तोलिङ्सोमु 38
38
यहुदा नु तामारे़न्
1खे़न् ये़म्मो यहुदाःङ्ग कुम्भुॽ कुन्साॽसि ले़रुसिआङ् अदुल्लाम ये़क्यक्को के़युङ्बा हैरा मे़प्मनाबा मनाःल्लो युङ्से़ पेगे़॥ 2खे़ॽयो यहुदाःल्ले़ सुआ मिङ् के़वाःप्पा कनानि मनाधिक्ले़ कुस्सा मे़न्छुमान् निसु॥ खुने़ॽ खे़न् ते़न्धाम् मेःक्खिम् मे़त्तुआङ् खे़न्नु इप्से़॥ 3खे़न् मे़न्छुमान् मे़न्छुक्मा पोःक्खे़आङ् ये़म्बित्छा साधिक् कत्तु, हे़क्क्याङ् खे़ल्ले़ कुमिङ् एर वाःत्तु॥ 4खे़न् याम्मो मे़न्छुक्मा पोःक्खे़आङ् वेॽ ये़म्बित्छा साधिक् कत्तु॥ खे़ल्ले़ खे़न् ओनान मिङ् वाःत्तु॥ 5याम्मोआङ् खे़न् मे़न्छुक्मा पोःक्खे़आङ् ये़म्बित्छा साधिक् कत्तु॥ हे़क्क्याङ् खे़ल्ले़ खे़न् सेलह मिङ् वाःत्तु॥ कजिब मे़प्मनाबादे़न्नो मे़युङ्ङे़ल्ले़ खे़ल्ले़ सेलहःन् कत्तु॥
6यहुदाःल्ले़ कुस्सा तुम्बा ए़रले़ कुलागि लत्छा मेःत् तारु पिरु॥ खे़ल्ले़ कुमिङ् तामार वये़॥ 7कर यहुदाःल्ले़ कुस्सा तुम्बा एरे़न् यहवे दाङ्बे़ल्ले़ कुनिमो कुॽइके़भे़म्बा वये़, हे़क्क्याङ् यहवे दाङ्बे़ल्ले़ खे़न् से़रु॥
8खे़ब्याङ् यहुदाःल्ले़ ओनाने़न् मे़त्तु, “के़म्भुॽरे़ कुमेःत्तिन्नु इप्से़ॽ, हे़क्क्याङ् नुसाॽरे़ चोःक्मा के़बोङ्बा थिम् इसिःक् चोगे़ॽ, हे़क्केःल्ले़ के़म्भुॽरे़ कुलागि साहाॽ के़गत्तुसिर॥” 9कर आबाङे कुस्सा मे़म्बोङ्मनाबा निसुआङ् ओनाने़ल्ले़ कुन्ने़द्रेःन्नु इप्से़ल्ले़ कुम्भुॽरे़ कुलागि कुस्सा मे़बोङ्ने़ल्ल फाॽआङ् याॽरिःम्बे़न् लाःक्कात् खाम्बाङ्ङो मुत्थासुदेसु॥ 10खे़ल्ले़ चोगुबा कन् याःम्बक्किन् यहवे दाङ्बाल्ले़ कुनिमो ताप्फे़ःम्बा थाबे़, हे़क्क्याङ् खुने़ॽ खे़न्नाङ् स्ये़र याःन्दु॥
11खे़ब्याङ् यहुदाःल्ले़ कुम्बाङ्लि तामारे़न् मे़त्तु, “आस्सा सेलहःन् यम्बा मे़म्बोङ्ङे थारिक् खे़ने़ॽ के़म्बारे़ कुहिम्मो मेमेदुमाए पोःक्खे़आङ् वये़ॽ॥” सेलहःन्नाङ् कुम्भुॽसि हे़क्केए सिबिला फाॽआङ् खुने़ॽ किसे़आङ् वये़ खे़ल्ले़चोगुल्ले़ तामारे़न् कुम्बारे़ कुहिम्मो युङ्से़ पेआङ् वये़॥
12कुभा तङ्बे एगाङ् यहुदाःल्ले़ कुहिम्सामा सुआरे़ कुस्सान् मासिङ्॥ मे़रिङ् थक्मा ये़म् चुरे़आङ् यहुदान् अदुल्लाम के़युङ्बा कुन्जुम् हैराने़न् तेॽरुआङ् तिम्नाओ कुमे़ल्लुक् मुरिक् के़नःङ्बाहाॽ साॽसे़ पेगे़॥
13कुन्नुःप्पे़न् तिम्नाओ मे़ल्लुक् मुरिक् के़घक्पाहाॽरो पेर पत्छे़बा इङ्घङ् तामारे़ल्ले़ खोसु॥ 14खुने़ॽ सेलहःन् यम्बा पोःक्खे़आङ्साङ् खे़ल्ले़ कुमेत् पोङ्मा मे़घोसुम्बा निसु॥ हे़क्केःल्ले़ खुने़ॽ मेमेदुमा कुजाङ्ङिन् फे़न्दुआङ् पःत्थाङ्ङिल्ले़ कुनाःन् ते़प्तु हे़क्क्याङ् वेॽ मे़न्छुमा ले़ङ्सिङ्ङाङ् तिम्ना के़बेःक्पा लाम्मो एनैम ये़क्यक्कोबा लाम्धेःप्पो युङ्सिङ्॥
15खे़ल्ले़ कुनाःन् ते़प्तुबा यहुदाःल्ले़ निसुआङ् के़त्निमारछ लॽरे़॥ 16लाम्मिल्ले़ कुयाओ पेआङ् खुने़ॽ खे़न् मे़त्तु, “लु, आङ्गाॽ खे़ने़ॽनु इम्से़ फे़न्ना॥” आल्ल खुने़ॽ आबाङे कुम्बाङ्लिन् फाॽआङ् मे़निसुन्॥
खे़ल्ले़ मे़त्तु, “खे़ने़ॽ आङ्गाॽनु के़इम्मिल्ले़ थे के़बिआबे?”
17खुने़ॽ मे़त्तु, “मे़ःन्दा लुप्पोलाम् लत्छा मे़ःन्दाज्याःक् थिक् खे़ने़ॽ पिने़ॽ॥”
खे़ल्ले़ मे़त्तु, “खे़ने़ॽ खे़न् मे़न्हाङ्ङे थारिक् आङ्गाॽनु कुभा मिक्सेन् के़धाॽआबि?”
18यहुदाःल्ले़ मे़त्तु, “आङ्गाॽ थे खे़ने़ॽ थाॽने़बे?”
खे़ल्ले़ मे़त्तु, “खे़ने़ॽ के़इःत्छाःप्पिन् हे़क्क्याङ् के़इदाःक्किन् नु कङ् के़हुक्कोबा तक्कातिन् के़युक्खु के़धःल्ले़ नुॽ॥” खे़ल्ले़चोगुल्ले़ यहुदाःल्ले़ खे़न् पाःन्हाॽ खे़न् पिरु, हे़क्क्याङ् खे़न्नु इप्से़॥ हे़क्क्याङ् खुने़ॽलाम्बा खे़न् मे़न्छुक्मा पोःक्खे़॥ 19खे़ब्याङ् खे़न् पोगे़आङ् थासिङ् पे, हे़क्क्याङ् कुबःत्थाङ्ङिन् फुन्दुआङ् याम्मु मेमेदुमा चाङ्ङिन् चाक्सिङ्॥
20यहुदाःल्ले़ ने़स्सुधबा कुजिगक्वाहाॽरे़ कुधे़ॽसे़ अदुल्लाम के़युङ्बा कुन्देःङ्बाल्ले़ कुहुक्को लत्छा मे़ःन्दाज्याःक् थिक् हाङुदेसु॥ कर खे़ल्ले़ खे़न् मे़न्छुमान् मे़दुमुन्॥ 21“एनैमओ लाम्मिल्ले़ कुयाओ के़युङ्मा के़त्निमान् आत्ति वाॽबे?” मे़त्तुसिर खुने़ॽ खे़न् ते़न्नोबा मनाहाॽ सेःन्लाप्तुसि॥
कॽयोग “के़त्निमाग हाःत्ताङ् होप्लो” फाॽआङ् खे़ङ्हाॽरे़ मे़मे़त्तु॥
22खे़ब्याङ् खे़न् यहुदाःल्लो नुःक्खे़ फे़रे़आङ् मे़त्तु, “आङ्गाॽग खे़न् मे़ङ्घोबाङ्॥ याम्मो खे़न् ते़न्नोबा मनाहाॽरे़आङ् ‘कॽयोग के़त्निमाग हाःत्ताङ् होप्लो’ मे़बाःत्तु॥”
23यहुदाःल्ले़ पाःत्तु, “खे़ल्ले़ खे़न् चिगक्वाहाॽ खे़ल्ले़ए युक्खुर, मेःन्ने़फाग्र मनारे़ आम्येःत्ताङ् नाधारो॥ ओमे़त्ते़ॽ, आल्ल आङ्गाॽ कङ् मे़ःन्दासाःत्लिन् खुने़ॽ हाक्तुङ्ङाङ्ङे वये़, कर खे़ने़ॽ खे़न् के़न्दुमुन्॥”
24खप्मे़न् ला सुम्सि एगाङ् “खे़ने़ॽ के़म्बाङ्लि तामारे़न् के़त्निमा ले़ङ्सिङ्ङाङ् वाॽरो हे़क्क्याङ् आल्लो मे़न्छुक्मा वाॽ” के़लॽबा इङ्घङ्ङिन् कुभा मनारे़ यहुदान् मे़मे़त्तु॥
खे़ब्याङ् यहुदाःल्ले़ मे़त्तुसि, “खे़न् कॽयो तारे़म्मे़ॽआङ् मिओ लाबाम्मे़ॽ॥”
25खे़न् मे़भे़त्तुर मे़बत्छे़ल्ले़ कुन्नुःप्पे़न् अक्तङ्बा इङ्घङ् हाक्तु, “कन् चिगक्वाहाॽरे़ कुन्दाङ्बाल्लोलाम् आङ्गाॽ मे़न्छुक्मा पोःक्खाङ्बारो॥” हे़क्क्याङ् खे़ल्ले़ पाःत्तु, “ओमे़त्ते़म्मे़ॽ, कन् इत्छाःप्पिन् हे़क्क्याङ् इदाःक्किन् नु कङ् तक्कातिन् हाःत्ले़न्बे?”
26खे़ब्याङ् यहुदाःल्ले़ खुने़ॽ कुजिगक्वाहाॽ कुसिङ् निःत्तुआङ् मे़त्तुसि, “खे़ङ्ग आङ्गाॽनुःल्ले़आङ् साम्योनिमारे़छ, थेआङ्भे़ल्ले़ आस्सा सेलहःन् खे़ल्ले़ कुये़म्बा पोङ्से़ मे़म्बिबान्॥” खे़ब्याङ्ङाङ्धो खुने़ॽ खे़न्नु याम्मो मे़इप्से़न्॥
27तामारे़ल्ले़ कुस्सागप्मा ये़म् के़रे़ल्ले़ खे़ल्ले़ कुसाप्पोःक्को काप्साबा याक्सिॽ के़लॽबा निङ्वाॽ मे़घोसु॥ 28खे़ल्ले़ कुस्सागप्मा ये़म्मो लत्थिक्ले़ कुहुक्किन् लाःक्कात् लःत्तु, हे़क्क्याङ् हुक्के़लिःङ्मे़ल्ले़ “कन् तगि सागे़वाःन्छिङ्बा” पाःत्तुर खे़ल्ले़ कुहुक्को हे़ःत्ताङ्बा खिःल्ले़ इभुत्तु पिरु॥ 29कर खे़ल्ले़ कुहुक्किन् याम्मो सिगाङ् केःत्तुआङ् खे़ल्ले़ कुन्साॽइन्ने़ तगि सावाःन्छिङ्॥ हे़क्क्याङ् खे़ल्ले़ अक्खे मे़त्तु, “हौ, खे़ने़ॽग आक्खेआङ्नि तगि के़भक्ते़ के़लःन्दे़ग?” हे़क्क्याङ् खे़न् फारेस#३८:२९ फारेस—कन् मिङ्ङे़ल्ले़ कुबेन् हिब्रुओ “फक्मा लःम्मा” पोङ्ॽ॥ मिङ् मे़वाःत्तु॥ 30खे़ब्याङ् याङ्सि कुहुक्को हे़ःत्ताङ्बा खिःल्ले़ इभुप्मनाबे़न् सावाःन्छिङ्॥ खे़न् जेरह#३८:३० जेरह—कन् मिङ्ङे़न् हिब्रुओ “तानाम् हे़ःत् लॽरिक् नाम्गे़के़प्पा पाःन्छेःक्वा” हे़क्के खे़म्दे़त्॥ मिङ् मे़वाःत्तु॥
Currently Selected:
तोलिङ्सोमु 38: LIF
Highlight
Share
Compare
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
