तोलिङ्सोमु 36
36
एसाबरे़ कुमुॽइदाङ्साहाॽ
1एसाबे़ल्ले़ कुधाःक्हाॽरे़ खुन्छिॽ साप्मुःन्धुम्मिन् हाबा कन्लो (खे़न् एदोम्माङ् मे़मे़त्तु)॥ #१ साप्मु १:३४-३७
2एसाबरे़ कनानि मे़न्छुमाहाॽलाम्बा मेःत्हाॽ तारुसि॥ हित्ति एलोनरे़ कुस्सा मे़न्छुमा आदान, हे़क्क्याङ् हिब्बि सिबोरे़ कुस्सा ये़म्बित्छा आनारे़ कुस्सा मे़न्छुमा ओहोलिबामान्, #तोलिङ् २६:३४ 3हे़क्क्याङ् इस्माएलरे़ कुस्सा मे़न्छुमा नबायोतरे़ कुन्साॽ बासमते़न्॥ #तोलिङ् २८:९
4एसाबलाम् आदाःल्ले़ एलिपजे़न् कत्तु हे़क्क्याङ् बासमते़ल्ले़ रुएल्ले़न् कत्तु, 5हे़क्क्याङ् ओहोलिबामाःल्ले़ येउस, यालाम नु कोरहन् कत्तु॥ कनान लाजेॽओ सागे़वाःन्छिङ्बा एसाबरे़ कुस्साहाॽ हाबा कन्हाॽरो॥
6हे़क्क्याङ् एसाबरे़ आबाङे कुमेःत्हाॽ, कुस्साहाॽ हे़क्क्याङ् कुस्सा मे़न्छुमाहाॽ खुने़ॽ कुहिम्मोबा के़रे़क् मनाहाॽ पित्मे़ःन्दाहाॽ हे़क्क्याङ् कनान लाजेॽओ थगुबा के़रे़क् कुयाङ्सा कुन्धेहाॽ याङ्सिङ्आङ् कुन्साॽ याकुबनु से़न्दे़आङ् वेॽसमा लाजेॽओ पेगे़॥ 7खुन्छिॽ साॽरिक् यरिक् याङ्साकुन्धे कत्ते़छुबाल्ले़ चोगुल्ले़ खुन्छिॽ युङे़छिबा ते़न्निल्ले़ खुन्छिॽ थक्साहाॽ सोरिक् वाॽमारे़ लागि मे़योरुन्सिन्॥ 8खे़ल्ले़चोगुल्ले़ एसाबे़न् (इग्र ए़दोम्मे़न्) सेइर लाजेॽओबा कोःक्माहाॽओ युङ्मा हेःक्ते़॥
9सेइरबा थे़गु माङ्वा कोःक्मा फाङ्जङ् लाजेॽओ के़युङ्बा एसाबरे़ कुमुॽइदाङ्सा एदोमिहाॽरे़ खुन्छिॽ साप्मुःन्धुम्मिन् हाबा कन्हाॽरो॥
10एसाबरे़ कुस्साहाॽरे़ खुनिॽ मिङ्हाॽ हाबा कन्लो—
एसाबरे़ कुमेत् आदारे़ कुस्सा एलिपज, हे़क्क्याङ् एसाबरे़ कुमेत् बासमतरे़ कुस्सा रुएल॥
11एलिपजरे़ कुस्सा ये़म्बित्छाहाॽ—
तेमान, ओमार, सपो, गाताम, हे़क्क्याङ् कनज॥ 12एसाबरे़ कुस्सा एलिपजरे़ तिम्न मिङ् के़वाःप्मा लत्छा कुजक्मेःत् थिक् वये़॥ एलिपजलाम् खे़ल्ले़ अमाले़क्के़न् कत्तु॥ एसाबरे़ कुमेत् आदारे़ कुम्मे़न्छाॽहाॽ हाबा कन्हाॽरो॥
13रुएलरे़ कुस्साहाॽ—
नहत, जेरह, सम्मा नु मिज्जा॥ एसाबरे़ कुमेत् बासमतरे़ कुम्मे़न्छाॽहाॽ हाबा कन्हाॽरो॥
14एसाबरे़ कुमेत् ओहोलिबामा, खुने़ॽग सिबोने़ल्ले़ कुम्मे़न्छाॽ हे़क्क्याङ् अनारे़ कुस्सा वये़, एसाबलाम् खुने़ॽ कत्तुसिबा कुस्साहाॽ हाबा कन्हाॽरो—
येउस, यालाम नु कोरह॥
15एसाबरे़ कुधाःक्हाॽओ तुम् लाम्लोबाहाॽ हाबा कन्हाॽ मे़वये़रो—
एसाबरे़ कुस्सा तुम्बा एलिपजरे़ कुस्साहाॽओ तुम् लाम्लोबाहाॽ तेमान, ओमार, सपो, कनज, 16कोरह, गाताम हे़क्क्याङ् अमाले़क॥ ए़दोम लाजेॽओ एलिपजलाम् के़बोङ्बा तुम् लाम्लाम्लोबाहाॽ हाबा कन्हाॽरो॥ कन्हाॽ आदारे़ कुम्मे़न्छाॽसिरो॥
17एसाबे़ल्ले़ कुस्सा रुएलरे़ कुस्सा तुम् लाम्लोबाहाॽ
नहत, जेरह सम्मा हे़क्क्याङ् मिज्जा॥ ए़दोम लाजेॽओ रुएललाम् के़बोङ्बा तुम् लाम्लोबाहाॽ हाबा कन्हाॽरो॥ एसाबरे़ कुमेत् बासमतरे़ कुम्मे़न्छाॽहाॽ हाबा कन्हाॽ मे़वये़॥
18एसाबरे़ कुमेत् ओहोलिबामारे़ तुम् लाम्लोबा कुस्साहाॽ—
येउस, यालाम हे़क्क्याङ् कोरह॥ अनारे़ कुस्सा एसाबरे़ कुमेत् ओहोलिबारे़ कत्तुसिबा तुम् लाम्लोबाहाॽ हाबा कन्हाॽ मे़वये़॥
19एसाबे़ल्ले़ (ए़दोम फाॽआङ्ङाङ् कुसिङ् निःत्ते़त्) कुस्साहाॽ हाबा कन्हाॽरो, हे़क्क्याङ् खे़ङ्हाॽरे़ खुनिॽ तुम् लाम्लोबाहाॽ कङ्हाॽरो॥
सेइरले़ कुमुॽइदाङ्साहाॽ
(१ साप्मु १:३८-४२)
20खे़न् लाजेॽओ के़युङ्बा होरि सेइरले़ कुस्साहाॽ हाबा कन्हाॽरो—#१ साप्मु १:३८-४२
लोतान, सोबाल, सिबोन, अना 21दिसोन, एसेर नु दिसान॥ सेइररे़ कन् कुमुॽइदाङ्सा होरिहाॽ ए़दोम लाजेॽओ तुम् लाम्लोबा मे़वये़॥
22लोतानरे़ कुस्साहाॽ—
होरि नु हेमाम॥ तिम्नन् लोताने़ल्ले़ कुन्साॽ मे़न्छुमा वये़॥
23सोबालरे़ कुस्साहाॽ—
अल्बान, मानहत, एबाल, सपो नु ओनाम॥
24सिबोनरे़ कुस्साहाॽ—
अय्या नु अना॥ हाबा कन् अनाःल्ले़ए कुम्बा सिबोनरे़ कुअदङ्हाॽ कमुसि कत्तुल्ले़ एःक्सादे़न्नो मक्वा च्वाःत्तिल्ले़ वबुन्दाक् खोसुआङ् वये़॥
25अनारे़ कुस्साहाॽ—
दिसोन नु अनारे़ कुस्सा मे़न्छुमा ओहोलिबामा॥
26दिसोनरे़ कुस्साहाॽ—
हेम्दान, एस्बान, यित्रान नु करान॥
27एसेररे़ कुस्साहाॽ—
बिल्हान्, जाबान नु अकान॥
28दिसानरे़ कुस्सा—
ये़म्बित्छाहाॽ उज नु अरान॥
29कन्हाॽए होरिहाॽरे़ खुन्छिॽ तुम् लाम्लोबासिरो—
लोतान, सोबाल, सिबोन, अना, 30दिसोन, एसेर नु दिसान॥
सेइर लाजेॽओ खे़ङ्हाॽरे़ खुनिॽ थाःक्हाॽओ होरि तुम् लाम्लोबाहाॽ हाबा कन्हाॽरो॥
एदोमबा हाङ्हाॽ
(१ साप्मु १:४३-५४)
31इस्राइलबा आत्तिन् हाङ्हाॽरे़आङ् हाङ्युक् मे़न्जोःक्के तगि ए़दोम लाजेॽओ हाङ्युक् के़जोःक्पा हाङ्हाॽ हाबा कन्हाॽरो—#१ साप्मु १:४३-५४
32बओररे़ कुस्सा बेलारे़ एदोमओ हाङ्युक् चोगुआङ् वये़॥ खुने़ॽ कुहाङ्बाङ्भेॽइल्ले़ कुमिङ् दिन्हावा ने़स्से़॥
33बेलान् स्ये़आङ् खुने़ॽ कुले़क्वा बोज्राओ के़युङ्बा जेरहरे़ कुस्सा योबाबे़ल्ले़ हाङ् चोगु॥
34योबाबे़न् मासिङ्ङाङ् खुने़ॽ कुले़क्वा तेमानिहाॽरे़ खुनिॽ लाजेॽबा हुसामे़ल्ले़ हाङ्युक् चोगु॥
35हुसामे़न् मासिङ्ङाङ् बददरे़ कुस्सा हददे़न् हाङ् पोःक्खे़॥ खुने़ॽ मोआब लाजेॽओ मिद्यानिहाॽ नाःन्दुसि॥ खुने़ॽ कुये़क्यक्किल्ले़ कुमिङ् अवित ने़स्से़॥
36हददे़न् मासिङ्ङाङ् खुने़ॽ कुले़क्वा मास्रेकाओ के़युङ्बा सम्लारे़ हाङ्युक् चोगु॥
37सम्लाःन् मासिङ्ङाङ् युफ्रेतिस वहःङ्ङिल्ले़ कुयाओ के़ने़बा रहोबोतबा सौले़न् हाङ् पोःक्खे़॥
38सौले़न् मासिङ्ङाङ् अक्बोररे़ कुस्सा बाल-हानाने़न् हाङ् पोःक्खे़॥
39अक्बोररे़ कुस्सा बाल-हानाने़न् स्ये़आङ् खुने़ॽ कुले़क्वा हददरे़ हाङ्युक् चोगु॥ खे़ल्ले़ कुये़क्यक्किल्ले़ कुमिङ् पाउ ने़स्से़॥ खुने़ॽ कुमेःत्तिल्ले़ कुमिङ् महेतबेल वये़, खुने़ॽ मत्रेदरे़ कुस्सा, मे-जाहाबरे़ कुम्मे़न्छाॽमा वये़॥
40एसाबलाम् के़बोङ्बा कुधे़गेक् लाम्लाम्लोबाहाॽ खे़ङ्हाॽरे़ खुनिॽ मिङ् लाजेॽ नु खुन्छिॽ थाःक् कुइसिक् कन्हाॽएरो—
तिम्न, अल्वा, यतेत,
41ओहोलिबामा, एलाह, पिनोन,
42कनज, तेमान, मिब्सार,
43मग्दिएल नु इराम॥
खे़ङ्हाॽरे़ मे़नाःन्दुसिबा लाजेॽओ खे़ङ्हाॽरे़ खुनिॽ युङ्मादे़न् कुइसिक् एदोमबा कुधे़गेक् लाम्लाम्लोबाहाॽ हाबा कन्हाॽरो॥
कन्हाॽ के़रे़क् एसाबलाम्बा के़बोःम्बा के़धे़ॽबा एदोमिहाॽरे़ खुनिॽ सुधे़बा ताक्थे़बासिरो॥
Currently Selected:
तोलिङ्सोमु 36: LIF
Highlight
Share
Compare
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
