ᕈᒪᓇ 5
5
ᐊ ᑯᐃᔅᑯᑕᑎᓯᑦ ᐊᐛᓐ ᒋᓴᒪᓂᑐᐛ ᐃᔅ ᐊ ᑕᔨᒋ
Romans 5.1-5 (Trinity Year C)
Romans 5.1-8 (Proper-6 Year A)
1ᐊᑯ ᒪᒃ ᑯᐃᔅᑯᑕᑎᓯᐅᓂᒡ ᐊᑯ ᐊ ᐃᓯ ᑭᓄᐛᐱᒥᑕᐧᒄ ᒋᓴᒪᓂᑐᐤ ᐊᓂᔭ ᐊ ᑕᑈᔭᔨᒪᐧᒄ᙮ ᐊᑯ ᑭᔭ ᒪᔪ ᐎᒐᐛᐧᒄ ᒋᓴᒪᓂᑐᐤ ᐊᓂᔭ ᐅᒋ ᑕᓐ ᑲ ᐃᑐᑎᒪᑕᐧᒄ ᒋᑎᐸᔨᒋᒐᓯᒥᓄᐤ ᒋᓴᔅ ᙭᙮ 2᙭ ᔅᒋ ᐃᑐᑎᒪᑯᓄᐤ ᒧᔅ ᐊᑯ ᒐᒋ ᒋᔅᒐᔨᑎᒪᐧᒄ ᒋᓴᒪᓂᑐᐤ ᐅᓱᐛᔨᒋᒐᐅᓐ ᒋᐱᒪᑎᓯᐅᓇᒡ᙮ ᐊᑯ ᒪᒃ ᒪᔽᔨᑎᒪᐧᒄ ᐊ ᒐᔅᑎᓇᑕᔨᑎᒪᐧᒄ ᐊᔅᒄ ᓇᔅᒡ ᒐ ᒋᔅᒐᔨᑎᒥᐃᑕᐧᒄ ᒋᓴᒪᓂᑐᐤ ᐅᒋᔅᑕᔨᑕᑯᓱᐅᓐ᙮ 3ᐊᐅᒄ ᒪᒃ ᐛᒋ ᐃᓯᓇᑯᓯᔭᐧᒄ ᐃᔭᐱᒡ ᐊ ᒧᒋᒐᔨᑎᒪᐧᒄ ᐊᑎ ᐊᓐᑕ ᒪᒂᒡ ᐊ ᐊᔨᒥᐅᔭᐧᒄ, ᐛᔅ ᒋ ᒋᔅᒐᔨᑕᓇᓄᐤ ᐊᓐᑕ ᐊᓐ ᐊ ᐊᔨᒥᐅᔭᐧᒄ ᐊᑯᑕ ᐛᒋ ᐊᑐᐎᔅ ᓱᒐᔨᑕᑯᓯᔭᐧᒄ᙮ 4ᐊᑯ ᒪᒃ ᐊᓐ ᐊᔭᔅᒃ ᐊ ᓱᒐᔨᑕᑯᓯᔭᐧᒄ ᒋᐱᒪᑎᓯᐅᓇᒡ ᒋᓴᒪᓂᑐᐤ ᓇᐊᔨᑎᒥᐃᑯᐤ᙮ ᐅᔭ ᒪᒃ ᐊ ᐃᓯ ᓇᐊᔨᑎᒪᐧᒄ ᐊᑯᑕ ᐛᒋ ᒐᔅᑎᓇᑕᔨᑎᒪᐧᒄ ᐊᔅᒄ ᓇᔅᒡ ᒐ ᒋᔅᒐᔨᑎᒥᐃᑕᐧᒄ ᐅᒋᔅᑕᔨᑕᑯᓱᐅᓐ᙮ 5ᐊ ᒋᔅᒐᔨᑎᒪᐧᒄ ᒪᒃ ᐊᔅᒄ ᓇᔅᒡ ᒐ ᒋᔅᒐᔨᑎᒥᐃᑕᐧᒄ ᒋᓴᒪᓂᑐᐤ ᐅᒋᔅᑕᔨᑕᑯᓱᐅᓐ, ᒋᑭ ᒋ ᒐᔅᑎᓇᑕᔨᑕᓇᓄᐤ ᑕᑈ ᐊᔅᒄ ᒐ ᐃᔅᐱᔨᒡ, ᐛᔅ ᒋᓴᒪᓂᑐᐤ ᑕᑈ ᔅᒋ ᒋᔅᒐᔨᑎᒥᐃᑯᓄᐤ ᒋᑕᐃᓇᒡ ᐅ ᐸᔭᒋ ᐊᒐᒂ ᐅᒋ, ᑕᓐ ᐊᔅᐱᔅ ᓴᒋᐃᑕᐧᒄ᙮ ᐎᔾ ᒪᒃ ᒋᓴᒪᓂᑐᐤ ᔅᒋ ᒥᔨᑯᓄᐤ ᐅᐸᔭᒋ ᐊᒐᒂ᙮
6ᐛᔅ ᐊᓐᑕ ᒪᒂᒡ ᑲ ᐃᓯᓇᑯᓯᔭᐧᒄ ᐊᑲ ᓇᔅᒡ ᒐᒋ ᐱᒪᒋᐃᓱᔭᐧᒄ, ᙭ ᒋ ᓂᐱᔅᑎᒧᐛᐤ ᒋᐱᔭᑎᑯᒡ ᐅᒥᒋᑥᐛ᙮ ᐊᓐᑕ ᒪᒃ ᒋᓴᒪᓂᑐᐛ ᑲ ᐎᔭᔨᑎᒥᔨᒋ ᐅᔭ ᒐᒋ ᐃᑐᑎᒪᑕᐧᒄ ᐊᑯᑕ ᑲ ᓂᐱᔅᑎᒪᑕᐧᒄ᙮ 7ᓇᒪ ᐊᐛᓐ ᒋᐸ ᐅᒋ ᐎ ᓂᐱᔅᑎᒧᐛᐤ ᐊᐛᔪᐛ ᐊ ᑯᐃᔅᑯᑕᑎᓯᔨᒋ ᒥᒄ ᒪᒃ ᒥᔅᑯᒡ ᒋᐸ ᒋ ᐃᓯᓇᑯᓂᔪᐤ ᒐᒋ ᑕᑦ ᐊᐛᓐ ᐊ ᑯᒂᑕᔨᑕᐧᒃ ᒐᒋ ᓂᐱᔅᑎᒧᐛᑦ ᐊᐛᔪᐛ ᐊ ᒥᔪ ᐃᔪᐎᔨᒋ᙮ 8ᒋᓴᒪᓂᑐᐤ ᒪᒃ ᐎᔾ ᓇᔅᒡ ᔅᒋ ᐛᐸᑎᔨᑯᓄᐤ ᑕᓐ ᐊᔅᐱᔅ ᓴᒋᐃᑕᐧᒄ, ᒋ ᐱᔅᑎᓇᐤ ᙭ᑕ ᒐᒋ ᓂᐱᔅᑎᒪᑎᔨᑕᐧᑯ ᐊᔅᒄ ᒪᒂᒡ ᒥᒋᑥᐅᓂᒡ ᐊᒋ ᐃᑕᐛᐧᒄ᙮
9ᐊᔪᐅᒄ ᒪᒃ ᐊ ᑯᐃᔅᑯᑕᑎᓯᔭᐧᒄ ᐛᒋ ᐃᓯ ᑭᓄᐛᐱᒥᑕᐧᒄ ᒋᓴᒪᓂᑐᐤ ᐊᓂᔭ ᙭ ᐊᒋ ᓂᐱᔅᑎᒪᑕᐧᒄ ᒋᐱᔭᑎᑯᒡ᙮ ᒋ ᒐᔅᑎᓇᑕᔨᑕᓇᓄᐤ ᙭ ᑕᑈ ᒐ ᐎᐧᑯᒋᐃᑕᐧᒄ ᒋᓴᒪᓂᑐᐛ ᐅᑦ ᐊᐧᑯᔪᐛᓱᐤ ᑎᐸᔅᑯᓂᒐᐅᓂᔨᒡ ᐅᒡ ᒪᔅᑕᔾ ᒋᓯᑲᔨᒐ᙮ 10ᐊᔅᒄ ᒪᒃ ᒪᒂᒡ ᐊᑲ ᓇᔅᒡ ᐅᒋ ᐊᐱᑕᔨᒪᐧᒄ ᒋᓴᒪᓂᑐᐤ ᐃᔭᐱᒡ ᒋ ᐅᑎᓂᒻ ᑕᓐᑕ ᒐᒋ ᐅᒋ ᐃᓯᓇᑯᓂᔨᒡ ᒐᒋ ᐊᑎ ᒥᔪ ᐎᒐᐛᐧᒄ᙮ ᑲ ᓂᐱᔅᑎᒪᑎᔨᑕᐧᑯ ᙭ᑕ ᐊᑯᑕ ᑲ ᐅᒋ ᓇᐃᐱᔨᑕᑦ ᐅᔭ ᒐᒋ ᐃᓯᓇᑯᓂᔨᒡ᙮ ᐊᑯ ᒪᒃ ᐊᓄᒡ ᐊ ᒥᔪᐎᒐᐛᐧᒄ ᒋᓴᒪᓂᑐᐤ ᒐᔅᑎᓇᑕᔨᑕᑯᓐ ᒐ ᐱᒪᒋᐃᑕᐧᒄ ᒋᓴᔅ ᐅᐱᒪᑎᓯᐅᓂᒡ ᐅᒡ᙮ 11ᐊᔪᐤ ᒪᒃ ᓇᔅᒡ ᒋ ᒥᔽᔨᑕᓇᓄᐤ ᒋᓴᒪᓂᑐᐤ ᓴᔅ ᐊᒋ ᓇᐃᐱᔨᑕᑦ ᒐᒋ ᒥᔪ ᐎᒐᐛᐧᒄ ᒋᑎᐸᔨᒋᒐᓯᒥᓄᐤ ᒋᓴᔅ ᙭ ᐅᒡ᙮
ᐊᑕᒻ ᑭᔭ ᙭
12ᐊᐅᒄ ᒪᒃ ᐅ ᑲ ᐃᔅᐱᔨᒡ, ᐸᐃᒄ ᓇᐸᐤ ᐊ ᑕᑦ ᐊᑯᑕ ᑲ ᐅᒋ ᑎᒂᒡ ᒥᒋᑥᐅᓐ ᑭᔭ ᐊᑯᑕ ᑲ ᐅᒋ ᑎᒂᒡ ᓂᐳᐅᓐ ᐊᓂᔭ ᐊᒋ ᒥᒋᑐᑕᐧᒃ᙮ ᑭᔭ ᐊᑯᑕ ᐛᒋ ᐃᓯᓇᒂᒡ ᒥᓯᐛ ᐊᐛᓐ ᐊ ᐅᑎᑕᐅᑯᑦ ᓂᐳᐅᓂᔪᐤ, ᐛᔅ ᒥᓯᐛ ᐊᐛᓐ ᒥᒋᑐᑎᒻ᙮ 13ᐊᑎ ᐊᒋ ᒥᒋᑐᑕᒡ ᐊᐛᓐᒋ ᐅᑕ ᐊᔅᒋᒡ ᑲ ᑕᒡ ᐊᔅᒄ ᐊᑲ ᐅᒋ ᑎᑯᓂᔨᒡ ᐎᓱᐛᐅᓂᔪᐤ, ᓇᒪ ᐅᒋ ᐊᔅᑎᒋᑎᒥᔪᐛ ᒋᓴᒪᓂᑐᐛ ᐅᒥᒋᑐᑎᒧᐅᓄᐛᐛ᙮ 14ᐊᑕᒻ ᐊ ᑕᑦ ᐅᒋ ᐊᓐᒡ ᒪᒃ ᐊᓐᑕ ᑲ ᐊᓂᔅᒐ ᐱᒪᑎᓯᒡ ᒧᓱᓴ ᐃᔅ ᐊ ᑕᔨᒋ ᒥᓯᐛ ᒋ ᑎᐸᔨᒥᑯᐅᒡ ᓂᐳᐅᓂᔪᐤ ᐊᑎ ᐊᓐᒡ ᐊᑲ ᐊᓐ ᐊᑕᒻ ᑲ ᐃᓯ ᒥᒋᑐᑎᒥᔨᒋ ᑲ ᐃᓯ ᒥᒋᑐᑕᒡ᙮ ᐅ ᒪᒃ ᐊᑕᒻ ᐃᔭᐱᒡ ᒋ ᑎᑯᓂᔪᐤ ᑕᓐ ᑲ ᐃᓯ ᓂᔅᐱᑐᐛᑦ ᐊᓂᔭ ᐊᔅᒄ ᒐ ᑎᑯᓯᓂᔨᒋ, ᐊᐅᑯᓂᐃ ᒋᓴᓴ᙮
15ᒥᒄ ᒪᒃ ᐊᓂᔭ ᒥᔨᐛᐅᓂᔪᐤ ᓴᒐᔾ ᑲ ᒥᔨᑕᒄ ᒋᓴᒪᓂᑐᐤ ᓇᔅᒡ ᑕᑈ ᐃᔭᒡ ᐃᑕᔨᑕᑯᓂᔪᐤ ᑕᓐ ᑲ ᐃᑕᔨᑕᑯᓂᔨᒡ ᐊᑕᒻ ᐅᒥᒋᑐᑎᒧᐅᓐ᙮ ᒥᒐᑦ ᐊᐛᓐ ᒋ ᓂᐳᐤ ᐊᓂᔭ ᐅᒋ ᐸᐃᒄ ᓇᐸᐛ, ᐊᐅᒄ ᐊᑕᒻ, ᐊᒋ ᒥᒋᑐᑕᐧᒃ᙮ ᒥᒄ ᒪᒃ ᐊᑐᐎᔅ ᒥᒐᑎᔪᐛ ᐊᐛᔪᐛ ᒋᓴᒪᓂᑐᐤ ᐊᒋ ᓱᐛᔨᒪᑦ᙮ ᐊᑐᐎᔅ ᐃᑕᔨᑕᑯᓂᔪᐤ ᐊᓂᔭ ᒥᔨᐛᐅᓂᔪᐤ ᓴᒐᔾ ᑲ ᒥᔨᑕᒄ ᙭ ᐅᓱᐛᔨᒋᒐᐅᓂᒡ ᐅᒡ ᒥᒐᑦ ᐊᐛᓐ ᒐᒋ ᐱᒪᒋᐅᑦ᙮ 16ᐃᔭᒡ ᑕᑈ ᐃᑕᔨᑕᑯᓂᔪᐤ ᒋᓴᒪᓂᑐᐤ ᐅᒥᔨᐛᐅᓐ ᑕᓐ ᑲ ᐃᑕᔨᑕᑯᓂᔨᒡ ᐸᐃᒄ ᓇᐸᐤ ᐅᒥᒋᑐᑎᒧᐅᓐ᙮ ᐛᔅ ᐊᓂᔭ ᑕᓐ ᑲ ᐃᓯ ᒥᒋᑐᑕᐧᒃ ᐊᑕᒻ ᐊᑯᑕ ᑲ ᐅᒋᐱᔨᒡ ᒥᓯᐛ ᐊᐛᓐ ᑕᑈ ᒐᒋ ᐊᑕᒪᔨᑕᑯᓯᑦ ᒥᒋᑥᐅᓂᔪᐤ ᒋᓴᒪᓂᑐᐛ ᐃᔅ ᐊ ᑕᔨᒋ᙮ ᒋᓴᒪᓂᑐᐤ ᒪᒃ ᑲ ᐱᔅᑎᓇᑦ ᒋᓴᓴ ᒐᒋ ᓂᐸᐊᑭᓄᔨᒋ ᐊᑯᑕ ᐛᒋᐱᔨᒡ ᒥᒐᑦ ᐊᐛᓐᒋ ᒐᒋ ᐛᐸᔨᑎᒧᐛᑭᓄᐎᒡ ᐅᒥᒋᑐᑎᒧᐅᓄᐛᐛ ᑭᔭ ᐊ ᑯᐃᔅᑯᑕᑎᓯᒡ ᒐ ᐃᓯ ᑭᓄᐛᐱᒥᑯᒡ ᒋᓴᒪᓂᑐᐛ᙮ 17ᐛᔅ ᒋ ᒋᔅᒐᔨᑕᓇᓄᐤ ᐊᓂᔭ ᐅᒥᒋᑥᐅᓐ ᐊᓐ ᐸᐃᒄ ᓇᐸᐤ ᐊᑯᑕ ᑲ ᐅᒋ ᐃᓯᓇᒂᒡ ᒥᓯᐛ ᐊᐛᓐ ᒐᒋ ᑎᐸᔨᒥᑯᑦ ᓂᐳᐅᓂᔪᐤ᙮ ᑕᓐ ᒪᒃ ᐅᔅᑕ ᐊ ᐃᔅᐱᔅ ᒥᔽᔨᑕᑯᓂᔨᒡ ᑕᓐ ᑲ ᐃᓯ ᐃᑐᑎᒪᑕᐧᒄ ᐊᓐ ᑯᑎᒃ ᓇᐸᐤ, ᐊᐅᒄ ᒋᓴᔅ ᙭᙮ ᒥᓯᐛ ᒪᒃ ᐊᓐᒡ ᑲ ᐛᔪᒡ ᒋᔅᒐᔨᑎᒥᐊᑭᓄᐎᒡ ᒋᓴᒪᓂᑐᐛ ᐅᓱᐛᔨᒋᒐᐅᓂᔪᐤ ᐅᑯᐃᔅᑯᑕᑎᓯᐅᒡ ᐊ ᐃᓯ ᑭᓄᐛᐱᒧᑯᐅᒡ ᒋᓴᒪᓂᑐᐛ ᒧᔅ ᒋᑭ ᑕᐅᒡ ᑕᓐᑕ ᐊ ᑕᔨᒋ ᒋᓴᓴ ᑭᔭ ᒋᑭ ᐎᒋᐃᑯᐅᒡ ᒐᒋ ᓱᒋᑲᐳᐅᒡ ᐅᐱᒪᑎᓯᐅᓄᐛᒡ᙮
18ᐊᐅᑯᓐ ᒪᒃ ᐛᒋ ᐃᓯᓇᒂᒡ ᒧᔭᒻ ᐸᐃᒄ ᐊᐛᓐ ᐅᒥᒋᑥᐅᓇ ᐅᒋ ᒥᓯᐛ ᐊᐛᓐ ᐊ ᐃᓯ ᐊᑕᒪᔨᑕᑯᓯᑦ ᒥᒋᑥᐅᓂᔪᐤ ᒋᓴᒪᓂᑐᐛ ᐃᔅ ᐊ ᑕᔨᒋ᙮ ᒋᓴᔅ ᒪᒃ ᐅᑯᐃᔅᑯᑕᑎᓯᐅᓂᒡ ᐊᑯᑕ ᐛᒋᐱᔨᒡ ᒋᓴᒪᓂᑐᐤ ᒥᓯᐛ ᐅᑯᐃᔅᑯᑕᑎᓯᐅᒡ ᒐᒋ ᐃᓯ ᑭᓄᐛᐱᒥᑯᒡ ᑭᔭ ᒐᒋ ᒥᔭᑦ ᑲᒋᒡ ᐱᒪᑎᓯᐅᓂᔪᐤ᙮ 19ᐸᐃᒄ ᐊᐛᓐ, ᐊᐅᒄ ᐊᑕᒻ, ᐊᓂᔭ ᐊᑲ ᐅᒋ ᓂᓇᐃᑐᐛᑦ ᒋᓴᒪᓂᑐᐛ ᐊᐅᒄ ᐛᒋ ᒥᓯᐛ ᐊᐛᓐ ᐊᑕᒪᔨᑕᑯᓯᑦ ᐊ ᒥᒐᑎᓯᑦ᙮ ᐊᓐ ᒪᒃ ᑯᑎᒃ, ᐊᐅᒄ ᒋᓴᔅ, ᓇᔅᒡ ᐊᒋ ᓂᓇᐃᑐᐛᑦ ᒋᓴᒪᓂᑐᐛ ᐊᑯᑕ ᐛᒋᐱᔨᒡ ᒥᒐᑦ ᐊᐛᓐ ᐊ ᑯᐃᔅᑯᑕᑎᓯᑦ ᒐᒋ ᐃᓯ ᑭᓄᐛᐱᒥᑯᑦ ᒋᓴᒪᓂᑐᐛ᙮
20ᐃᔅᐱ ᑲ ᐱᔅᑎᓇᐧᒃ ᒋᓴᒪᓂᑐᐤ ᐅᐎᓱᐛᐅᓐ ᐊᑯᑕ ᑲ ᐅᒋ ᒋᔅᒐᔨᑕᒡ ᐊᐛᓐᒋ ᐊᔅᐱᔅ ᐛᔪᐅᒡ ᒥᒋᑐᑕᒡ᙮ ᒥᒄ ᒪᒃ ᑕᓐᑕ ᑲ ᐛᔪᐅᒡ ᒥᒋᑐᑕᑭᓄᐅᒡ ᒋᓴᒪᓂᑐᐤ ᐅᓱᐛᔨᒋᒐᐅᓐ ᐊᑐᐎᔅ ᒋ ᐊᑐᔅᒐᒥᑭᓂᔪᐤ᙮ 21ᑕᑈ ᑭᑈ ᓱᒋᐱᔪᐤ ᒥᒋᑥᐅᓐ᙮ ᐛᔅ ᓇᔅᒡ ᑎᐸᔨᒥᑯᐅᒡ ᐊᐛᓐᒋ ᐊᐅᒄ ᒪᒃ ᐛᒋ ᐃᑕᔨᑕᑯᓂᔨᒡ ᒐᒋ ᓂᐱᒡ᙮ ᐊᑐᐎᔅ ᒪᒃ ᒋᓴᒪᓂᑐᐤ ᐅᒋᓴᐛᑎᓯᐅᓐ ᓱᒐᔨᑕᑯᓂᔪᐤ᙮ ᐅᑯᐃᔅᑯᑕᑎᓯᐅᒡ ᒋ ᐊᑎ ᐃᓯ ᑭᓄᐛᐱᒥᑯᓄᐤ ᐊᓂᔭ ᐅᒋ ᑕᓐ ᑲ ᐃᓯ ᐃᑐᑎᒪᑎᔨᐧᑯ ᒋᓴᓴ ᒋᑎᐸᔨᒋᒐᓯᒥᓄᐛ᙮ ᐊᑯᑕ ᒪᒃ ᒐᒋ ᐅᒋ ᐊᔭᐛᐧᒄ ᑲᒋᒡ ᐱᒪᑎᓯᐅᓂᔪᐤ᙮
Currently Selected:
ᕈᒪᓇ 5: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
