EŻODU 22
22
Kapitlu 22
Il-liġi dwar il-proprjetà
1“Jekk il-ħalliel jinqabad huwa u jiftaħ, u jaħbtu għalih u joqtluh, ħadd ma jkun ħati ta’ ħajtu. 2Jekk jinqabad meta tkun diġà telgħet ix-xemx, min joqtlu jkun ħati ta’ ħajtu. Hu għandu jrodd, u, jekk ma jkollux biex, jinbiegħ biex ipatti għal dak li jkun seraq. 3Jekk il-bhima misruqa - gendus, ħmar, nagħġa - isibuha għandu, u tkun għadha ħajja, irodd id-doppju.
4“Jekk xi ħadd jagħmel ħsara fl-għalqa jew fil-qasam tad-dwieli ta’ xi ħaddieħor billi jitlaq il-merħla tiegħu tirgħa fl-għalqa ta’ ħaddieħor, irodd mill-aħjar wiċċ tal-għalqa jew tad-dwieli tiegħu.
5“Jekk jaqbad in-nar u jilħaq l-għolliq u jinħarqu l-qatet tal-qamħ jew iż-żara’, jew l-għalqa taqbad, ipatti għall-ħsara min ikun ta n-nar.
6“Jekk xi ħadd jagħti lil xi ħaddieħor flus jew ħwejjeġ biex iżommhomlu u jisirquhomlu minn daru, jekk isibu l-ħalliel, dan irodd id-doppju.#Lev 5,21-26. 7Jekk ma jsibux il-ħalliel, sid id-dar jinġieb quddiem Alla, biex juri jekk ikunx medd idejh fuq ħwejjeġ għajru.#Lev 5,14-16; Num 5,5-8. 8Għal kull ħsara li ssir lil gendus, ħmar, nagħġa, libsa, jew kull ħaġa oħra mitlufa, li minnha xi ħadd jgħid: ‘Din tiegħi’, il-kwistjoni tagħhom it-tnejn iressquha quddiem Alla; lil min Alla jagħtih il-ħtija, irodd id-doppju lil għajru.
9“Jekk xi ħadd jagħti lil xi ħaddieħor ħmar, gendus, nagħġa jew xi bhima oħra, biex iżommhielu u din tmut, tweġġa’ jew jaħtfuha bla ma ħadd ikun ra xejn, jaħilfu t-tnejn quddiem il-Mulej; 10tinqata’ bejniethom b’ħalfa quddiem il-Mulej li ma middx idu fuq ħwejjeġ sieħbu; u s-sid joqgħod fuq il-ġurament u l-ieħor ma jrodd xejn. 11Jekk jisirquha mingħandu, irodd lil sidha. 12Jekk imbagħad iqattgħuha l-bhejjem, u jġibha b’xhieda, ma jrodd xejn għall-bhima mqattgħa bċejjeċ.#Ġen 31,29.
13“Jekk xi ħadd jissellef bhima mingħand xi ħadd, u din tweġġa’ jew tmut, u sidha ma jkunx magħha, għandu jrodd daqs kemm tiswa. 14Jekk sidha jkun magħha, ma jħallas xejn. Jekk ikun mikri jħallas mill-paga tiegħu.
Il-liġi dwar il-persuni
15“Jekk xi raġel iqarraq b’xebba li ma tkunx imgħarrsa, u jorqod magħha, iħallas għaliha, u jeħodha b’martu.#Dt 22,28-29. 16Jekk missierha ma jkunx irid jagħtihielu, iħallas daqs kemm tiswa d-dota ta’ xebba#22,16: Id-dota ta’ xebba: dan hu l-moħar li r-raġel kellu jħallas biex jiżżewweġ xebba, qisu qiegħed jixtriha. Il-mara kienet meqjusa proprjetà ta’ żewġha; ara Eż 20,17. Dt 5,21. Il-vjolazzjoni ta’ xebba kienet tnaqqsilha l-valur tagħha..
17“Saħħara, tħallihiex tgħix.#Lev 19,26; 20,6; Dt 18,9-12.
18“Kull min jorqod ma’ bhima, ikun ħaqqu l-mewt.#Lev 18,23; 20,15-16; Dt 27,21.
19“Kull min joffri sagrifiċċji lill-allat, ħlief lill-Mulej, ikun meqrud.#Num 25,1-5; Dt 13; 17,2-7.
20“La taħqarx il-barrani, u la tgħakksux, għax intom ukoll kontu barranin fl-art tal-Eġittu.#Eż 23,9; Lev 19,33-34; Dt 10,18-19; 24,17-18; 27,19; Żak 7,10. #Eż 12,48; Dt 27,19; S 146,9; Is 1,17. 21La taħqrux l-armla jew l-iltim,#Dt 24,21. 22għax jekk taħqruhom, u huma jsejħuli, jien żgur nismagħha l-għajta tagħhom; 23u l-qilla tiegħi tixgħel, neqridkom bix-xabla; u n-nisa tagħkom jormlu u wliedkom jisfaw iltiema.
24“Jekk inti tislef lil xi fqir mill-poplu tiegħi, iġġibx ruħek miegħu bħal wieħed sellief, u teħodlux imgħax.#Lev 25,35-38; Dt 23,20-21; 24,10-13; Eżek 18,7-8. 25Jekk lil għajrek teħodlu l-libsa tiegħu b’rahan, agħtihielu lura qabel inżul ix-xemx; 26għax hu dik biss għandu biex jitgħatta, dik biss l-għata ta’ ġismu; inkella fiex tridu jorqod? Għax jekk isejjaħli, jiena nisimgħu, għax jien ħanin.
27“La tidgħix b’Alla u anqas ma għandek tisħet lill-kap ta’ niesek.#Koħ 10,20; Atti 23,5.
28“La tiddawwarx biex toffri mill-ħsad u l-għasir tiegħek.#Eż 13,11-16; 23,16; Dt 26,1-11.
“L-ewwel fost uliedek int tagħtih lili.
29L-istess tagħmel mill-baqar u min-nagħaġ tiegħek; il-ferħ żommu sebat ijiem ma’ ommu, iżda fit-tmien jum tagħtih lili.#Eż 13,2; 34,19; Lev 22,27; Dt 15,19.
30“Intom tkunu nies ikkonsagrati lili, la tiklux il-laħam ta’ bhima mqattgħa fir-raba’; imma ixħtuh lill-klieb.#Eż 19,6; Lev 11,44; 17,15-16; 22,8; Dt 14,21.
Currently Selected:
EŻODU 22: MB20
Highlight
Share
Copy
Want to have your highlights saved across all your devices? Sign up or sign in
Maltese DC Bible © Malta Bible Society, 2020.