2 BaKorinti 6
6
1Ayet kutomong fi in se yit ne gung ni iwu, in ra yit awon ni yin, i bi won yit itek fi i mi sɛ yin na Adakunom ni i sot abap awo. 2Nek iwu fɛ̀,
“Ni izen itonong angmishish hom,
in mi da fok,
in kin da sɛ mo
atuk isheshek.”
Di yin, izen isɛ angmishish e yeng; yɔkɔnɔng wu ayet izen isheshek e.
3Iyit di tes yit ikyɛng ikpas ni irèn akak awo, kɔn ba bi ki sɛ yit ni inɛn ni itomong yit. 4Na akaakyi irèn tɛ bafi itomong Adakunom, in mi sak yit ni iyɛ yit fok: Ke ayɛt mgbang, ke ayɛt izot, ke ayɛt iyɔm, 5ke ayɛt itosok, ke ayɛt inyang, ke ayɛt idoro nhwyɛ, ke ayɛt itomong, ke ayɛt avit nda natuk, ke ayɛt nzong. 6Ke ayɛt kusot kucɛ́l, ke ayɛt irēn, ayɛt akabɔk, ayɛt nggɔn ntek, ayɛt iras kutomong na Kabik aJɛrɛ, ayɛt atitup ishim; 7ayɛt kucɛɛt atsak, ayɛt kukyem Adakunom; nɛ ares itsom atsak ni ibɔk kuyak nɛ ni imen yit. 8Ayɛt iratek fɛ́ ba ki nesek yit ni ibyes fɛ́ ba ki nyes yit e, ayɛt mbɔɔs fɛ́ ba ki nyes yit e ni itere fɛ́ ba ki nyes yit e.
Ba mi ki sok yit tɛ bafi mbɔɔs, ngma na anɔng iyit nyeseng yit naton atsak yit; 9Banet ki rēn yit gyat, ngma na anɔng, ba ki sok yit tɛ bayɔng fɛ́ ba ka ba rēn awo, tɛ bayɔng fɛ́ ba tsin kus, di yin, in tsin ya yit kashon ni kutset, tɛ ba tsin ki nesek yit mgbang, ngma na anɔng ba mi ki fɛs yit awo. 10Tɛ bayɔng fɛ́ ba se ayit kafa kawe, ngma na anɔng in se yit ayit ifeng, tɛ bakan ngma na anɔng, in sas banet dot sosok barum, tɛ bayɔng fɛ́ ba se vit ikyɛng, ngma na anɔng in bɛ̀ yit kaakyi ikyɛng.
11Iyin banet aKorinti, iyit mi ki tak yin weshek, in mi ki tarak yin ayɛ yit. 12Vit iyit ni ikikak ifi irade sak ni yin, iyin ba i rayin dang tarak ayɛ yin sak ni yit. 13Ni ikyɛng fi imi ki nye yin ne, won ni in cɛɛt ni iyin ti nnon yin, tarak ayɛ yin sak ni yit.
I bi mon yin ice na bafi nhwyi awo
14I bi mon yin ice na bafi nhwyi awo. Nek akyɛ fi i mon kusot kutabat ni kusot anyas ɛ? Ke akyɛ fi imoon mgbey ni nhwyi yɛ? 15Akyɛ ifidang fɛ́ Anet-Isheshek bɛ̀ nɛ aShetan ɛ? Ke akyɛ de fi imoon bafi ikuus nɛ bafi nhwyi ɛ? 16Akyɛ fi i mon karɔ isosok Adakunom nɛ karɔ nabannom ɛ? Nek iyin ba in yet yit karɔ isosok Adakunom atset; ti Adakunom di fɛ̀,
“In da sot gung ni bá,
in da kat nate ba;
in da sot Adakunom bá,
wat iba da sot banet hom.”
17Nek anɔng, wuruk yin
nate bafi nhwyi,
Azɔk Bazɔk Adakunom fɛ̀,
kana kam yin ni iba,
i bi ra yin ikyɛng
fi i se gbiridik awo,
nɔng in da ki shan yin
ni mbɔk nfaa.
18Ama anɔng, imi da sot ada yin,
ni iyin sot yin nnon hom,
namatek na nanamang e,
aTisa wu a fɛrɛng anɔng.
Currently Selected:
2 BaKorinti 6: IbaasNT
Highlight
Copy
Compare
Share
Want to have your highlights saved across all your devices? Sign up or sign in
© 2019 The Nigeria Bible Translation Trust and © 2019 Wycliffe Bible Translators, Inc.
