2 BaKorinti 7

1Nek anɔng, nek ikyɛng fɛ́ ba mi tak yit, ábaruneng, won ni in kusu yit ace yit ne kaakyi kuri ikyɛng fi i da ki beseng yit nrɔm nɛ kabik, won ni in sot yit bafɛ́ ajɛrɛ ayɛt ngma ikyɛng fi in da nye yit, ni in foos yit nnyim Adakunom.

ABulus nye iyɛ ikan

2Ki tarak yit ayɛ yin. Iyit mi dun yit akak yin awo, in mi wɔrɔk yit akak awo, in mi mɔɔt yit akak awo. 3Imi tsin cɛɛt anɔng nek in ki sɛ yin ni inɛn awo, nek in mi ki tak yin fok i se yin gung ni iyit, ke ayɛt iku ke ni kutset. 4Imi bi ite iyɛ ni yin makiyi, in tsot kugwɔm ni yin, in bi imen iyɛ, ngma ni mgbang fi in tsin sɔ yit, iyɛ hom woso tɛrɛk kyɛk.

5Izen fi in kin tsin ta yit na aMasedoniya, nrɔm yit ben makiyi. In tirik aze ifa, aza ifa, ba ki tsɛsɛk yit ni ifa amatse, nnyim ayɛt ayɛ yit. 6Awɛt Adakunom fɛ́ a rēn di barasa bayɔng fɛ́ ba mi tun iyɛ, ki barang yit mo agap ni kubɛ́ aTitus, 7ayet nek kubɛ́ wu kyɛk awo tit nek ibarang agap fi iyin ku nye yin ne. Iwu ki tak yit iyɛ ingash kudi hom fi i bɛ̀ yin, nɛ kafa kawe fi i nye yin nek ikyɛng fi i te, nɛ anyɛk fi i nye yin nek irun ama hom, anɔng e di barang ifeng makiyi. 8Ki kufumung hom ki beseng yin ayɛ, i di shesheng iyɛ hom awo, ibeseng iyɛ yin e yet ifi kizen gyet kyɛk, ki in fin ki beseng yin iyɛ, ibeseng iyɛ me yet ni in ki sak yin ni itirik yin sak na Adakunom. 9Wat yɔkɔnɔng, imi bɛ̀ kafa kakan, da nek ibeseng iyɛ yin awo, tit nek i nye yin kafa kawe me ni kuyiring ishesheng, Adakunom ma ra kutomong ne kafa kawe yin, a ki kurɔk yin mo sak ni wu, kɔn ibeseng bi di nɔ nate yit.

10Nek kafa kawe Adakunom, bɛ́s ni ishesheng fi i saas isheshek. Ibeseng iyɛ kuri iyɔng won anet ni kuyiring fok, akyɛ sak in nye anɔng ɛ, awɛt kafa kawe kuri kufɛ́ azatse saas iku. 11Kɔ di yin kuri atitup atsak fi ibeseng iyɛ Adakunom mi tes ayɛt yin. Ni iyɛ ingash, ni ishan inɛn yin, ni itonong kafa kawe yin, ni nnyim fi i tonong yin. Anɔng e ki sak yin ite iyɛ ni iyɛ ingash makiyi. I shim yin na ba tabak bayɔng fɛ́ ba dun. I mi tonong yin fok iyin se yin vit inɛn ayɛt ikyɛng fi i kin te awo. 12Ngma ni kufumung fi in kin ki jɛk yin ne, ku kin yet fok ba di tsɛt anet fɛ́ a nye inɛn ke ayɔng fɛ́ ba ku nye inɛn awo tit nek in ki tonong yin wɛshɛk fok Adakunom rēn fok iyin shim yin kukyang yit. 13Nek anɔng, in bang sɛ yit agap.

Agap yit di barang kyɛk awo, in bang sɛ yit itɛrɛk iyɛ nek ifeng aTitus, nek ngma yin i mi ku sak yin a sot gbagba. 14Nek ngma ikyɛng fi in ku tak naton yin, i di te yin nsum awo. Kyɔn tɛ ngma ikyɛng fi in ki tees yin yet atsak, kpaf anɔng fi iwu tse a sɛ ikyɛng fi in tak yit aTitus naton yin yet atsak. 15Ifeng fɛ́ aTitus bɛ̀ sak ni yin bang di barasa, ngma izen fɛ́ a yiring ni ifok ifɛ̀ fi i bɛ̀ yin, ne fi i ku shan yin ni nnyim ni inɔɔk iratek. 16Imi bɛ̀ itɛrɛk iyɛ, nek in bɛ̀ atitup ite iyɛ ni yin.

Currently Selected:

2 BaKorinti 7: IbaasNT

Highlight

Copy

Compare