THIAMPI NADEHNAK 25

Kum Salihnak

(Daan 15:1-11)

1 Topa in Moses nelah Sinai Mualhum pen,#Suah 23:10-11; 2a nuailam a daan cu Israel tei lak piak tukin thupia hi. Topa in, a piak tukmi ngamah na hentum uhten kum salihnak kum cu lo bung pahsuh un. Topa na upatnak uh cu mahti bangin langtik un hi. 3Kum luk sung na lo uh a, an cu cing tuk uh ci, na sabit dum uh thiangtikin, a kak talhin, lo ante cawm un hi. 4Mahnaven a kum salihnak cu na lei ngam uh a colh kum, Sabbath kum, Topa i nelah na piak kum uh hi tuk hi. Na lo uhah anci na cing pahsuh un. Na sabit dum uh vang thiangtik pahsuh un hi. 5Na cin uh hi ngawl na pi in, na lo uhah a po lelengmi ante hei na la pahsuh un. Na selh uh ngawlmi na sabit kak a, sabit ngah vang na thawi pahsuh un: na leingam a colh kum hi tuk a, tawngkha pahsuh un. 6Mah kumin, na lo uh bung tukma uh ci. Mahnaven nangmuh le na sila uhte, nadeh na cialmite le nangmu nel a, um ngamdangmi cu na bun uh ngawlmi ngamin cawm tuk hi. 7Inn ngulh ngan le lam lak ngamsa vang cawm tuk hi. Bun ngawlmi ngam pen a suakmi hempoh cu eih hi tuk hi.

Jubilee Kum

8Kum salihin, vei salih, a venghawngin sawm li kum kuah a kim tian sial un. 9Mahnung ha salih ha, ni sawm ni lemnak ni-in, mi pa khat na ngam uh buppi ah pengkul tumtik un hi. 10Kum sawm nga kum cu Jubilee#25:10 Jubilee: tihmi hi Hebru awnin yobhel pen hungmi hi in, a tih nuammi cu tuucangki tihnak hi. Mah puai hun ten tuucangki a tum mek haw hangin min a piaknak haw hi. kum cu thiangthotikin, ngamsung a um mihing hempoh lakah suahcaknak thu than tuk uh ci. Hi kumin, na zuaksa uhmi hempoh cu a masa neitu lakah ahimata a lo cotu, a casuan lakah, kikleh khawng hi tuk hi. Sila in, a zuak sa haw mite vang amu unaupih tei lakah kikleh khawng haw hen hi. 11Na lo uhah anci cing pahsuh un. A po cawm mi an vang la pahsuh un hi. Na selh uh ngawlmi na sabit dum a, sabit ngah vang thawi pahsuh un. 12Mah kum cu Jubilee kum hi a, nohtei ca in kum thiangtho hi. Na bun uh ngawlmi ngam pen a suakmi an bek na ei un hi.

13Hi kumin zuaksa mi na hempoh a masa, neitu lakah piak kikleh khawng hi tuk hi. 14Mah hangin na hinnam Israel mi pa kha khat nelah leingam na zuak ten hihen, a lak pen na lei ten hihen thuman ngawlin zuakin, leidun pahsuh un. 15A man cu mai Jubilee kum a henleh laklawh sungin, hi leingam pen kum izah sung an izah suaktuk him tih zo in, a man ciangtan tuk hi. 16Kum tampi sam laih tale, a man tam tuk a, kum demno bek a tang tale, a man niam sak tuk hi. Itahim titale a zuak ngangai haw mi cu lei ngam pen a suakmi an na hi haw hi. 17Israel na mi nampih zol pahsun; Pathian kihca saw in, Keimah hi Topa na Pathian uh ing.

Kum Salih Kum Haksatnak

18Hi ngam sungah lungmuang zetin, na umnak tukin, Topa i daan le thupiakmite na zui un hi. 19Leingam pen an suak tuk a, na eih nuam uhmi ngah khawng tuk uh ci, mahten ngam muang zetin um tuk uh ci. 20Mahnaven mi pa kha khatin hi kum salih kum, lo bun ngawl kum le an lak ngawl kumin, eih tuk i um tuk him tin dong tuk hi. 21Topa in kum luknak kum ten leingam cu muicu pia tuk a, kum thum tiang phat an suak tuk hi. 22Kum liatnak kumin anci na cin uhten kum luknak kum a, na lak uhmi an cu ei leleng tuk laih uh ci; mah kum liatnak kum a, na cin uhmi an na cop laklawh uh hempoh cu an eih sam ngawlin nei tuk uh ci.

Na Khiklehnak

23Na leingam uh cu kumkhua ca in zuak pahsuh uh hi; itahim titale nangmuta hi ma hi, Pathian ta hi, noh cu ngamdangmi hi uh ci a, hun demno sung mantik hihmi bek hi uh ci.

24Leingam na zuak uhten a zuaktu ten lei kikleh theihnak nei hen hi. 25Israel mi pa kha khat a zawn hangin a leingam a zuak tale, a naibel unaupihin lei kikleh thei tuk hi. 26Lei kikleh saktu tuk unaupih a nei ngawltu in, a nungten lei lehnak tuk sumpai a neileh thei tale, 27A lei kikleh theih ni pen Jubilee kum tian tuatin, a zuaknak pa i nelah a man pia tuk a, mahten a leingam cu laleh hen hi. 28Mahnaven lei kik lehnak sumpai nei ngawl leleng ahi tale Jubilee kum a kim laklawh cu a leitu pa in, nei hih tuk hi. Jubilee kum ten a lakah kikleh hi tuk hi.

29Khuapi kulhtian sung a, inn cu a neitu pa in, a zuak ten kum khat sungin tatleh theihnak nei tuk hi. 30Mahnaven kum khat sungin a tanleh thei ma tale lei kikleh theihnak nei tukma hi. Mah inn cu kumkhua in, a leitu le a casuan teita hi tuk hi. Jubilee kum hei in kikleh hi tukma toh hi. 31up ngawlmi khuasung inn cu pualam inn bangin ngaihsut hi tuk a, nei masa atu-in tan thei tuk hi. Jubilee kumin kikleh khawng theih hi tuk hi. 32Mahnaven Levi hin ten Levi khuapi innte cu a nuam ten tanleh thei haw tuk hi. 33Upmi khuapi inn cu Levi mi in zuakin, a tanleh ma tale Jubilee kumah kikleh hi tuk hi. Itahim titale khuapi sung a, Levi hin tei inn cu a kumkhua in amuta hi. 34Mah i hum pen Levi mitei khuapi elkim a ngam cu zuak ngawlin a kumkhua in amata hi.

Ca-ngah Tei Lakah Sumpai Coihdan

35Na elkim uh a, ummi na phunpih uh Israel mite ca-ngah zetin, a nun a haksa tale, na el uhah, a um leleng theihnak tukin na umlawh uh, ahimata mikhual na cawm uh bangin cawm bok un.#Daan 15:7-8; 36Sum na coih uh tale, a khang la pahsuh un, Pathian kihca unna, mi ca-ngah pa cu na el uhah um bok hen hi. 37A khang tuah sum coih pahsuh un. A met tuk hei in, an zuak pahsuh un.#Suah 22:25; Daan 23:19-20; 38Hihi cu Topa na Pathian uh i thupiakmi hi. Amah cu na Pathian uh a hihnak tukin le Kanaan ngam na co theihnak tukin Izipt ngam pen a tulpihtu hi.

Salte Suahtiknak

39Na elkim uh a um na phunpih uh Israel mi pa khat ca-ngah zetin, a nun theih ngawl hangin, sila cang tukin a zuakdun cop ahi tale sila nadeh dektik pahsuh un.#Suah 21:2-6; Daan 15:12-18; 40Ni lawh piakmi umlawh bangin na lak uhah um henna, mai Jubilee kum tian nadek hen hi. 41Jubilee kum a hen ten amah le a ca ten nangmuh cu zamin, a unaupihte le a pu le pa tei leingamah kik haw hen. 42Israel mite cu Topa i sila hi uh ci, amah in Izipt ngam pen a suah zo toh hangin salin zuakmi hi toh pahsuh un. 43Na Pathian uh kihca unna, ama hilh bangin mi ca-ngahte bawlsia pahsuh un. 44Sila na nei nuam uh tale na elkim uh a, um ngamdang mite lei thei uh ci. 45Nangmu lak a, um ngamdangmi lak pen a cano lei thei uh ci. Na ngamsung pen hin mi a cate haw cu na neih uhmi in suak thei tuk hi. 46Na capa tei ca in, lo le lamin pia thei uh ci, na capa tei nunsung cu a na deksak haw tuk hi. Mahnaven na unau Israel mi cu bawlsia pahsuh un.

47Nangmu lakah a um ngamdangmi ahimata na nadektu pa kha khat hausa in, na unau uh Israel mi pa khat a ca-ngah leita hangin mah mihau pa i nelah sila in, a zuak copdun tale, 48a lei nung hei ten, tatleh theihnak um tuk hi. A ma unau pa kha khat, 49ahimata a pa i unaupih maw, pa khat nu dang unau maw, ahimata a unaupih pa kha khatin, tanleh thei tuk hi. Mah ahimata amah in sum a nei thei tale amah le mah pandun hen hi. 50Amah a leitu pa tuah lungkimnakin, amah le mah a zuakdun copnak pen mai Jubilee kum tian a kum sial haw tuk a nadehtikmi pa i ni lawhman tuat bangin, a suahcak man cu ciangtan haw hen hi. 51A luatnak tuk kum ngeipi a sam laih tale, a leinak man cu tuatin aman ciangtan tuk hi. 52Jubilee kum tian kum demno a sam tale, kum tuatin aman ciangtan haw tuk hi. 53Kum khat nung kum khat nadehtikmi mihing bangbok lengin ngaisungin, ngamdang mitei khutnuai ah um tuk hi; mahnaven a leitu pa in bawlsia hihim pahsuh hen. 54A hum a suahcak theihnak lampi tawnin, a suakca thei cuang ma tale mai Jubilee kumah amah le a cano cu suahcaktik hi tuk hi. 55Israel mite cu Topa i sila na hih uh hangin midang tei sila in, a kumkhua in, hi thei tukma uh ci. Izipt ngam pen a suahtul mite hi uh ci. Amah cu Topa na Pathian uh hi.

Currently Selected:

THIAMPI NADEHNAK 25: NBF1

Highlight

Copy

Compare