2 BaKorinti 8

Inesek bafi ikuus

1Ábaruneng, in shim yit ni i rēn yin ikyɛng fi kunang Adakunom tsin nye na bafi ikuus fɛ́ ba se na aMasedoniya. 2Ngma ni imara fɛ́ ba di sɛ ice bá ayɛt makiyi, ba yet bakan kpɛt-kpɛt, ba woso nesek ni itɛrɛk iyɛ. 3Nek ba nesek kpaf na agap bà, ba nesek kashon ni kukyem ba, ni ishim iyɛ bà. 4Ba ra awon ni yit gyet awo, fok ni in ka ba won yit na ba sɛ awɛng bayɔng fɛ́ ba tsin nesek nek banet Adakunom. 5Awɛt ba nye ti ite iyɛ yit awo, tit ba tung nabak ace bà sak na aTisa ninyɛn, ama anɔng, ba da nɛ ba nabak ace bà sak ni yit ni kushim Adakunom. 6Na anɔng wu in di fɛ̀ yit na aTitus na a ya kashon ni itusung nnang ite iyɛ fi iwu na gang ikyɛng fɛ́ a mi tsang tumung ni yin. 7Awɛt fi i mi kɔrɔk yin kashon na kaakyi ikyɛng, ni inesek atsak, ni icɛɛt, ni irēn nkyɔrɔk, ni iyɛ ngash inesek, ni ishim yin sak ni iyit. Nek anɔng, te nyɛk yin da sot yin kashon bakak.

8Imi tsin ki te yin agbing awo, tit in shim in ki tonong yin iyɛ ngash fɛ́ bakak bɛ̀, nɔng i da sot fok ishim yin yet atitup e. 9Nek iyin rēn yin itek fɛ́ aTisa yit aYeso Kristi ki tonong yit, ngma ni kurúm fɛ́ a bɛ̀, a wosong iko nek iyin, a da bin sot akan, nɔng ayɛt ikan wu, iyin bin sot yin barum. 10Itabak fi imi da ki nɔk yin yet: Ni iyɛ ida, iyin ba i kin tumung yin inesek e kyɛk awo. I kin nesek yin nek ishim iyɛ yin. 11Nek anɔng, gang yin ikyɛng fi imang tumung yin kong. Nɔng i da bin tonong yin fok iyɛ ngash inesek fi ibɛ yin se kpaf na agap isɛ yin. 12Nek ki iyɛ ngash e di se, ikyɛng fɛ́ anet nɔk mi sɛ ku shan, Adakunom shim anet na a nɔɔk ikyɛng fi vit iwu ni ide awo.

13Da imi tsin fɛ̀ ye bakak na ba sot vit kunanang, na ba bin ki won yin iyin acet awo, tit ni se yin gbigbong. 14Ise yɛɛt ni i ka ba sɛs yin mo ayɛt ikyɛng fi i bɛ̀ yin yɔkɔnɔng, nɔng izen fi iba bi bɛ́ ba sɛ dot bá, ba bi ki sɛ yin mo bá. Na anɔng fi idi ki se yin gbigbong e. 15Kpaf ti i di se ni ijɛk ye,

“Anet fɛ́ a tusung hwiu,

vit ikyɛng fi i ku tuk mo.

Ayɔng fɛ́ a tusung gyegyet,

a bit ikikak awo.”#8:15 Ban di yin: Iwuruk 16:18.

ATitus na bafidang itomong wu

16In bɛ iyɛ ikan na Adakunom, fɛ́ a sak aTitus te nyɛk igbingding yin ti iyit shim yit. 17Ayet fok a shim ibɛ́ ni yin nek iyit ku sak yit mo awo tit nek ishim iyɛ wu. 18In da tom yit aruneng yit fɛ́ ba da bɛ́ gung nɛ aTitus, anet fɛ́ a mi nye iyerek na atu iya ntong nek ishara ifɛ̀ itek. 19Nkum anɔng kyɛk awo, bafi ikuus ku kasa na moon mbɔk ni in teng in ra yit kutomong itusung inesek ite iyɛ yeng fi i da bi ni itere sak na aTisa. Na anɔng wu in di ki tonong yit fok in bɛ yit iyɛ ingash in kaba sɛ yit mo. 20Iyit sok yit irèn iyɔng, kɔn akak bi sɛ ikyɛng icɛɛt naton kunang ite iyɛ ikan fɛ́ ba ki te yit mo. 21Ishim iyɛ yit yet fok ni in nye yit ikyɛng fi ida tseng gyat, da ashon Adakunom kyɛk awo, ngma ashon banet awe.

22Gung ni iba me, in da yirik aruneng yit akak, anet fi iyit mi di yit kukyem wu ni irèn dot-dot. Yɔkɔnɔng fɛ́ a mi ki sok yin ni iyɛ wu, a bi iyɛ ingash kutomong e makiyi. 23Rēn yin fok aTitus yet afidang itomong hom, a tsin ra kutomong fi imi ku sak mo nate yin. Baruneng yit bafaa bang yet batom fɛ́ bafi ikuus kasa, iba da nye ikyɛng fi i da bɛ́ ni iratek na Anet-Isheshek. 24Nek anɔng, nye yin ikyɛng fi i da tonong bafi ikuus ishim fi i bɛ́ yin, ni ikyɛng fi i da ki kusu yit nek itsot kugwɔm fi in mi nye yit akuce yin.

Currently Selected:

2 BaKorinti 8: IbaasNT

Highlight

Copy

Compare