Rimluğo 12
12
Buxačuğoy uk'ala k'inək' sa amdar bakanan
1Ay xunçi-viçimux, isə ki Buxačuğon yaxun İz ük' bok'ospsuna kamtenebsa, xoyinšezbsa, və̌nal efi bədənə Şot'o q'urbanbakanan - yəşəyinşala, Şot'ay s'iyen bakala, Şot'ay ük'el bask'ala sa q'urban. Saycə metər binan "Buxačuğo çalxi Şot'o bulez k'os'psa" pes bakon. 2T'etər ma banan ki, me günaxkər dünyəne c'ovakala q'aydoğon və̌x badalbesq'an baki, barta Buxačuxq'an baki və̌x badalbalo. Bartanan Şot'in efi pulmoğo qaypeq'an ki, və̌nal badalbaki Şot'in və̌st'a aksun çureğalt'oğo q'amişakes bakanan, yəni Şot'ay piyes şaat' ak'eśes, Şot'ay ük'el bask'i noxsansuz bakes bakanan.
3Buxačuğon za İzi şaat'luğa ak'est'i ap'ost'ol bakseynak' c'ək'p'est'e. İsə mone, və̌x bitova tək-tək nexzu: geleyal göynuxun ma takinan, Buxačuğon efi ük'e laxi věluğ heq'ədəresa, t'e věluğa görə efi ǰomo ə̌mbanan. 4Hetər ki bədən uk'at'an cöy-cöy hissoğoy sagala gireśi əşpsunayan nex, hər hissinəl izi biq'ala əşe bu, mot'o avanan, 5Xrist'osi bel gireśi Şot'ay laxi yaq'en taysunal haketər. Beşi hərt'ay izi əşe bu, ama Xrist'osi bel giresunen yax sa bədəne bsa, cöy-cöy ext'at'an isə t'e bədənə əşp'est'ala sunaxun ğaç̌ hissooxyan yan. #12:4-5 1 K'or. 12:12 6Buxačuğon İzi şaat'luğa ak'est'i yax hərt'u sa başarağe tade, şot'o görəl şin k'ə başarebsasa şot'oq'an bi: Buxačuğoy upsun çureğalt'oğo amdarxo p'ap'espseynak'en c'ək'eśesa, Buxačuğon vi ük'e laxi t'e věluğen va me əşlə hetər biq'esest'asa, hat'etərəl ba; 7amdarxoy q'ulluğa çurpsunan şaat' başarbsasa - çurpa; şaat' zombesen baksasa - zomba; 8şaat' yaq' ak'est'esen baksa - ak'est'a; xeyirxax əşur biq'sunast'a şaat'nusa - kulqay baka; kalaluğbsunast'a şaat'nusa - qoş ma çurpa; bitot'aynak' vi ük'e boksasa - amdarxoy t'arnu p'ap'es baksuna görə mǔqbaka. #12:6-8 1 K'or. 12:4-11
Barta və̌st'a bakala çuresun ük'exunq'an hari
9Barta və̌st'a bakala çuresun ük'exunq'an hari. Pisluğa sal və̌x ǐša bist'a barmatanan, şaat'luği bač'anexun t'it'anan. 10Suna viçen viçə çureğala k'inək' çurekinan, suna bakala hörmətə kammabanan.
11 Q'ončuğoy s'iyen bakala əşləxun mandak' ma bakanan, t'e əşlə bex p'ap'espseynak' efi elmoğo laxanan. 12Mǔqbakanan, axıri beşi umuda eğala gayax bu; çətinluğxo portp'anan, afırıpsunaxunal kul ma haq'anan.
13Buxačuğon c'ək'p'i İzi biyorox t'arnu baft'at'an şot'oğo kul boxodanan, bartanan efi ç̌omxoval həmişə qayq'an baki. 14Və̌x pul tadi işiğ nu tadalt'oğo xeyir-bərəkət tadanan, bartanan q'arğişi təə, xeyir-bərəkəti q'ončuxq'at'un baki. #12:14 Mat'. 5:44; Luk'. 6:27-28 15Mǔqbakalt'uxun sagala və̌nal mǔqbakanan, ǒnek'alt'uxun sagala və̌nal ǒnepanan. 16Sunaxun ser bakanan. Şuk'k'ali loxol alaxun oq'a ma běğanan, kalat'uxun kala, mis'ik't'uxun mis'ik' bakanan, və̌x bitot'uxun haq'ullu ma taşanan. #12:16 Məs. 3:7 17Pisluğbalt'u pisluğ ma banan, bitot'ay piyes şaat' ak'eğala əşur biq'anan. 18Başarbamin amdarxoxun yaq'axtakinan.
19Ay zaynak' əziz bakalorox, bezi həyifə haq'oz pi şuk'k'ala pisluğ ma banan, me əşlə Buxačuğo tapşurbanan. Axıri Ǐvel Śame boşal me əyitmux bune: "Buxačuğon metəre nex: <Həyif haq'sun Bezi əşe, lazım bakala caza k'ənesa, şot'oval tadoz>". #12:19 K'an. 32:35; Əbr. 10:30 20Mot'oxunsa "vi düşmən busanesa, şot'o ukest'a, xenezanesa, şot'o xe tada. Metər ba ki, şot'in ot'p'i toobabane". #12:20 Məs. 25:21-22 21Pisluğen va təə, hun pisluğa haq'layinşa, barta şaat'luğenq'an taşeri.
© Translation Services International Ltd.