DEWTERONOMJU 9
9
Kapitlu 9
Ħarsa lejn l-imgħoddi
1“Isma’, o Iżrael, illum int se taqsam il-Ġordan biex tirbaħ ġnus ikbar u aqwa minnek, bliet kbar bi swar m’ogħla s-smewwiet;#Dt 1,28; 4,38. 2ġnus kbar u nies twal; ulied Għanak; int taf x’inhuma u int smajt min jgħid minnhom: ‘Min jista’ jiqfilhom ’l ulied Għanak?’#Num 13,33; Dt 1,28.
3“Kun af illum, mela, li l-Mulej, Alla tiegħek, hu li se jgħaddi quddiemek bħal nar li jibla’; hu li se jeqridhom; hu li se jrażżanhom quddiemek, u int taqlagħhom ’il barra u teqridhom minnufih, bħalma qallek il-Mulej.#Eż 23,27; Dt 7,22; 31,3; Ġoż 3,3-4. 4Meta jaqlagħhom ’il barra minn quddiemek il-Mulej, Alla tiegħek, tgħidx f’qalbek: ‘Għax kien jistħoqqli ġiebni l-Mulej biex nieħu f’idejja din l-art,’ għax hu minħabba ħżunithom li l-Mulej ħarbat dawn il-ġnus quddiemek.#Dt 8,17; 18,12; 29,4; Mħ 7,2; Neħ 9,21. 5Mhux għax jistħoqqlok, jew għas-sewwa ta’ qalbek, se tidħol int biex tieħu f’idejk l-art tagħhom, għax minħabba l-ħażen ta’ dawn il-ġnus il-Mulej, Alla tiegħek, se jħarbathom quddiemek, u jtemm il-wegħda li ħalef il-Mulej lil missirijietek: lil Abraham, lil Iżakk u lil Ġakobb.
L-infedeltà ta’ Iżrael fl-imgħoddi
6“Kun af li mhux għax jistħoqqlok li l-Mulej, Alla tiegħek, se jagħtik din l-art tajba biex teħodha f’idejk, għax int poplu ta’ ras iebsa.#Dt 8,17; Ef 2,7-9; Tit 3,5. 7Ftakar u tinsiex kemm inkurlajt lill-Mulej, Alla tiegħek, fid-deżert; minn dakinhar li ħriġt mill-art tal-Eġittu sakemm wasaltu hawn, dejjem ħadtuha kontra l-Mulej.#Eż 32. #Eż 14,11; Num 14,11; Dt 31,27. 8F’Ħoreb inkurlajtu lill-Mulej, u l-Mulej għadab għalikom li kien se jeqridkom.#S 106,19. 9Meta jien tlajt fuq il-muntanja biex nieħu t-twavel tal-ġebel, it-twavel tal-patt, li l-Mulej għamel magħkom, bqajt fuq il-muntanja erbgħin jum u erbgħin lejl, bla ma niekol ħobż u bla ma nixrob ilma;#Eż 24,12-18; 34,28. 10u l-Mulej tani ż-żewġ twavel tal-ġebel, miktuba b’saba’ Alla; fuqhom kien hemm il-kliem kollu li l-Mulej qalilkom minn fuq il-muntanja minn ġon-nar f’jum il-ġemgħa.#Eż 31,18; Dt 5,2-22.
11“U ġara li fi tmiem l-erbgħin jum u l-erbgħin lejl, il-Mulej tani ż-żewġ twavel tal-ġebel, it-twavel tal-patt. 12U l-Mulej qalli: ‘Qum u fittex inżel minn hawn fuq, għax il-poplu tiegħek, li int ħriġtu mill-Eġittu, tħassar; diġà tbiegħdu mit-triq li jien ordnajtilhom; għamlu xbieha tal-metall imdewweb.’
13“U l-Mulej kellimni u qalli: ‘Jien ħarist lejn dan il-poplu u rajt li hu poplu rasu iebsa. 14Ħallini ħa neqirdu u nħassar ismu minn taħt is-smewwiet u nagħmel minnek poplu b’saħħtu u akbar minnhom.’#Dt 9,6; 31,27; 2 Slat 17,14; Ġer 7,26; 17,23; 19,15; Bar 2,30.
15“Imbagħad jien dort u nżilt minn fuq il-muntanja, hi u tħeġġeġ bin-nar, u t-twavel tal-patt f’idejja t-tnejn. 16Jien ħarist, u hemm intom, dnibtu kontra Alla tagħkom; għamiltu għoġol tal-metall imdewweb, u malajr tbegħedtu mit-triq li ordnalkom il-Mulej. 17Imbagħad qbadt iż-żewġ twavel, u waddabthom minn idejja t-tnejn, u kissirthom quddiem għajnejkom. 18U nxtħett fl-art quddiem il-Mulej, bħall-ewwel darba, għal erbgħin jum u erbgħin lejl, bla ma niekol ħobż u bla ma nixrob ilma, minħabba d-dnubiet kollha li dnibtu meta għamiltu l-ħażen f’għajnejn il-Mulej, biex tinkurlawh.#Eż 34,28. 19Għax jien twerwirt kif rajt il-korla u l-qilla li bihom xegħel il-Mulej kontrikom, li ried jeqridkom. Din id-darba wkoll semagħni l-Mulej.#Dt 10,10; Lhud 12,21. 20Inkorla ħafna wkoll kontra Aron il-Mulej, li ried jeqirdu; imma jien tlabt għal Aron ukoll dakinhar. 21U d-dnub li għamiltu, l-għoġol, qbadtu u ħraqtu fin-nar, u sħaqtu tajjeb, u għamiltu tħin sakemm sar trab irqiq, u t-trab tiegħu rmejtu fil-wied nieżel mill-muntanja.
22“F’Tabgħera u f’Massa u f’Kibrot-ħattawa wkoll inkurlajtu ’l-Mulej.#Eż 17,1-7; Num 11,1-34; 20,1-13; Dt 1,25-40. 23U meta l-Mulej riedkom titilqu minn Kades-barnigħa u qalilkom: ‘Qumu u itilgħu, ħudu f’idejkom l-art li jien tajtkom,’ intom merejtu l-kelma tal-Mulej, Alla tagħkom, u ma fdajtuhx, u ma smajtux minn kliemu.#Num 14,1-4; S 106,24-25. 24Kontu dejjem stinati mal-Mulej, sa minn mindu għaraftkom.
25“U nxtħett fl-art quddiem il-Mulej; għal erbgħin jum u erbgħin lejl domt mitfugħ fl-art, għax il-Mulej kien qal li kien ser jeqridkom.#Eż 32,11-14. 26U tlabt lill-Mulej, u għedtlu: “Sidi, Mulej, teqridx il-poplu tiegħek u l-wirt tiegħek, li int fdejtu bil-kobor tiegħek; li int ħriġt mill-Eġittu bil-qawwa ta’ driegħek. 27Ftakar fil-qaddejja tiegħek, f’Abraham, f’Iżakk u f’Ġakobb; tħarisx lejn ir-ras iebsa ta’ dan il-poplu, lejn ħżunitu u lejn ħtijietu; 28biex ma jgħidux fl-art li ħriġtna minnha: ‘Għax ma setax il-Mulej idaħħalhom fl-art li qalilhom, u għax jobgħodhom ħariġhom biex joqtolhom fid-deżert.’#Num 14,14-16. 29Imma huma għadhom il-poplu tiegħek, il-wirt tiegħek, li int ħriġtu bil-kobor tal-qawwa tiegħek, u bi driegħek merfugħ.#Eż 6,6-7; Dt 4,20.
Currently Selected:
DEWTERONOMJU 9: MB20
Highlight
Share
Copy
Want to have your highlights saved across all your devices? Sign up or sign in
Maltese DC Bible © Malta Bible Society, 2020.