Rimluğo 10
10
1Ay xunçi-viçimux, bezi çureğalo, bezi afırıpi Buxačuğoxun xoyinšp'alo şone ki, israilluğonal Şot'in tades bakala çark'esuna q'abulbeq'at'un. 2Bezi piin ak'alt'uz nex: şot'oğoy piyes Buxačuğoy əyiten taysunaxun q'erəz hik'k'al ak'tenesa. Sa şone ki, mot'o Buxačuğon çureğalt'ullarik' bsuna tet'un ava. 3Buxačuğon İzi piyes düzgün ak'eseynak' laxi yaq'e k'ə baksuna nu q'amişaki içoğoxun c'evk'i yaq'ent'un taysa şorox, metərluğenal Buxačuğoy çalxala düzgünluğa nu q'abulbit'un baksa.
4K'anunen tam əməlbsunen tades bakala k'ə bunesa bito Xrist'osast'ane, şot'o görəl Xrist'osa věbaki Şot'o Çark'est'al k'inək' q'abulbi şu bunesa Buxačuğoy piyes ene düzgün akeśine baksa.
5Běğanan Moiseyen k'anuna əməlbi Buxačuğoy piyes düzgün ak'esuni barada k'ə pe: "k'anuna śameśit'oğoy bitova əməlbalt'in yəşəyinş q'azayinşi bakale". #10:5 Lev. 18:5 6İsə běğanan İsusa věbaksun, Şot'o Çark'est'al k'inək' q'abulbi Buxačuğoy piyes düzgün ak'esun k'ə upsune. Ǐvel Śamen metəre nex: "şuva göynul lağalo pi ma fikirba vi boş", #10:6 K'an. 30:12-14 yan avayan ki, me əyitmux laśi Xrist'osa me dünyəne eşt'uni baradane. 7Saal: "şuva oç̌ali oq'a bağalo pi ma xavar haq'a", #10:7 K'an. 30:13 moval baśi Xrist'osa qaydi oç̌ali oq'axun c'evksuni baradane. 8P'oy k'ə banan nexe? Metəre nex: "Buxačuğoy pit'oğo qə̌věsun lazım tene, vi muzna bele şo, vi ük'e boşe şot'ay ga". #10:8 K'an. 9:4; 13:14 Mone, İsusi Çark'est'al baksuna věbakanan pi car sakat'an hame əyitəyan pi baksa yanal: 9İsusi beşi Q'ončux baksuna vi muzel eçeri mot'o bitot'u caren saksasa, Buxačuğon Şot'o p'uri ganuxun běyinbsuna ük'en věnusa Buxačuğon va çark'est'ale. 10Axıri ük'en věbakalo Buxačuğoy piyes düzgün ak'eśi bakale, Xrist'osi Q'ončux baksuna izi muzel eçeri mot'o car sakalo çark'eğale. 11Ǐvel Śamen metəre nex: "İzi çark'esuna Şot'ost'a ak'iyo ç̌omas'i c'eğale". #10:11 İsa. 28:16 12Me əyit israillu bakalt'uval lafest'a, nu bakalt'uval, şot'o görə ki, yax çark'est'ala Q'ončux bitot'ay Q'ončuxe, İzi afırıpi xoyinšp'alt'ay belxun oq'a xeyir-bərəkəte śik'on Şot'in. 13Axıri metəre śameśe: "Hər Q'ončuğo afırıpi xoyinšp'alo çark'eğale". #10:13 Yol. 2:32
14Ama içoğo çark'est'es bakalt'u tet'un věsa, Şot'o hetərt'un afırıpi xoyinšp'es bakon? İçoğo çark'est'es bakalt'ay barada nu ibakit'uxun oşa Şot'o hetərt'un věbakon? Hari içoğo Şot'ay barada uk'al nu bakayin hetər ibakalt'un? 15İçoğo Buxačuğon c'ək'p'i nu yaq'abayin hetərt'un taśi Şot'ay Mǔq Xavara car sakes bakon? Běğanan Ǐvel Śamen me barada k'ə nex: "Buxačuğoy Mǔq Xavara eçalt'aynak' beşi piin loxol gane bu!" #10:15 İsa. 52:7; Nam. 1:15
16Ama israilluğoy bitot'in tene věbaki q'abulbi içoğoy ibaki me Mǔq Xavara. İsaya xavareçalen pi k'inək': "Ay Q'ončux, şuva věbaki beşi pit'oğo?" #10:16 İsa. 53:1 17Saal nexzu: ibakin buq'on ki, věbakavax. P'oy hetərt'un ibakon? Xrist'osi Şu baksuna car sakalt'oğoy piyorox hari şot'oğo p'ap'at'an. 18İsə xavarez haq'sa və̌xun: güvə mo içoğoy ǔmǔğo sal laft'i tene? Laft'ene axıri! Me śameśiyorox hik'ə p'oy:
"Dirist' dünyənəne haq'layinşbsa şot'oğoy səsen,
Oç̌ali sa belxun baśi t'e soğo belxune c'eysa şot'oğoy exlət". #10:18 Ǐvel mə̌ğ. 19:4
19Ama metərəl nexzu: bərkə israilluğon me əyitmoğo q'amiştet'un? Moiseyen piyorox hik'əy p'oy?
"Zu Bezi c'ək'p'i azuk'axun nu bakalt'oğo və̌x paxılluğbest'oz,
Bezi Şu baksuna nu q'amişakalt'oğo Za çalxest'i efi əcuğo biq'est'oz." #10:19 K'an. 32:21
20İsaya xavareçalen isə lap qaye pe Buxačuğoy əyitmoğo:
"Za nu qə̌veğalt'oğont'un hari Za bə̌ğə̌bi,
Sal bezi s'iya nu duğalt'oğont'un Za çalxi".
21Buxačuğon israilluğoy barada pi əyitmux isə moroxe:
"Üşe-ğena me azuk'az xoyinšp'i Zu,
İzi ǰomon tağala, əyitə nu bask'ala sa azuk'e me azuk'". #10:20-21 İsa. 65:1-2
© Translation Services International Ltd.