Ǐvel mə̌ğurxo 139
139
139-ci Ǐvel mə̌ğ
Fark'alxoy dəst'in kalat'aynak'. Davidi Ǐvel mə̌ğ.
1Ay Q'ončux, za xaxalaxunen c'ovakest'i Hun,
İsə mone, bez ük'e bakalt'oğo anksa.
2Bezi arśi-hayst'unan ava,
Bez fikirxon ə̌xiləxun k'ale Hun.
3Zu yaq' tağat'anal, bula laxi bask'at'anal anksa,
Bezi tura mani yaq'a ç̌axpsunan ava Hun.
4Əyit bezi ǰomoxun hələ c'eğamin,
Hun bezi upsun çureğalt'oğo bitova avanu, ay Q'ončux,
5Bezi hər tərəfən q'orişbsa Hun,
Vi sa kul bez loxole.
6Məət't'əlez manst'a zu Vi me hər şeyaxun xavar baksuna,
Bez q'amişakala şey tene mo.
7Maya şo, t'e Vi Uruf nu bakala ga?
Mayaz t'it'es bakon ki zu Vi piyexun?
8Göynuval lağayiz, Hun t'et'iyanu,
Oç̌alin oq'al bağayiz, Hun t'et'iyanu.
9Lap çurensa purpi taśi běğ c'eğala gala arśaz,
Nəəl běğ batk'ala tərəf bakala ən ə̌xil dənizi t'e soğo ç̌oyel,
10Vi kul p'urumal bez loxol bakale,
Vi kula bez loxolxun ten zap'k'al Hun.
11Lap həysə "barta zülmət bayinq'unenq'an haq'layinşi bez bip' t'ǒğə,
Barta işiğ nu bist'unen za c'ap'beq'an" uk'az,
12P'urumal sa şey c'ap' tene mandon Vaxun.
Şot'aynak' ki, bayinq'un hik'k'al tene Vaynak',
Ğenaxun ak'ala k'inək'en aksa Hun üşeyal.
13Vi kiinen düzbi Hun za,
Hələ nanay tapane bakat'anen bez boş bakalt'oğoy hər sunt'u iz gala laxi.
14Alxışezbsa zu Va bezi loxol běğat'an,
Şot'o görə ki, beyne p'aq'est'ala şey tene Vi za me cürə yaratmişbsun,
Vi nu ak'eśi əşur biq'sunaz q'amişaki zu tam.
15Bezi hər ǔq'enan ak'i Hun
Şot'oğo nanay tapane,
Şuk'k'ali nu ak'ala gala
Başarağlu sa ust'a k'inək'
Soğo-soğo iz gala laxi za yaratmişat'an.
16Zu hələ sa t'up'uli boyda bakat'ane ak'ey za Vi pulmoğon,
Zaynak' bot'eśi ömüri ğimxone śameśey Vi girke boş
Hələ zu me dünyəne eğamin.
17Vi fikirxo bez beyne p'aq'est'es tez baksa zu, ay Buxačux,
Şorox t'eq'ədər gelene ki!
18Şot'oğo bǒq'ə̌lpi çark'ala şey tene,
Q'ume dənoğoxun gelene şorox!
Lap üşe-ğenal bǒq'ə̌lk'ayiz, axır butene şot'oğoy.
19Ay Buxačux, sa me pist'oğoy tumexun əfçibaksuna ak'iyzuy!
Ə̌xilbakanan zaxun, ay p'i śik'alxo.
20Pist'un əyite şot'oğon Vaxun,
Ams'i gala Vi s'iyat'un duğsa şot'oğon.
21İsə hetər ma nifrətp'az zu Va nifrətp'alt'oğo?
Va hik'k'albi içoğoy ǰomoy tüşen tağalt'oğoxun hetər ma irit'k'az?
22Şot'oğo saycə nifrətbesez baksa zu,
Düşmənxone şorox bezi.
23Ay Buxačux, bez ük'e boş běği şot'o ak'a,
Za xaxalaxun c'ovakest'i bez piin nep'a t'it'evk'ala fikirxo avabaka.
24Běğa bezi mani yaq'en taysuna, za düzgün nu bakala yaq'a ma efa,
Barta Buxačuğon yaynak' laxi həmişəluğ yaq'en tağaz zu.
Currently Selected:
Ǐvel mə̌ğurxo 139: udi
Highlight
Copy
Compare
Share
Want to have your highlights saved across all your devices? Sign up or sign in
© Translation Services International Ltd.
