ लाम्गे़लोरो,
खे़ने़ॽ के़इम्मे़ल्ले़ खे़ल्ले़ ताङ्गे़से़ःप्लो,
याक्थुङ्धो के़वाॽइल्ले़ खे़न् खे़ने़ॽनु ताॽजे़ङ्लो॥
23थेआङ्भे़ल्ले़ खे़न् इङ्जाङ्हाॽ सेमिरो,
हे़क्क्याङ् खाहुन्निन् से़दिङ्दिङ् के़ओःप्पा ओःत्तिरो,
खम्भ्याङ् हे़न्थिम्ले़ लागि फे़ःक्सिङ्मान् हिङ्मा लाम्लो,
24खे़ल्ले़ खे़ने़ॽ ये़म्बा के़गोःप्मा मे़न्छुमा नु
हिम्बेसाङ्बाहाॽरे़ खुन्छिॽ मेःत्हाॽरे़न् मुर्ले़ःम्बा
पाःन्हाॽलाम् खे़ल्ले़ माःङ्घा के़गत्लो॥
25खे़न् नुमासुक्मा चोःक्पाल्ले़ चोगुल्ले़
खे़ने़ॽ के़निङ्वाॽओ खे़न् मिक् मे़गेःत्ते़न्ने़ॽओ,
इग्र खे़ल्ले़ कुमिक्किल्ले़ इङ्ले़क्को के़न्धाने़ल्लरो॥
26थेआङ्भे़ल्ले़ मनाःल्ले़ कुघे़ःक् थिक् खरे़ःङ्ङो के़त्निमा मे़न्छुमान् ताःप्मा सुक्तुरो,
कर ये़म्बा हङ्जेना मे़न्छुमाःल्ले़ग के़हिङ्मन्ने़न् मे़क्खुरो॥
27थे कुभा मनाःल्ले़ खुने़ॽ कुदेःत्ते़न् मिमे़न्दिक्के
खुने़ॽ कुभक्तुङ्मो मिन् ने़मा सुक्तुबि?
28मिघाङ्ग्रोःक्को कुभा मनान् लाङ्घेःक्किल्ले़
थे खुने़ॽ कुलाङ्ङिन् मिमे़दिक्ने़म्बि?
29याप्मिःल्ले़ कुमेःत्ते़न्नु के़इम्बे़न् हे़क्तङ्बाए पोङ्लो,
खे़न् मे़न्छुमान् के़सुबा आत्तिन् ये़म्बित्छाःन्छाङ्
खुम्दिङ् मे़ङ्घोए खे़त्छिङ्मा मे़घोने़न्लो॥
30साॽरिक् कुसिक्के़लाःक्पा खुःन्द्रिक्पा मनाःल्ले़
कुसिक्लाःक्मा सिम्मारे़ लागि खुःत्ने़भग्र
मनाहाॽरे़ खे़न् मे़न्जिःत्तुन्लो॥
31करसाङ् खे़न् मे़दे़म्सुने़भग्र खे़ल्ले़ नुसिले़ङ्
यारिक् यरिक् हुङ्माए पोङ्लो,
पोङ्मा सुक् खे़ल्ले़ कुहिम्मोबा के़रे़क्
कुयाङ्सा कुन्धेहाॽरे़आङ् हुङ्मा पोङ्लो॥
32कर याम्बोःप्मा याःम्बक् के़जोःक्पा मनान्
कुऩेहि के़होप्पा चोक्लो,
अक्तङ्बा याःम्बक् के़जोःक्पे़ल्ले़
खुने़ॽ आप्फेक् कुसम्धाङ् फे़त्लाॽमे़न् तारुरो॥
33खे़न् ते़ःम्भुक् तुम्माङ् कुजाःत्थि पेःक्लो,
हे़क्क्याङ् कुनामे़न्छाॽ मे़प्मे़न् आभे़ल्ले़आङ् मे़माने़ल्लो॥
34थेआङ्भे़ल्ले़ नाहे़म्मे़ल्ले़ ये़म्बाःल्ले़ कुसिक् पोःक्लो,
हे़क्क्याङ् कुलुङ्माॽ स्याःत् मे़ल्लॽए कुले़क्वा नुःक्तुरो॥
35खे़ल्ले़ कुले़क्वा साम्बान् थेआङ् मे़दाःक्तुन्लो,
आक्ख्यारिक् यल्लिक् सुरुत् याङ्ले़आङ्
खे़न् ले़म्मा सुःम्मा सुक्मे़दे़त्ने़न्लो॥
© 2009, 2023, Wycliffe Bible Translators, Inc. All rights reserved.