THIAMPI NADEHNAK 24
24
Meivak Cinkhawi Daan
(Suah 27:20-21)
1 Topa in Moses nelah hi tin ti hi. 2Israel tei nelah thupia inna, Topa i umnak Puanbuk sung a, meivak a hun manno in, na vak theihnak tukin, olif situi phun phabel hunpih haw hen. 3Mun Thiangthobel sung Thutiam Kuang mai a, ummi puanzak pualamah meivak cu Aaron in, Topa i mitmuhin taksial vak tuk a, zinglam tian vak tuk hi. Hi daan cu kumkhua in zui tuk hi. 4Sui ngek a bawlmi meivaknak ngolh humah mei cu Aaron in phano in zo tuk a, hun manno in, Topa i mitmuhin vak tuk hi.
Pathian Nelah Piakmi Cangho
5Sangvut seu nga la unna, cangho zawl sawm le zawl nih bawl un hi.#Suah 25:30; 6Topa i mitmuhin sui tuah huhmi cabuai humah thuang khatah pa luk tenin thuang nihin koih un. 7Topa i lakah an luih biakpiaknak cangho ai-in cangho thuang nih humah namtui a phabel koih un. 8Sabbath nisial ten, mah cangho cu Topa i mitmuhah koih leleng un. Hihi cu Israel miten a kumkhua in, na bawl tuk uhmi dehvo hi. 9Hi cangho cu Aaron le a casuan teita hi a, mun thiangtho pen ei haw hen, itahim titale thiampi tei ca in, Topa i lakah piakmi biakpiaknak lak pen a thiangtho zetmi hi.#Mt 12:4; Mk 2:26; Lk 6:4;
A Dikmi Dantatnak
10A nu Israel mi, a pa Izipt mi pano pa khat cu Israel tei ngiahnak sungah hawhin Israel mi pa khat tuah haudun haw hi. 11A nu i min cu Shelomith hi a, Daan hinnam sung a, Dibri i canu hi. Mahti bangin a hauhdun haw laihin, mahpa in Pathian min a tamsiat hangin Moses nelah hawhpih haw hi. 12Moses in cingtik a, iti bawl tuk him tih cu, Topa i lak pen thu heng ngak hi.
13 Topa in Moses nelah, 14“Hi pa hi na ngiahnak uh pen pualamah tulpih un. Pathian a tamsiat laih a theitu hempohin, a khial hihim hi tih langtiknakin, hi pa i lu humah a khut haw suang ten haw hen; mahten Israel mi venghawngin suang tuah sep hum haw hen hi. 15Pathian a sonsiatu cu hi pa bangin bawlsiat tawk tuk uh ci, 16thah hi tuk uh ci, tin Israel mite cu na hilhin hi. Israel mi hihen, Israel mi lak a, ummi ngamdangmi hihen, Pathian a tamtu cu Israel mipi in suang tuah seh hup hi tuk hi.
17“Mi a thattu cu thah hi bok tuk a,#Suah 21:12; 18midang tei ngan a thattu cu ngan bokin kuan hen. Nunnak cu nunnakin kuan hi bok tuk hi.
19“Mi pa khatin midang a liamsuah tale, amah vang thuk kik bok tuk hi. 20Mi i nguh pa khat a ektik tale, ama nguh pa khat ehtik hi bok tuk hi. Mi i mit pa khat a pholhsuah tale, ama mit pa khat pholhsuah hi bok tuk hi; mi i ha pa khat a ektik tale, ama ha pa khat ektik hi bok tuk hi. Midang a liamsuahtu cu liamsuah hi bok tuk hi.#Suah 21:23-25; Daan 19:21; Mt 5:38; 21Ngan a thattu in, ngan bokin kuan hen a, mahnaven mihing a thattu cu amah thah hi bok tuk hi. 22Hi daan cu Israel mi hihen, nangmuh tei lak a, ummi namdangmi hihen, na venghawng uhin, na zui tuk uhmi hi, itahim titale keimah cu Topa na Pathian uh ing,” ti hi.#Mipum 15:16;
23Moses in Israel mite thuhilhin, mitamtu pa cu pualeu lamah tulpihin, suang tuah sep hum haw hi. Topa in Moses lak a, thu a piak bangin Israel miten bawl haw hi.
Currently Selected:
THIAMPI NADEHNAK 24: NBF1
Highlight
Copy
Compare
Share
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
