तोलिङ्सोमु 37
37
युसुफ नु खुने़ॽ कुम्भुॽ कुन्साॽहाॽ
1याकुबे़न् आबाङे कुम्बा युङे़बा कनान लाजेॽओ युङे़॥
2याकुबे़ल्ले़ कुयाःम्बेॽओ के़बोङ्बा साप्मुःन्धुम्मिन् हाबा कल्लो॥
युसुफे़न् थिबोङ्ङाङ् नुसि तङ्बे के़रे़ल्ले़ खुने़ॽ कुम्बारे़ कुमेत् जिल्पा नु बिल्हारे़ खुन्छिॽ ये़म्बित्छासा खुने़ॽ कुम्भुॽसिनु थिक्यान् मे़ःन्दा मे़ल्लुक् चाराम्नु वये़॥ थिक्यान् कुम्भुॽसिरे़ खुनिॽ कुइभे़म्मा याःम्बक्किन् निसुआङ् कुम्बा चे़क्तु॥
3याकुबे़न् काप्पोबा तुम्से़ल्ले़ युसुफे़न् कत्तुबाल्ले़ चोगुल्ले़ वेॽ कुस्साहाॽनुःल्ले़ यरिक् खुने़ॽ लुङ्माॽ तुक्तु॥ हे़क्क्याङ् याकुबे़ल्ले़ कुस्सा युसुफे़न् कुभुङ् इसेःङ्बा लत्छा केःम्बा लगेःत्थिक् तॽरु॥ 4कर कुम्भुॽसिरे़ युसुफे़न् खुन्छिॽ पाःल्ले़ खुन्छिॽनुःल्ले़आङ् यरिक् लुङ्माॽ तुक्तुबा मे़निसुबाल्ले़ चोगुल्ले़ खुने़ॽ चिःप्मा मे़हेःक्तु हे़क्क्याङ् खे़ङ्हाॽ खुने़ॽनु नुरिक्काङ् मे़म्बारे़न्॥
5थिक्ले़ङ् योसेफरे़ से़प्माङ्धिक् माक्तु॥ खुने़ॽ खे़न् कुसे़प्माङ्ङिन् कुम्भुॽसि चे़क्तुसि खे़ङ्हाॽरे़ खुने़ॽ तगिनुःल्ले़आङ् साॽरिक् चिःप्मा मे़हेःक्तु॥ 6खुने़ॽ खे़ङ्हाॽ मे़त्तुसि, “आङ्गाॽ माक्तुङ्बा से़प्माङ्ङिन् खे़प्से़म्मे़ॽओ॥ 7आनिॽ के़रे़क् प्याङ्सिओ चाधःङ्मा इआघेःक्सुम्ल आयागे़॥ आङ्गाॽ इघेःक्सुङ्बा चाधःङ्मा आगक्किन् पोगे़, हे़क्क्याङ् खिनिॽ चाधःङ्मा कक्हाॽ खिर्लि मे़जुप्से़आङ् आङ्गाॽ आजाधःङ्मा आगक्किन् से़वा मे़मे़त्तु॥”
8खे़ल्ले़ कुम्भुॽसिरे़ खुने़ॽ मे़मे़त्तु, “खे़ने़ॽ थे आनिगे सम्धाङ् युक् के़जोगुबाबि? थे खे़ने़ॽ आनिगे याप्मि के़युक्पाबि?” हे़क्क्याङ् खे़ल्ले़ कुसे़प्माङ्ङिन् नु खुने़ॽ कुबाःन्निल्ले़ चोगुल्ले़ खे़ङ्हाॽरे़ छान् साॽरिक् चिःप्मा मे़हेःक्तु॥
9खे़ब्याङ् खुने़ॽ वेॽ से़प्माङ्धिक् माक्तु हे़क्क्याङ् कुम्भुॽसि चे़क्तुसि, “खे़प्से़म्मो, आङ्गाॽ वेॽ से़प्माङ्धिक् माक्तुङ्॥ नाम्, लाबा नु थिबोङ्ङाङ् थिक् खेःम्सिक्पाहाॽरे़ आङ्गाॽ से़वा मे़मे़त्ताङ्॥”
10कुम्भुॽसि चे़क्तुसिबा हे़क्के खुने़ॽ कुसे़प्माङ्ङिन् कुम्बा चे़क्तुल्ले़, कुम्बारे़ फे़ःक्तुर मे़त्तु, “खे़ने़ॽ कन् के़माक्तुबा से़प्माङ्ङिन् थे़माबे? से़क्खाए खे़ने़ॽ के़म्मा नु के़म्भुॽसि हे़क्क्याङ् आङ्गाॽ फे़रिगे़आङ् साम्बोन् हबत्ताङ् से़वा मे़त्तासिगे़बाबि?” 11खे़ब्याङ् खे़ल्ले़ कुम्भुॽसिरे़ खुने़ॽ नाहे़प्मा मे़हेःक्तु॥ कर कन् पाःन्निन् खुने़ॽ कुम्बारे़ग कुनिङ्वाॽओए युक्खु॥ #सेःक्युक् ७:९
युसुफे़न् मिस्र लाजेॽओ मे़सङ्घुॽ
12थिक्ले़ङ् युसुफरे़ कुम्भुॽहाॽ कुम्बारे़ कुमे़ल्लुक् कुमे़ःन्दा चाराम्से़ सकेम कुबेसाङ् मे़बेआङ् मे़वये़॥ 13हे़क्क्याङ् याकुबे़ल्ले़ युसुफे़न् मे़त्तु, “के़म्भुॽसि सकेम्मो मे़ल्लुक्हाॽ चामे़राम्सुसिर मे़याक्॥ फे़रे़ॽ, आङ्गाॽ खुन्छिॽओ खे़ने़ॽ पाङ्ने़देने़॥” युसुफरे़ मे़त्तु, “ओक्, आङ्गाॽ पेःक्का॥”
14कुम्बारे़ खुने़ॽ मे़त्तु, “के़म्भुॽसि नु मे़ल्लुक्हाॽ आक्खे मे़लॽ मे़जाइ पेगे़ॽआङ् ओमे़त्ते़से़ॽ॥ हे़क्क्याङ् आङ्गाॽओ इङ्घङ् तारे़ॽओ॥” खे़ब्याङ् याकुबरे़ खे़न् हेब्रोनबा ने़ने़बादे़न्नोलाम् सकेम्मो पाङ्घुदेसु, युसुफे़न् सकेम्मो के़रे़॥ 15लत्छा मनाधिक्ले़ खुने़ॽ प्याङ्सिओ ताक्कन्दे़र वये़बा तुमु॥ खे़न् मनाःल्ले़ खुने़ॽ सेःन्दोसु, “खे़ने़ॽ हात् के़गोःत्तुर के़वाॽबाबे?”
16युसुफरे़ खे़न् मे़त्तु, “आङ्गाॽ आम्भुॽसि कोःत्तुङ्सिङ्ल वाॽआबा॥ आत्तिसोरि खे़ङ्हाॽरे़ खुनिॽ मे़ल्लुक् लुप्हाॽ चामे़राम्सुसिर मे़वाॽबे मे़त्ताङ्ङे़ना?”
17खे़न् मनाःल्ले़ मे़त्तु, “खुन्छिॽग कॽयोलाम् मे़बे, थेआङ्भे़ल्ले़ ‘आनिॽ दोतान ले़प्माङ् पेगि’ मे़लॽरे़र मे़यागे़बा आङ्गाॽ खे़प्सुङ्सिङ्॥” खे़ल्ले़चोगुल्ले़ युसुफे़न् दोतान ले़प्माङ् कुम्भुॽसि कोःत्तु हक्सुसिर पेआङ् खे़ङ्हाॽ तुमुसि॥
18खे़ङ्हाॽरे़ खुने़ॽ माःङ्घालाम्मे फे़रे़र पत्छे़बा मे़निसु, हे़क्क्याङ् खुन्छिॽ पेसाङ् के़प्मानुःल्ले़ तगिए खुने़ॽ से़प्मा पान् इङ्मे़दङ्घु॥ 19खे़ङ्हाॽ अक्खे मे़मे़त्छिङ्, “खे़न् से़प्माङ् के़माक्पे़न् फे़ल्ल पत्लो॥ 20लु, आल्ल खे़न् से़रुम्माङ् लत्छा वबाक्को लाप्फेसुम् केःत्तुम्॥ ‘ताम्भुङ् थक्साःल्ले़ खे़न् चरछ’ फाॽआङ् पाप्पाॽ मे़त्तुम्, खे़ब्याङ् खे़ल्ले़ कुसे़प्माङ्हाॽ थे पोङ्बि, ओमे़त्तुम् साॽरुम्॥”
21कन् पाःन्निन् खे़प्सुआङ् रुबे़ने़ल्ले़ अक्खे पाःत्तुर खे़ङ्हाॽरे़ खुनिॽ हुक्को थामालाम् से़ःप्मा कोःत्तुर मे़त्तुसि, “आनिॽ खे़न् से़प्माएग मे़नुॽने़न्॥ 22आनिॽ खे़ल्ले़ कुमाक्खिॽ से़सुम् मेःन्॥ एःक्सादे़न्नोबा लत्छा वबाक्कोरक् आक्तुम्, कर खुने़ॽ खाःन्दुम् मेःन्॥” खे़ङ्हाॽरे़ खुन्छिॽ हुक्कोलाम् से़ःप्माआङ् खे़न् कुम्बारो तेॽमा फाॽआङ् रुबे़ने़ल्ले़ हे़क्के मे़त्तुसिआङ् वये़॥ 23कल्ले़चोगुल्ले़ युसुफे़न् कुम्भुॽसिरे़ खुनिॽ पेसाङ् के़रे़ल्ले़ खुने़ॽ चाक्सुबा नुबा कुभुङ् इस्सेःङ्बा केःम्बा कुलगेःत्तिन् मे़भे़न्दु मे़बिरुआङ् मे़नाप्तु॥ 24हे़क्क्याङ् खे़ङ्हाॽरे़ खे़न् लत्छा कुदिम्बेॽ केःम्बा वबाक्को लाप्मे़देसु मे़गेःत्तु॥ खे़न् च्वाःत् के़होप्पा से़ङ्से़ङ्बा वबाक् ने़स्से़॥
25हे़क्क्याङ् खे़ङ्हाॽ तःक् चासे़ मे़युङ्सिङे़ल्ले़ खे़ङ्हाॽ अक्खे थो ओमे़मये़ हे़क्केःल्ले़ ले़ङ्हङ् के़जोःक्पा गिलादलाम् के़भे़म्बार के़बप्पा इस्माइलि मनाजि थे़ःक्पे़त् मिस्र लाजेॽ ले़प्माङ् कुनाम्गे़नुॽबा मारुक्, हुःत्छिङ्मनाबा फात्छे, हे़क्क्याङ् मुर्र कक्हाॽ उमेहाॽ मे़गुःत्तुसिआङ् मे़देॽरुसिर मे़बत्छे़बा मे़निसुसि॥ 26खे़ब्याङ् यहुदाःल्ले़ कुम्भुॽ कुन्साॽहाॽ मे़त्तुसि, “आनिॽ नुसाॽइन् आसे़रुम्माङ् आमाॽरुम्मिल्ले़ आनिॽ थे आघोसुम्माङ्बे? 27फे़रे़म्मे़ॽ, आल्ल आनिॽ खे़न् इस्माएलिहाॽरे़ खुनिॽ हुक्को सङ्सुम्देसुम्॥ आनिॽ खे़न् खाःन्दुम् मेःन्॥ थेआङ्भे़ल्ले़ खे़न् आबाङे आनिॽ नुसाॽरो, आनिॽग लत्छा पाःल्ले़ कुस्सादि॥” खुने़ॽ कुम्भुॽ कुन्साॽसिरे़ कुबाःन्निन् मे़घे़प्सु॥ 28खे़ल्ले़चोगुल्ले़ मिध्यान के़युङ्बा ले़ङ्हङ् के़जोःक्पाहाॽ हाबा खे़न् लाम्मोलाम् मे़भे़रे़ल्ले़ युसुफे़न् खुने़ॽ कुम्भुॽसिरे़ वबाक्कोनु मे़उःक्खु मे़लःत्तुआङ् खे़न् इस्माएलिहाॽरे़ खुनिॽ हुक्को निबोङ् युप्पायाङ्ङो मे़सङ्घु मे़देसु॥ हे़क्क्याङ् खे़ङ्हाॽरे़ युसुफे़न् मिस्र लाजेॽओ मे़देॽरुआङ् मे़बे॥ #सेःक्युक् ७:९
29रुबे़ने़न् लुम्बाःत्तो नुःक्खे़ त्ये़ःल्ले़ युसुफे़न् खे़न् वबाक्को होःप्ते़बा निसुआङ् खुने़ॽ कुजाङ्ङिन् थे़ःक्खु॥ 30हे़क्क्याङ् कुन्साॽहाॽरो पेगे़आङ् मे़त्तुसि, “हिन्जाॽइन्ग होःप्पिङग? आल्ल आङ्गाॽ आत्तान् पेःक्काबाबे?”
31खे़ब्याङ् खे़ङ्हाॽरे़ लत्छा मे़ःन्दासाःत्थिक् मे़से़रुआङ् युसुफरे़ कुदेःत्तिन् खे़न् माक्खिॽओ मे़निःप्सु॥ 32हे़क्क्याङ् खे़न् नुबा कुभुङ् इस्सेःङ्बा लगेःत्तिन् खे़ङ्हाॽरे़ खुनिॽ पा याकुबरो मे़दारुआङ् मे़मे़त्तु, “कन् आनिगे खोसुम्बे़॥ ओमे़त्ते़साॽरे़ॽ, कन् के़स्साःल्ले़न्बि मेःम्बि?”
33कुम्बारे़ खे़न् लगेःत्तिन् कुसिङ् निःत्तुआङ् पाःत्तु, “कन् लगेःत्तिङ्ग आस्साःल्ले़ए कुलगेःत्लो॥ से़क्खासाङ् ताम्भुङ् थक्साःल्ले़ चदेसुआङ् कुजक्ता कुले़म्दा पोःक्खे़बिला॥” 34खे़ब्याङ् याकुबरे़ कुलगेःत्तिन् थे़ःक्खु, हे़क्क्याङ् फॽइ युम्मा ते़न्नो सगितेत् कित्छिङ्ङाङ् कुस्साःल्ले़ कुलागि यरिक् ये़न् थारिक् मे़रिङ् थक्ते़॥ 35खुने़ॽ के़रे़क् कुस्सा ये़म्बित्छाहाॽ नु मे़न्छुमाहाॽ मे़द्ये़आङ् हाङ्हाङ् मे़प्मा मे़गोःत्तु, कर खुने़ॽ कुनिङ्वाॽओ सनारुङ् मे़बोःक्खे़न्॥ खुने़ॽ पाःत्तु, “मेःन्, आस्सान् मे़रिङ् थक्तुङ्ल आङ्गाॽ सिआरो॥” अक्खेलॽरिक् युसुफे़न् कुम्बारे़ खे़न् हाःप्तु॥
36हाबा खे़न् ये़म्मो मिध्यानबा मनाहाॽरे़ युसुफे़न् मिस्र लाजेॽबा हाङ्हिम् कम्ब्राङ् के़मे़प्पा थक्पेबा पोतिफरे़ल्लो मे़सङ्घु मे़देसुरो॥
Currently Selected:
तोलिङ्सोमु 37: LIF
Highlight
Share
Compare
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
