DEWTERONOMJU 10
10
Kapitlu 10
It-twavel tal-liġi għat-tieni darba
1“Imbagħad dakinhar qalli l-Mulej: ‘Aqta’ żewġ twavel tal-ġebel bħal ta’ qabel, u itla’ ħdejja fuq il-muntanja, u agħmel ukoll arka tal-injam.#Eż 34,1; Dt 31,26. #Dt 6,2. 2U jien nikteb fuq it-twavel il-kliem, li kien fuq it-twavel ta’ qabel, li int kissirt, u qegħedhom fl-arka.’
3“U jien għamilt arka tal-injam tal-gażżi u fassalt żewġ twavel tal-ġebel bħal ta’ qabel, u tlajt fuq il-muntanja biż-żewġ twavel f’idejja.#Eż 25,10; 34,4. 4U l-Mulej kiteb fuq iż-żewġ twavel, bħalma kien kiteb qabel, l-għaxar kelmiet li l-Mulej kien qalilkom fuq il-muntanja minn ġon-nar f’jum il-ġemgħa, u l-Mulej tahom lili.#Eż 20,1-17; 34,28. 5U dort u nżilt minn fuq il-muntanja, u qegħedt it-twavel fl-arka li kont għamilt fejn baqgħu hemm sal-lum, skont ma ordna l-Mulej.#Eż 40,20; 1 Slat 8,9.
6“Ulied Iżrael telqu minn Berot-bene-ġagħkan għal Mosera; hemm miet Aron u difnuh; u sar qassis floku ibnu Elgħażar.#Num 33,31-38. 7Minn hemm telqu għal Gudgoda u minn Gudgoda għal Ġotbata, art tal-ilma ġieri.
8“F’dan iż-żmien il-Mulej għażel lit-tribù ta’ Levi biex iġorru l-arka tal-patt tal-Mulej, joqogħdu quddiem il-Mulej u jaqduh, u jbierku b’ismu, kif għadhom sal-lum.#Num 3,6; 6,23-27; 16,9. 9Għalhekk it-tribù ta’ Levi ma kellux sehem fil-wirt ma’ ħutu; il-Mulej hu l-wirt tiegħu, bħalma qallu l-Mulej Alla tiegħek.#Num 18,20. 10U jien bqajt fuq il-muntanja bħal qabel, erbgħin jum u erbgħin lejl; u l-Mulej semagħni dik id-darba wkoll, u ma ġiex il-Mulej biex jeqridkom. 11U l-Mulej qalli: ‘Qum u mur, u imxi quddiem il-poplu ħa jidħlu u jieħdu l-art f’idejhom, li jien ħlift li nagħtiha lilhom.’#Eż 32,34; 34,1.
Xi jrid Alla minn Iżrael
12“U issa, Iżrael, x’inhu jitlob Alla minnek, jekk mhux li tibża’ mill-Mulej, Alla tiegħek; li timxi fi triqatu kollha; li tħobbu u li sservi lill-Mulej, Alla tiegħek, b’qalbek kollha u b’ruħek kollha; 13li tħares il-kmandamenti tal-Mulej u l-liġijiet tiegħu, li jien illum qiegħed nordnalek għall-ġid tiegħek?
14“Ara! Tal-Mulej, Alla tiegħek, huma s-sema u s-sema tas-smewwiet, u l-art u kulma fiha.#Eż 19,5; Neħ 9,6; S 24,1-2. 15Imma lejn missirijietek inġibed il-Mulej, u ħabbhom u għażel lil nisilhom warajhom, lilkom minn fost il-popli kollha, bħalma intom illum.#Dt 7,6-8. 16Aħtnu mela qlubkom, u la twebbsux raskom aktar.#Dt 9,13; 30,6; Ġer 4,4. 17Għax il-Mulej, Alla tagħkom, hu Alla fuq l-allat, u sid fuq is-sidien, Alla kbir, qawwi u tal-biża’, li ma jħarisx lejn l-uċuħ u ma jiħux rigali.#2 Kron 19,7; Ġob 34,19; Għerf 6,7; Atti 10,34; Rum 2,11; Gal 2,6; Apk 17,14; 19,16. 18Jagħmel il-ġustizzja mal-iltim u mal-armla, u jħobb il-barrani u jagħtih ħobż u lbies.#Sir 35,11-16. 19Ħobbu l-barrani, għax intom barranin kontu fl-art tal-Eġittu.#Eż 22,21; 23,9; Lev 19,34. 20Mill-Mulej, Alla tiegħek, għandek tibża’, lilu għandek isservi, miegħu għandek torbot qalbek, u b’ismu għandek taħlef.#Dt 6,13; Mt 4,10; Lq 4,8. 21Hu l-foħrija tiegħek; hu Alla tiegħek, li għamel miegħek dawk l-opri kbar u tal-biża’, li rajt b’għajnejk. 22Sebgħin ruħ kienu missirijietek meta niżlu l-Eġittu, u issa l-Mulej, Alla tiegħek, kattrek bħall-kwiekeb tas-sema.#Ġen 46,27; Eż 1,5; Atti 7,14.
Currently Selected:
DEWTERONOMJU 10: MB20
Highlight
Share
Copy
Want to have your highlights saved across all your devices? Sign up or sign in
Maltese DC Bible © Malta Bible Society, 2020.