ᕈᒪᓇ 4
4
ᑕᑈᑎᒧᐅᓂᔪᐤ ᑲ ᑯᐃᔅᑯᓇᑯᐃᑯᑦ ᐊᑉᕋᐊᒻ
1ᐊᑯ ᒪᒃ ᒋᐸ ᐊᔨᒧᒪᓄᐤ ᐊᓂᔭᐧᑲ ᐊᓂᔅᒐ ᒋᒧᓱᒥᓄᐤ ᐊᑉᕋᐊᒻ ᑕᓐᑕ ᑲ ᐅᒋ ᑯᐃᔅᑯᓇᑯᐊᑭᓄᐅᑦ᙮ 2ᐛᔅ ᒧᔭᒻ ᑲ ᑯᐃᔅᑯᓇᑯᐊᑭᓄᐅᒂ ᒋᓴᒪᓂᑐᐛ ᐃᔅ ᐊ ᑕᔨᒋ ᐊ ᒥᔪᑐᑕᐧᒃ, ᒋᐸ ᑎᑯᓂᔪᐤ ᑕᓐ ᒋᐸ ᒋ ᐃᓯ ᒪᒥᒋᒧᐤ᙮ ᒥᒄ ᒪᒃ ᓇᒪ ᑎᑯᓂᔪᐤ ᒐᒂᔪᐤ ᐊᓐᑕ ᒐᒋ ᐅᒋ ᒪᒥᒋᒧᑦ ᒋᓴᒪᓂᑐᐛ ᐃᔅ ᐊ ᑕᔨᒋ᙮ 3ᑕᓐ ᐊᑎᔅᑕᒡ ᒪᒃ ᒋᓴᒪᓂᑐᐤ ᐅᑦ ᐃᔨᒧᐅᓂᒡ᙮ ᐃᑎᔅᑕᐤ,
ᐊᑉᕋᐊᒻ ᒋ ᑕᑈᔭᔨᒪᐤ ᒋᓴᒪᓂᑐᐛ ᐊᐅᒄ ᐅᔭ ᐅᑯᐃᔅᑯᑕᑎᓯᐤ ᐛᒋ ᒋ ᐃᓯ ᑭᓄᐛᐱᒥᑯᑦ᙮
4ᑭᓄᐛᐸᑎᒧᒄ ᑕᓐ ᐊ ᐃᓯᓇᒂᒡ ᐊᐛᓐ ᐊ ᐊᑐᔅᒐᑦ᙮ ᐛᔅ ᐊᓂᔭ ᐊ ᐊᑐᔅᒐᑦ ᑭᔭ ᐊ ᒋᓯᐧᑯᐛᑭᓄᐅᑦ ᓇᒪ ᓴᒐᔾ ᒥᔭᑭᓄᐤ ᐊᓂᔭ ᐅᑎᐸᐊᒪᑯᓯᐅᓐ᙮ ᐛᔅ ᐊᓂᔭ ᐊᒋ ᐊᑐᔅᒐᑦ ᐛᒋ ᒥᔭᑭᓄᐅᑦ᙮ 5ᒪᒥᑐᓇᔨᒪᑕᐤ ᒪ ᐊᐛᓐ ᑲ ᒥᒐᑎᓯᑦ᙮ ᐊᓂᔭ ᐊ ᒥᔪᑐᑕᐧᒃ ᐊᑯᑕ ᐛᒋ ᑯᐃᔅᑯᑕᑎᓯᑦ᙮ ᐛᔅ ᐊ ᑕᑈᔭᔨᒪᑦ ᒋᓴᒪᓂᑐᐛ ᐊᑯᑕ ᒥᒄ ᒐᒋ ᐅᒋ ᑯᐃᔅᑯᓇᑯᓯᑦ ᒋᓴᒪᓂᑐᐛ ᐃᔅ ᐊ ᑕᔨᒋ᙮ 6ᐊᐅᒄ ᐅᔭᔪᐤ ᑲ ᐊᔨᒧᑕᐧᒃ ᐊᓂᔭ ᒋᓴᐅᒋᒪᐤ ᑎᐱᑦ᙮ ᒋ ᐊᔨᒧᒪᐤ ᐊᔅᐱᔅ ᓱᐛᔨᑕᑯᓯᔨᒋ ᐊᓂᔭ ᐊᐛᔪᐛ ᐅᑯᐃᔅᑯᑕᑎᓯᐤ ᑲ ᐃᓯ ᑭᓄᐛᐱᒥᑯᔨᒋ ᒋᓴᒪᓂᑐᐛ᙮ ᓇᒪ ᐎ ᐊᓂᔭ ᑕᓐ ᐊ ᐃᓯ ᒥᔪ ᐊᑐᔅᒐᒡ ᐛᒋ ᐅᑯᐃᔅᑯᑕᑎᓯᐅᒡ ᐃᓯ ᑭᓄᐛᐱᒥᑯᐅᒡ ᒋᓴᒪᓂᑐᐛ᙮ 7ᒋ ᐃᑕᐤ ᐅ ᒋᓴᐅᒋᒪᐤ,
ᑕᑈ ᓱᐛᔨᑕᑯᓱᐅᒡ ᐊᓐᒡ ᐊᐛᓐᒋ ᑲ ᐛᐸᔨᑎᒪᑯᒡ ᒋᓴᒪᓂᑐᐛ ᐅᐎᓂᑐᓄᐛᐛ, ᐊᓐᒡ ᑲ ᐃᒐᓂᒧᐛᑭᓄᐎᒡ ᐅᒥᒋᑥᐅᓄᐛᐛ᙮
8ᑕᑈ ᓱᐛᔨᑕᑯᓱᐤ ᐊᓐ ᐊᐛᓐ ᑲ ᐛᐸᔨᑎᒧᐛᑭᓄᐅᑦ ᐅᒥᒋᑥᐅᓇ᙮
9ᒥᒄ ᐊ ᒪᒃ ᐊᓐᒡ ᑲ ᒋᔅᒋᓄᐛᒋᔄᑭᓄᐎᒡ ᒋᑭ ᓱᐛᔨᒪᐊᑭᓄᐎᒡ ? ᓇᒪᐎᔾ ᑭᑈ᙮ ᑭᔭ ᐊᓐᒡ ᐊᑲ ᒋᔅᒋᓄᐛᒋᔄᑭᓄᐎᒡ ᒋᑭ ᓱᐛᔨᒪᐊᑭᓄᐎᒡ᙮ ᐛᔅ ᐃᑎᔅᑕᐤ ᒋᓴᒪᓂᑐᐤ ᐅᑦ ᐃᔨᒧᐅᓂᒡ, ᐊᑉᕋᐊᒻ ᐊᒋ ᑕᑈᔭᔨᒪᑦ ᒋᓴᒪᓂᑐᐛ ᐊᐅᒄ ᒪᒃ ᐅᔭ ᐊ ᑯᐃᔅᑯᑕᑎᓯᑦ ᐛᒋ ᐃᓯ ᑭᓄᐛᐱᒥᑯᑦ ᒋᓴᒪᓂᑐᐛ᙮ 10ᑕᐃᔅᐱ ᒪᒃ ᑲ ᐃᑕᒋᒪᑭᓄᐅᑦ ᐅᔭᔪᐤ ᐊᑉᕋᐊᒻ, ᐊᔅᒄ ᐊ ᐊᑲ ᐅᒋ ᒋᔅᒋᓄᐛᒋᔄᑭᓄᐅᑦ ᒪᒃ ᓴᔅ ᐊᒋ ᒋᔅᒋᓄᐛᒋᔄᑭᓄᐅᑦ ? ᐊᔅᒄ ᐊᑲ ᐅᒋ ᒋᔅᒋᓄᐛᒋᔄᑭᓄᐅᑦ ᐊᑯᑕ ᑲ ᐃᑕᒋᒪᑭᓄᐅᑦ ᐅᔭᔪᐤ, ᓇᒪ ᐎ ᐸᑐᔅ ᑲ ᒋᔅᒋᓄᐛᒋᔄᑭᓄᐅᑦ᙮ 11ᐸᑎᒪ ᒋ ᒋᔅᒋᓄᐛᒋᔄᑭᓄᐤ᙮ ᐊᓂᔭ ᒪᒃ ᐊᒋ ᒋᔅᒋᓄᐛᒋᔄᑭᓄᐅᑦ ᐊᑯᑕ ᑲ ᐅᒋ ᒋᔅᒐᔨᑕᑯᑕᑭᓄᐎᒡ ᐊ ᑕᑈᔭᔨᒪᑦ ᒋᓴᒪᓂᑐᐛ, ᓴᔅ ᑯᐃᔅᑯᑕᑎᓯᐅᓂᒡ ᐊᒋ ᐃᓯ ᑭᓄᐛᐱᒥᑯᑯᐱᓇ ᒋᓴᒪᓂᑐᐛ᙮ ᓴᔅ ᑯᐃᔅᑯᑕᑎᓯᐅᓂᒡ ᒋ ᐃᓯ ᑭᓄᐛᐱᒥᑯᑯᐱᓇ ᐊᔅᒄ ᐊᑲ ᐛᐛᒡ ᐅᒋ ᒋᔅᒋᓄᐛᒋᔄᑭᓄᐅᑦ᙮ ᐊᑯ ᒪᒃ ᐊ ᐊᑎ ᐃᓯᓇᑯᓯᑦ ᐊ ᐅᑕᐎᒪᐅᑐᑕᑯᑦ ᒥᓯᐛ ᐊᓂᔭᔪᐛ ᑲ ᑕᑈᔭᔨᒪᔨᒋ ᒋᓴᒪᓂᑐᐛ, ᐊᓂᔭᔪᐛ ᑯᐃᔅᑯᑕᑎᓯᐅᓂᒡ ᑲ ᐃᓯ ᑭᓄᐛᐱᒥᑯᔨᒋ ᒋᓴᒪᓂᑐᐛ, ᐊᑎ ᐊᑲ ᐅᒋ ᒋᔅᒋᓄᐛᒋᔄᑭᓄᔨᒋ᙮ 12ᑭᔭ ᐊᓂᔭᔪᐛ ᑲ ᒋᔅᒋᓄᐛᒋᔄᑭᓄᔨᒋ ᐅᑕᐎᒪᐅᑐᑐᐛᐅᐤ, ᒥᒄ ᓇᒪ ᐅᑕᐎᒪᐅᑐᑐᐛᐅᐤ ᒥᒄ ᐊᓂᔭ ᐊᒋ ᒋᔅᒋᓄᐛᒋᔄᑭᓄᔨᒋ᙮ ᐊᓂᔭ ᑕᑈᑎᒧᐅᓂᒡ ᐊ ᐃᓯ ᐱᒪᑎᓯᔨᒋ ᒧᔭᒻ ᐎᔾ ᑲ ᐃᑎᑦ ᐊᓂᔭ ᒍᑕᐎᓄᐤ ᐊᑉᕋᐊᒻ ᐊᔅᒄ ᐊᑲ ᐅᒋ ᒋᔅᒋᓄᐛᒋᔄᑭᓄᐅᑦ ᐊᔪᐅᒄ ᐅᔭ ᐛᒋ ᐅᑕᐎᒪᐅᑐᑐᐛᒄ᙮
ᓇᒪ ᒋᑭ ᒋ ᑯᐃᔅᑯᑕᑎᓯᐊᑭᓄᐤ ᐊᐛᓐ ᒥᒄ ᐊᓂᔭ ᐊ ᓂᓇᐃᑕᐧᒃ ᐎᓱᐛᐅᓂᔪᐤ
Romans 4.13-25 (Proper-5 Year A; Lent-2 Year B)
13ᒋᓴᒪᓂᑐᐤ ᒋ ᐃᑕᐤ ᐊᑉᕋᐊᒪ ᑭᔭ ᐊᓂᔭ ᐊᓐᑕ ᐊ ᑕᑦ ᒐ ᐅᒋ ᐊᓂᔅᒐ ᐱᒪᑎᓯᔨᒋ ᒐᔅᑎᓇᔅ ᑕᑈ ᒐ ᒥᔭᑦ ᒥᓯᐛ ᐅᔭ ᐊᔅᒋᔪᐤ᙮ ᐅᔭ ᒪᒃ ᑲ ᐃᔅᒋᔄᔨᒋ ᒋᓴᒪᓂᑐᐛ ᒐᔅᑎᓇᔅ ᒐ ᐃᑐᑎᒪᑯᑦ ᐊᑉᕋᐊᒻ ᓇᒪ ᐎ ᐊᓂᔭ ᐊ ᓂᓇᐃᑕᐧᒃ ᐎᓱᐛᐅᓂᔪᐤ ᐛᒋ ᐃᑎᑯᑦ ᐅᔭ ᒐ ᐃᑐᑎᒪᑯᑦ᙮ ᐊᒋ ᑕᑈᔭᔨᒪᑦ ᒋᓴᒪᓂᑐᐛ ᑭᔭ ᐅᑯᐃᔅᑯᑕᑎᓯᐤ ᐊᒋ ᐃᓯ ᑭᓄᐛᐱᒥᑯᑦ ᐊᐅᑯᔪᐤ ᐛᒋ ᐃᑐᑎᒪᑯᑦ ᐅᔭ᙮ 14ᐛᔅ ᐊ ᐃᓯᓇᑯᓂᒂ ᒥᒄ ᐊᓐᒡ ᑲ ᓂᓇᐃᑕᒡ ᐎᓱᐛᐅᓂᔪᐤ ᒐ ᐱᒪᒋᐃᑯᒂᓂᒋ ᒋᓴᒪᓂᑐᐛ ᐊᑯ ᑭᑈ ᒐᒋ ᐃᔅᒋᔄᔭᐧᒄ, ᓇᒪ ᒐᒂᓐ ᐃᓯᓇᑯᓐ ᑕᑈᑎᒧᐅᓐ, ᐊᒋ ᐃᔅᒋᔄᑦ ᒪᒃ ᒋᓴᒪᓂᑐᐤ ᒐᔅᑎᓇᔅ ᒐ ᐱᒪᒋᐊᑦ ᐊᓂᔭ ᐊᐛᔪᐛ ᒐ ᑕᑈᔭᔨᒥᑯᑦ᙮ 15ᐛᔅ ᐊᑲ ᓂᓇᐃᑕᑭᓄᐅᒡ ᐎᓱᐛᐅᓐ ᐊᑯᑕ ᐛᒋᐱᔨᒡ ᒋᓴᒪᓂᑐᐤ ᒐᒋ ᐊᐧᑯᔪᐛᓯᑦ᙮ ᐊᑯ ᒪᒃ ᐊᓐᑕ ᐊᑲ ᑎᒂᒋ ᐎᓱᐛᐅᓇ ᓇᒪ ᑭᑈ ᑎᑯᓐ ᐊᓐᑕ ᐊᑲ ᓂᓇᐃᑕᑭᓄᐅᒋ ᐎᓱᐛᐅᓇ᙮
16ᐊᐅᑯᓐ ᒪᒃ ᐛᒋ ᐃᓯᓇᒂᒡ ᑕᑈᑎᒧᐅᓂᒡ ᒥᒄ ᒐᒋ ᐅᒋ ᐊᔭᑭᓄᐎᒡ ᐊᓂᔭ ᒋᓴᒪᓂᑐᐤ ᑲ ᐃᔅᒋᔄᑦ ᒐᔅᑎᓇᔅ ᒐ ᐃᑐᑎᒪᒐᑦ᙮ ᐊᑯ ᒪᒃ ᒋᓴᒪᓂᑐᐤ ᐅᓱᐛᔨᒋᒐᐅᓂᒡ ᐊᑯᑕ ᐛᒋ ᒐᔅᑎᓇᑕᔨᑕᑯᓂᔨᒡ ᒥᓯᐛ ᐊᓐᒡ ᑲ ᐃᓯ ᐊᓂᔅᒐ ᑕᑈᔭᔨᒪᒡ ᒋᓴᒪᓂᑐᐛ ᒧᔭᒻ ᑲ ᐃᓯ ᑕᑈᔭᔨᒪᔨᒋ ᐊᑉᕋᐊᒪ ᑭᔭ ᐎᔨᐛᐤ ᒐᒋ ᐊᔭᒡ ᐊᓂᔭᔪᐛ ᑕᓐ ᑲ ᐃᔅᒋᔄᔨᒋ ᒋᓴᒪᓂᑐᐛ ᒐᔅᑎᓇᔅ ᒐ ᐃᑐᑎᒪᒐᔨᒋ᙮ ᓇᒪ ᒪᒃ ᒥᒄ ᐊᓐᒡ ᑲ ᒥᔭᑭᓄᐎᒡ ᒧᓱᓴ ᐅᐎᓱᐛᐅᓂᔪᐤ ᒋᑭ ᒋ ᐊᔭᐅᒡ ᐅᔭ᙮ ᐊᓐᒡ ᑲ ᑕᑈᔭᔨᒪᒡ ᒋᓴᒪᓂᑐᐛ ᒧᔭᒻ ᐊᑉᕋᐊᒪ ᑲ ᐃᓯ ᑕᑈᔭᔨᒪᔨᒋ ᐊᐅᑯᓐᒡ ᑭᔭ ᐎᔨᐛᐤ ᒐ ᐊᔭᒡ ᐅᔭ᙮ ᐛᔅ ᒥᓯᐛ ᐊ ᑎᓯᔭᐧᒄ ᐊᑉᕋᐊᒻ ᒍᑕᐎᑐᐛᓄᐤ᙮ 17ᒧᔭᒻ ᐊᑎᔅᑕᒡ ᒋᓴᒪᓂᑐᐤ ᐅᑦ ᐃᔨᒧᐅᓂᒡ ᐊᑉᕋᐊᒻ ᐊᒋ ᐃᑎᑯᒂ ᒋᓴᒪᓂᑐᐛ,
ᔅᒋ ᐃᓯᐃᑎᓐ ᒐᒋ ᐅᑕᐎᒪᐅᑕᔅᒡ ᒥᒐᑦ ᐊ ᐃᑎᔅᑲᓇᓯᒡ ᐊᐛᓐᒋ᙮
ᐊᑉᕋᐊᒻ ᒪᒃ ᐊᒋ ᑕᑈᔭᔨᒪᑦ ᒋᓴᒪᓂᑐᐛ ᐊᐅᒄ ᐅᔭ ᐊ ᐅᑕᐎᒪᐅᑐᐛᐧᒄ ᐛᒋ ᐃᓯ ᑭᓄᐛᐱᒥᑯᑦ᙮ ᐊᐅᑯᓐ ᒪᒃ ᐅᔭ ᐊᑉᕋᐊᒻ ᑲ ᑕᑈᔭᔨᒪᑦ, ᐊᓂᔭᔪᐛ ᑲ ᐃᑐᑐᐛᔨᒋ ᐊᓂᔭᔪᐛ ᐊᑲ ᐱᒪᑎᓯᔨᒋ ᑲᐤ ᒐᒋ ᐱᒪᑎᓯᔨᒋ ᑭᔭ ᒥᒄ ᐊ ᐃᔅᒋᔄᔨᒋ ᒐᒋ ᑎᑯᓂᔨᒡ ᒐᒂᔪᐤ ᐊᑲ ᓂᑕ ᐅᒋ ᑎᑯᓂᔨᒡ ᑎᐛᒡ ᑎᑯᓂᔪᐤ᙮
18ᐊᑎ ᐊᑲ ᐛᐛᒡ ᐅᒋ ᑎᑯᓂᔨᒡ ᑕᓐᑕ ᒐ ᐃᓯ ᐊᔅᐸᔨᒧᑯᐱᓇ ᐊᑉᕋᐊᒻ ᑕᑈ ᒐᒋ ᐅᑦ ᐊᐛᓯᒥᒡ ᐎᐛ, ᐃᔭᐱᒡ ᒋ ᑕᑈᔭᔨᒪᐤ ᒋᓴᒪᓂᑐᐛ ᐛᔅ ᐊᐅᑯᓐ ᑲ ᐃᑎᑯᑦ ᒐ ᐃᑐᑎᒪᑯᑦ᙮ ᐊᑯᑕ ᑲ ᐅᒋ ᐃᓯᓇᑯᓂᔨᒡ ᒥᒐᑦ ᐊ ᐃᑎᔅᑲᓇᓯᔨᒋ ᐊᐛᔪᐛ ᒐᒋ ᐅᑕᐎᒪᐅᑦ᙮ ᐛᔅ ᑭᑈ ᐊᐅᑯᓐ ᐊ ᐃᑎᔅᑕᔨᒡ ᒋᓴᒪᓂᑐᐤ ᐅᑦ ᐃᔨᒧᐅᓂᒡ,
ᒋᑭ ᒥᒐᑐᐅᒡ ᐊᐛᓐᒋ ᐊᓐᑕ ᐊ ᑕᔨᓐ ᒐ ᐅᒋ ᐊᓂᔅᒐ ᐱᒪᑎᓯᒡ᙮
19ᓴᔅ ᒪᒃ ᒐᑲᑦ ᐸᐃᑯ ᒥᑕᓯᒥᑎᓄᐤ ᒋ ᐃᑕᑐᐳᓇᓱᐤ ᐊᑉᕋᐊᒻ ᐅᔭ ᑲ ᐃᑕᑭᓄᐅᑦ ᒐ ᐃᑐᑎᒧᐛᑭᓄᐅᑦ᙮ ᐃᔭᐱᒡ ᒪᒃ ᐸᐃᑯᓐ ᒋ ᐃᔅᐱᔅ ᑕᑈᔭᔨᒪᐤ ᒋᓴᒪᓂᑐᐛ᙮ ᑲ ᐃᔅᐱᔅ ᒋ ᓱᒋᐱᔨᒡ ᐊ ᑕᑈᔭᔨᒪᑦ ᓇᒪ ᓇᔅᒡ ᐅᒋ ᐊᓏᑎᒻ ᒐ ᐅᑦ ᐊᐛᓯᒥᒡ ᐊᑎ ᐊᒋ ᒋᔅᒐᔨᒥᓱᑦ ᐊᑲ ᓴᔅ ᒐᒋ ᐅᑕᐎᒪᐅᑦ ᑭᔭ ᐊᓂᔭᔪᐛ ᐎᐛ ᐊᒋ ᒋᔅᒐᔨᒪᑦ ᒐᔅᑎᓇᔅ ᓴᔅ ᒐ ᐊᑲ ᒋ ᐅᑦ ᐊᐛᓯᒥᔨᒋ᙮ 20ᐃᔭᐱᒡ ᒋ ᑕᑈᑎᒻ ᐊᑉᕋᐊᒻ ᒐ ᐃᑐᑎᒪᑯᑦ ᒋᓴᒪᓂᑐᐛ ᑕᓐ ᐊᓂᔭᔪᐛ ᑲ ᐃᑎᑯᑦ ᒐᔅᑎᓇᔅ ᒐ ᐃᑐᑎᒪᑯᑦ᙮ ᐊᑐᐎᔅ ᒋ ᐊᑎ ᓱᒐᔨᑕᑯᓂᔪᐤ ᐅᑕᑈᑎᒧᐅᓐ᙮ ᓴᔅ ᒋ ᒋᔅᑕᒋᒪᐤ ᒋᓴᒪᓂᑐᐛ ᐊᑎ ᐊᔅᒄ ᐊᑲ ᐛᐛᒡ ᐅᒋ ᐃᔅᐱᔨᒡ ᐅᔭ᙮ 21ᓇᔅᒡ ᒋ ᒐᔅᑎᓇᑕᔨᒪᐤ ᒋᓴᒪᓂᑐᐛ ᒐᔅᑎᓇᔅ ᒐ ᐃᑐᑎᒥᔨᒋ ᑕᓐ ᐊᓂᔭᔪᐤ ᑲ ᐃᔅᒋᔄᔨᒋ ᒐ ᐃᑐᑎᒪᑯᑦ᙮ 22ᐊᐅᑯᓐ ᒪᒃ ᐛᒋ ᐃᓯᓇᑯᓂᔨᒡ ᐊᑉᕋᐊᒻ ᐊᓂᔭ ᐊ ᑕᑈᔭᔨᒪᑦ ᒋᓴᒪᓂᑐᐛ ᐅᑯᐃᔅᑯᑕᑎᓯᐤ ᒐᒋ ᐃᓯ ᑭᓄᐛᐱᒥᑯᑦ᙮ 23ᐊᓐ ᑲ ᐃᑎᔅᑕᒡ ᒋᓴᒪᓂᑐᐤ ᐅᑦ ᐃᔨᒧᐅᓂᒡ,
ᑯᐃᔅᑯᑕᑎᓯᐅᓂᒡ ᒋ ᐃᓯ ᑭᓄᐛᐱᒥᑯᐤ ᒋᓴᒪᓂᑐᐛ,
ᓇᒪ ᒥᒄ ᐊᑉᕋᐊᒻ ᐅᒋ ᐊᔨᒧᒪᑭᓄᐤ ᐅᑕ᙮ 24ᒋᑦ ᐊᔅᑕᐅᑯᓇᓄᐤ ᑭᔭ ᒋᔭᓄᐤ ᐅ ᑲ ᐃᑎᔅᑕᒡ, ᒋᔭᓄᐤ ᑲ ᑕᑈᔭᔨᒪᐧᒄ ᒋᓴᒪᓂᑐᐤ ᐊᓐ ᑲ ᐅᓂᔅᑲᓇᑦ ᒋᓴᓴ ᒋᑎᐸᔨᒋᒐᓯᒥᓄᐛ ᓂᐳᐅᓂᒡ ᐅᒋ᙮ ᑭᔭ ᒋᔭᓄᐤ ᑯᐃᔅᑯᑕᑎᓯᐅᓂᒡ ᒋᑭ ᐃᓯ ᑭᓄᐛᐱᒥᑯᓄᐤ ᒋᓴᒪᓂᑐᐤ᙮ 25ᒋᓴᔅ ᒋ ᐱᔅᑎᓇᑭᓄᐤ ᒐᒋ ᓂᐱᔅᑎᒪᑕᐧᒄ ᒐᒋ ᐛᐸᔨᑎᒪᑯᐅᔭᐧᒄ ᒋᒥᒋᑥᐅᓄᐛ, ᑭᔭ ᐊᓂᔭ ᑲ ᐅᓂᔅᑲᓇᑭᓄᐅᑦ ᓂᐳᐅᓂᒡ ᐅᒋ ᐊᑯᑕ ᑲ ᐅᒋ ᐃᓯᓇᒂᒡ ᑯᐃᔅᑯᑕᑎᓯᐅᓂᒡ ᒐᒋ ᐃᓯ ᑭᓄᐛᐱᒥᑕᐧᒄ ᒋᓴᒪᓂᑐᐤ᙮
Currently Selected:
ᕈᒪᓇ 4: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
