DEWTERONOMJU 11
11
Kapitlu 11
L-imħabba ta’ Alla u l-ħarsien tal-kmandamenti
1“Ħobb lill-Mulej, Alla tiegħek, u ħares l-ordnijiet tiegħu, il-liġijiet tiegħu, id-digrieti tiegħu u l-preċetti tiegħu għal dejjem. 2U intom tagħrfu llum - mhux uliedkom li la jafu u lanqas raw it-twiddib tal-Mulej, Alla tiegħek - il-kobor tiegħu, il-qawwa ta’ idu, u driegħu merfugħ; 3u s-sinjali tiegħu, l-opri tiegħu li għamel f’nofs l-Eġittu lill-Fargħun, is-sultan tal-Eġittu, u lil artu kollha;#Eż 6,22; 7,15; S 78,42-51. 4u li għamel lill-eżerċtu tal-Eġittu, liż-żwiemel u l-karrijiet tiegħu, kif il-Mulej qaleb għal fuqhom l-ilma tal-Baħar tal-Qasab, huma u kienu jiġru warajk, u qeridhom il-Mulej sal-lum.#Eż 14,26-28; 15,9; Num 16; S 78,53; 106,11. 5U x’għamel magħkom fid-deżert sakemm wasaltu hawnhekk. 6U tagħrfu x’għamel lil Datan u lil Abiram, ulied Elijab bin Ruben; kif infetħet l-art u belgħethom, lilhom u l-familji bit-tined tagħhom, u b’dawk kollha li żammew magħhom minn fost Iżrael kollu.#Num 16,31-33. 7Intom rajtu b’għajnejkom l-opri kbar kollha li għamel il-Mulej.
8“Ħarsu kulma nordnalkom jien illum, sabiex titqawwew, u tidħlu u tieħdu f’idejkom l-art li se tgħaddu għaliha biex tirbħuha. 9Biex iddumu żmien twil fl-art li l-Mulej ħalef li jagħti lil missirijietkom u ’l nisilhom, art tnixxi ħalib u għasel. 10L-art li dieħel fiha biex teħodha f’idejk mhijiex bħall-art tal-Eġittu, mnejn ħriġtu, fejn kont tiżra’ ż-żerriegħa u ssaqqiha b’riġlek, bħal ġnien tal-ħxejjex;#Dt 28,3-5. 11l-art li int se tgħaddi għaliha biex teħodha f’idejk hi art miżgħuda bil-muntanji u l-widien; art li tixrob l-ilma tax-xita mis-smewwiet;#Dt 8,7-10; Neħ 9,25. 12art li jieħu ħsiebha l-Mulej, Alla tiegħek, b’għajnejh dejjem fuqha mill-ewwel sal-aħħar tas-sena.
13“Jekk intom tisimgħu sewwa l-ordnijiet tiegħi, li qiegħed nagħtikom illum, u tħobbu lill-Mulej, Alla tagħkom, u sservuh b’qalbkom kollha u b’ruħkom kollha,#Lev 26,3-13; Dt 10,12; Ġer 5,24; Ġoel 2,19. 14jien nagħtikom fi żmienha x-xita għal artkom, ix-xita bikrija u x-xita mwaħħra#11,14: Ix-xita bikrija u x-xitwa mwaħħra: l-ewwel xita f’Ottubru/Novembru u l-aħħar waħda f’Marzu/April, żmien iż-żrigħ u żmien il-ħsad. u tiġbor il-qmuħ tiegħek, l-inbid tiegħek u ż-żejt tiegħek. 15Nagħtik il-ħdura tar-raba’ għall-bhejjem tiegħek, u tiekol u tixba’.#S 104,14.
16“Qis li qalbek ma titqarraqx, u tmorru sservu allat oħra u tinxteħtu wiċċkom fl-art quddiemhom,#Dt 4,25-26; 6,14. 17inkella tixgħel il-qilla tal-Mulej kontrikom, u jagħlaq is-smewwiet, u ma jkunx hemm xita, u l-art ma tagħtix il-frott tagħha, u tinqerdu f’qasir żmien minn wiċċ din l-art għammiela li l-Mulej se jagħtikom.
18“Qiegħdu dawn il-kelmiet tiegħi f’qalbkom u f’moħħkom; orbtuhom b’sinjali ma’ idejkom u dendluhom bejn għajnejkom.#Dt 6,6-9. #Mt 23,5. 19Għallmuhom lil uliedkom u tkellmu fuqhom meta tkun mistrieħ f’darek u miexi fit-triq; meta timtedd u meta tqum. 20Iktibhom fuq il-ġnub ta’ bwieb darek u fuq il-bibien. 21U hekk jitkattru jiemek u jiem uliedek fuq l-art, li l-Mulej ħalef li jagħti lil missirijietek; jitkattru bħal jiem is-sema fuq l-art.#Neħ 9,29; Prov 3,2; Ġer 33,25.
22“Jekk tħarsu sewwa dawn il-kmandamenti kollha li qiegħed nagħtikom illum u tagħmluhom, u tħobbu lill-Mulej, Alla tagħkom, u timxu fi triqatu kollha, u torbtu qalbkom miegħu, 23ikeċċi l-Mulej dawn il-ġnus kollha minn quddiemkom u tegħlbu ġnus ikbar u aqwa minnkom.#Num 31; Dt 4,38; 7,1; 9,1. 24Kull fejn jirfes qiegħ riġlejkom, tagħkom ikun, mid-deżert sal-Libanu, mix-xmara l-kbira, ix-xmara tal-Ewfrat, sal-Baħar tal-Punent#11,24: Sal-baħar tal-Punent: il-baħar tal-Mediterran. tinfirex il-fruntiera tiegħek.#Eż 23,31; Ġoż 1,3-5. 25Ebda bniedem ma jiqaflek. Il-Mulej, Alla tagħkom, jitfa’ l-biża’ u t-twerwir tagħkom fuq wiċċ l-art kollha, li fuqha tirfsu, bħalma wegħedkom.
Barka jew saħta
26“Araw, jiena llum inqiegħed quddiemkom barka u saħta;#Dt 27—28; 30,15-20. 27il-barka, jekk tħarsu l-kmandamenti tal-Mulej, Alla tagħkom, li jiena llum qiegħed nordnalkom; 28u s-saħta, jekk ma tħarsux il-kmandamenti tal-Mulej, Alla tagħkom, imma toħorġu mit-triq li jiena llum qiegħed nordnalkom, biex timxu wara allat oħra li ma kontux tafu bihom. 29Malli l-Mulej, Alla tiegħek, idaħħlek fl-art li inti sejjer fiha biex teħodha f’idejk, int tagħti l-barka minn fuq il-muntanja Gariżim, u s-saħta minn fuq il-muntanja Għebal#11,29: Int tagħti l-barka minn fuq il-muntanja Gariżim, u s-saħta minn fuq il-muntanja Għebal: ara Dt 27 u 28. Dawn kienu żewġ muntanji biswit xulxin, b’wita wiesgħa bejniethom, fis-Samarija..#Dt 27,12-13; Ġoż 8,33. 30- Dawn jinsabu n-naħa l-oħra tal-Ġordan mat-triq ta’ nżul ix-xemx, fl-art tal-Kangħanin, li jgħammru fl-Għaraba, biswit Gilgal, ħdejn il-ballut ta’ Mori. -
31“U issa intom se taqsmu l-Ġordan biex tmorru tieħdu f’idejkom l-art li l-Mulej, Alla tagħkom, se jagħtikom, u tirbħuha u tgħammru fiha.#Ġoż 4,19. 32Qisu li tagħmlu l-liġijiet, u d-digrieti li jien qiegħed inqegħdilkom illum quddiemkom.
Currently Selected:
DEWTERONOMJU 11: MB20
Highlight
Share
Copy
Want to have your highlights saved across all your devices? Sign up or sign in
Maltese DC Bible © Malta Bible Society, 2020.