Rimluğo 11
11
Buxačuğon İzi c'ək'p'i azuk'axun ç̌o tene tarade
1İsə və̌xun xavarez haq'sa: tərebon Buxačuğon İzi c'ək'p'i azuk'a? Sal sa vədə! Soğo zu: israillu tezu ki? Avrahamaxun törəyinşakit'oğoxunzu zuval, Binyamini nəsiləxunzu. #11:1 Filip'. 3:5 2Ç̌o tene tarade Buxačuğon İzi c'ək'p'i azuk'axun, axıri şorox saturběš c'ək'eśiyoroxe. Efi eyex badanan xavareçal İlyan israilluğoxun şikəətbat'an Buxačuğo pit'oğo: 3«Ay Q'ončux, Vi xavareçalxot'un besp'i şot'oğon, Vaynak' q'urban eçala ganxot'un śarpi śipi! Sa zuz mande, ama zaal bespsunt'un çuresa». #11:3 1 Padç. 19:10,14 4Buxačuğon k'ə pi p'oy? Pine: «Azuk'i boş vǔğ hazar tan c'ək'eśiyoroxe bu, Zaynak'ez efe şot'oğo, binik' buxačux Baala bul nu k'os'p'iyoroxe şorox». #11:4 1 Padç. 19:18 5Həysəəl haketər: Buxačuğon mot'o laft'unst'a pi təə, İzi heq'ədər şaat' Soğo baksuna ak'est'i c'ək'p'iyorox, düze malal bakayt'un, həysəəl bune. 6İçoğoy biq'i əşlə görə tene c'ək'p'e şot'oğo Buxačuğon, tene "İzi şaat' baksuna görə c'ək'p'iyorox" teyan uk'oy şot'oğo.
7İsə bezi upsun çureğalo hik'ə: israilluğon lap k'ə bayt'un, p'urumal Buxačuğoy piyes düzgün ak'eśes tet'un baki, c'ək'eśit'oğone mot'o q'azayinşi baki. Mandit'oğon isə inadkərluğbi içoğoy ǰomoy tüşent'un taśi. 8Ǐvel Śamen uk'alt'ullarik':
"Buxačuğon t'etəre bi ki, ǰěne biq'i şot'oğoy ük'en.
Həysəəl haketərt'un: içoğoy pulmux qayal bakayin, atet'unksa,
İyalbakayt'un, q'amiştet'unbaksa". #11:8 K'an. 29:4; İsa. 29:10
9Davidi uk'alt'oğo běğen:
"Barta arśi ukala gala içoğoy kul-tur t'etərq'an ğaç̌eśi ki, təlinə baft'i k'inək'q'at'un baki,
Barta içoğoy bul laft'eq'an ki, cazinal zapiq'at'un baki.
10Piin işiğq'an bari,
Bač'anq'an k'os' mandi şot'oğoy barta həmişəluğ!" #11:9-10 Ǐvel mə̌ğ. 69:22-23
11İsə və̌xun xavarez haq'sa: me israilluğon içoğoy yaq'a aç̌esp'et'unsa mo ene bitet'un hayzes bakaltet'un upsune? Bakala şey tene mo! Ama içoğoy me bist'unen t'iyə̌mi azuk'xoynak' yaq't'un qaypi baki şot'oğon, çark'esun eçala yaq'. Me t'iyə̌mi azuk'xoxun bakalt'oğon q'azayinşit'u ak'i içoğoy paxılluğenq'an biq'i pine baki morox bito! 12İsə běğanan şot'oğoy düz yaq'axun c'eysunen me dünyəneynak' xeyire eçeresa, q'erəz azuk'xoxun bakalt'oğonal mot'oxun şaat' şey q'azayinşit'unbakesa, t'e vədə içoğoy sərfə q'amişaki israilluğoy bitot'ay qaybaki düz yaq'en taysunen k'ə tene q'azayinşest'on!
Q'erəz azuk'axun bakalt'oğon içoğoy ganu çalxeq'at'un
13Ay israillu nu bakala xunçi-viçimux, isə běğanan bezi və̌x upsun çureğalo hik'ə: Buxačuğoy Mǔq Xavara və̌llarik' q'erəz azuk'axun bakalt'oğo p'ap'espseynak' c'ək'eśi ap'ost'olzu zu, moval, fikirezbsa ki, mis'ik' əş tene. 14Nexzu bərkə və̌x Mǔq Xavara p'ap'esp'i bezi azuk'axun bakalt'oğo paxılluğbesezdi, bərkə metərluğen şot'oğoxun sahemarat'uq'a bakayin çark'est'es bazki. 15Axıri şorox içoğoy ǰomoy tüşen taysuna görə Buxačuğoy şot'oğoxun ç̌o tarast'unen me dünyəne bakala mandi azuk'xoy q'a Buxačuğoy arana düzbenesa, t'e vədə Buxačuğon şot'oğoy ç̌oyel p'urum běği baksunen k'ə bon? P'uri ganuxun běyinbaksun k'inək'e bakon mo! 16Şot'o görə ki, exp'i arumaxun badi süft'in šuma Buxačuğoy paye pi cöybenusa, vi exp'i arumi bito Şot'ay s'iyale upsune. Xodin tum Buxačuğoy s'iyalesa, taymuxal Şot'ay s'iyale upsune. #11:16 Ams'i oç̌. 15:19-20
17Ay cir zeytun, Buxačuğoy s'iyal bakala me xodin sa hema tay xoxbakene pit'un va eçeri şot'oğoy gala calğabe. İsəəl me xodin tumen va tadalt'oğo zapi unksa pi 18vi hari calağbaki me xodin taymoğoy běš forsmaba. Forsp'ala k'əvax bu ki? Tume hünərenen çurpe hun, tum vi hünəren təə. 19Bərkə fikirenbsa ki, hun calğabakavax pine xoxbake t'e taymux? 20Koval düze! Şot'oğo xodaxun xoxp'i sakiyo içoğoy nuvěbaksune baki, va me xodin loxol efalo isə vi věbaksun. Ama mo şo upsun tene ki, hun vi turin oq'axun nu ak'alanu - mo şo upsune ki, dim vi turin oq'a běği bist'unaxun q'ǐbalanu. 21Buxačuğon me xodin izi taymoğo xoxpsuna q'iymişenesa, va het'u görə maq'an q'iymişi ki?
22Vi eyexq'an baki: Buxačux heq'ədər şaat' baalkayin, lazım bakala gala İzi tərs ç̌oyal ak'est'es baneksa. Hetər ki, içoğoy ǰomoy tüşen tağalt'oğo bot'i boneseri, ama vi ç̌oye axšumepi. Şot'o görə ki, İzi ük'e bask'ala əşuren biq'sa hun, yaq'nuxun c'eğalnu - vaal bot'i bosale! 23İsrailluğon içoğoy ǰomoy tüşen taysunaxun kul haq'i Xrist'osen içoğo tades bakala çark'esuna q'abulbayt'un Buxačuğon şot'oğo p'urum eçeri İzi s'iyal bakala t'e xoda calğabale, şot'o görə ki, Buxačuğoy kiyexun nu ayeğala şey tene bu. 24Va cir zeytuni xode loxolxun çuki eçeri me calğa xodin loxol göyünbes bakenesa, me xodaxun içuxun çukeśi biti taymoğo eçeri izi gala calğabsun hik'k'al tene Buxačuğoy kiyel!
İsrailluğoy bitot'in çark'esun q'azayinşi bakale
25Ay xunçi-viçimux, geleyal göynuxun ma takinan. Həysə və̌ynak' sa sire ç̌oya qayk'oz, avabakalnan het'u görəz me əyitmoğo nex: Buxačuğon israilluğoy sa hissinə hələl inadkər baki içoğoy ǰomoy tüşen taysa şot'o görəne bare ki, q'erəz azuk'xoxun bakalt'oğoy boşt'an Xrist'osa q'abulbit'oğoy say hari düzbakseynak' hələ bune. 26Me say hari düzbakine buq'on ki, israilluğoy bitot'in çark'esun q'azayinşi bakane. Ǐvel Śamen uk'alt'ullarik':
"Sionaxun #11:26 Sion - Yerusalim şəhər Sion buruğoy loxole, şot'o görəl Sion Yerusalima tadeśi s'iyurxoxun soğoney. eğale Çark'est'al,
Hariyal İak'ovaxun törəyinşakit'oğoy loxol bakala buxačuxsuz s'iya ext'i bakale".
27"İrəziluğ ğaç̌eśi bakoz şot'oğoxun Zu içoğoy günaxxo aranexun ext'i t'e ğine". #11:26-27 İsa. 59:20-21; 27:9; Yer. 31:33-34
28Düze, Mǔq Xavara nu q'abulbsunen Buxačuğoy düşmənt'un baki şorox, moval efi xeyirinəne baki - çark'esunnan q'azayinşi və̌n. Ama mo şo upsun tene ki, Buxačuğon şot'oğo çurtenesa - İzi c'ək'p'i azuk'e şorox, içoğoy bavoğo tadi əyitə görəne çuresa şot'oğo Buxačuğon! 29Şot'o görə ki, İzi tadit'oğo qaydi qoş nu ext'ala Buxačuxe Şo, İzi c'ək'p'it'oğo qǐ yaq'a nu efalone. 30Běšaxun və̌nal Buxačuğo nu çalxi efi ǰomoy tüşennan taysay, ama İzi c'ək'p'i azuk'en İzi ǰomo tene běği pi Buxačuğoy ük' və̌ynak'e bok'i. 31İsəəl şoroxe içoğoy ǰomoy tüşen taysa, Buxačuğoy və̌ynak' ük' bok'ene pi isəəl şot'oğon t'e ük'boksunaxun q'azayinşi bakalt'un. 32Buxačuğon bitot'u içoğoy ǰomoy tüşen taysa şot'o görəne barti ki, Şot'ay ük'boksuni k'ə baksuna bito azuk'xonq'an ak'es baki.
Alxışq'anbaki Buxačuğo
33Buxačuğost'a bakalt'oğo pi çark'ala şey tene,
Şot'ay müdrikluğa q'a avabakalt'oğo sa tərəzik'en extenedon!
Şuva Şot'in İzi ük'e biq'est'it'oğoxun bul c'evk'alo?
Şuva Şot'ay taşala yaq'a q'amişakalo?
34"Şust'a bu Q'ončuğo p'ap'ala haq'ıl?
Şine Şot'o maslaat tades bakon?" #11:34 İsa. 40:13
35"Şine pes bakon ki, Buxačuğo me şeya tadez, isəəl za boşlune?" #11:0-35 İov. 41:3
36Axıri hər şey Şot'oxune eysa,
Şot'oxune hari c'ovaksa,
Şot'aynak'e baksa.
Alxışq'anbaki Şot'o həysəəl, memiin oşa həmişəl! Ammen! #11:36 1 K'or. 8:5-6
© Translation Services International Ltd.