Rimluğo 13
13
Efi loxol kalaluğbalt'oğoy əyitə běğanan
1Efi loxol kalaluğbalt'oğoy əyitə běğanan, şot'o görə ki, Buxačuğon nu çureśiyniy şot'oğo me ext'iyərə tene tadoy, Buxačuğon çureśe pine şot'oğon həysə kalaluğbsa. 2Şot'o görəl, ěqeśi efi loxol kalo laxit'oğo saksun çuresun Buxačuğoy əyitəxun c'eysun upsune. Metər balt'ay əşləl Buxačuğon İçin běği bakale. 3Ala arśit'oğoxun şaat' əşur biq'alt'oğon təə, pis əşur biq'alt'oğone q'ı̌bsa. Şot'oğoy běš q'ı̌ye boş tarapsun tenan çuresasa, şaat' əşur biq'anan, t'e vədə içoğoy piyesal ak'eğalnan. 4Buxačuğoy kiin oq'at'un əşpsa t'e vəzifinə bakalt'oğon, içoğoy əşlin s'iyal və̌ynak' şaat'luğbsune. Ama pis əşurxoy q'oşt'annan taysasa - q'ı̌banan şot'oğoxun! Axıri bot'ala q'ılınc k'inək'e şot'oğo tadeśi ext'iyər, Buxačuğoy s'iyen pist'oğoy cazina tadaloroxe şorox. 5Ama saycə caza zapsunaxun q'ǐbi təə, və̌n və̌x k'ə coğab tadalnan pi t'e ala arśit'oğo bač'an k'os'p'alanan. 6Verginal hat'etər tenan tast'a və̌n: Buxačuğoy kiin oq'a əşp'alt'oğonan tast'a və̌n t'e vergina, üşe-ğena nu běği Buxačuğon içoğo tapşurbi əşlət'un bex p'ap'espsa pinan tast'a. 7Şot'o görəl, vergi tadalanansa tadanan, təngə c'ovakest'alanansa c'ovakest'anan, hörmətp'alanansa hörmətp'anan, şinesa turel hayzalanansa hayzanan.
Vi ǐšat'u hun va çureğala k'inək' çureki
8T'etər banan ki, şuk'k'ala boşlu ma mandanan, barta efi arane saycə "mat'ine gele çuresa" exlətq'an baki, şot'o görə ki, izi ǐšat'u çureğalt'in Buxačuğoy laxi k'anuna tame əməlbi baksa. 9Buxačuğon laxi k'anunen yax k'ə nex? "Əxlagsuzluğmaba, besmaba, başmaq'a, q'ert'ay hik'k'ala tamaxmaba" #13:9 C'eys. 20:13-15,17; K'an. 5:17-19,21 - ketər tene? Mot'oğoyal, mandi pit'oğoyal bito "vi ǐšat'u hun va çureğala k'inək' çureki" #13:9 Mat'. 19:19; 22:39; Mrk'. 12:31,33; Luk'. 10:27; Gal. 5:14; İak'. 2:8 əyiti boş bune. 10Çuresun bakit'uxun oşa amdarxon suna pisluğ bot'un? Təə! Şot'o görəl k'anuna tam əməlbsun suna çuresun upsune.
Nep'ax ma mandanan, male mande
11Və̌nal avanan ki, həysə hetər vədə - nep'ax ma mandanan, şot'o görə ki, beşi çark'eğala ği ǐšabakene, yan İsusa věbaki Şot'ay Çark'est'al baksuna q'abulbi ğina běğat'an həysə t'e ği yax lap ı̌šane. 12Mone, üşe c'ovaneki, ene kəyebaksa. Ekinan bayinq'un əşurxo t'ǒǒx boseri işiğa biq'es bakala əşurxoynak' beşi ə̌murxo q'ašamk'en. 13Barta beşi tağala yaq' ğene işiğen tağala yaq'q'an baki, barta yast'a kalanut mərəkəyxo taśi ǔği bist'un, pis yaq'en taśi biyabur əşur biq'sun, t'iyə̌mint'ay paxılluğa zapi sunay tura zapsun maq'an baki. 14Beşi Q'ončux bakala İsus Xrist'osi s'iya görə və̌x taşanan, Şot'o bəc'üreśi k'inək' bakanan. Efi günaxkər bədənen çureğalt'oğo bi şot'ay ǰomon ma takinan!
Currently Selected:
Rimluğo 13: udi
Highlight
Copy
Compare
Share
Want to have your highlights saved across all your devices? Sign up or sign in
© Translation Services International Ltd.