THIAMPI NADEHNAK 23

Biaknak Puaite

1 Topa in Moses nelah, 2Israel mite tawkdun khawmin, Pathian a biak haw ten a theih haw tukin puai bawlnak tukin a nuailam a daan pia hi. 3Nangmu nate ni luk sung dek un hi. Mahnaven a ni salihnak Sabbath ni cu colhup ni hi, tih cu cing leleng un. Mah ni-in nadek pahsuh un hi. Munkhatno ah Pathian bia ten saw un. Ilai banglai na um uh vangin Sabbath ni cu Topa ta hi.#Suah 20:8-10; 23:12; 31:15; 34:21; 35:2; Daan 5:12-14; 4A nuailam a puai cu amu hun tekin bawl tukmi hi.

Kaltan le Naman Hel Ngawl Cangho Puai

(Mipum 28:16-25)

5Kaltan puai,#23:5 Kaltan Puai: tihmi cu Hebru awnin Pesach ti haw in, Kaltan tihnak hi; March ha, ni sawm le ni li pen a panmi hi. Topa pahcoihnakin bawlmi puai cu ha masabel a ni sawm le ni li ni taklam nitum pepan hi.#Suah 12:1-13; Daan 16:1-2; 6Ni sawm le ni nga ni-in Naman hel ngawl Cangho Puai panin, ni salih sung cu naman tuah bawlmi cangho ei pahsuh un hi.#Suah 12:14-20; 23:15; 34:18; Daan 16:3-8; 7Puai sung a ni khatnak ni-in Pathian bia tukin hung khawm unna, imah dek pahsuh un. 8Na an luih biakpiaknak cu Topa i nelah, ni salih sung pia un hi. A ni salih ni-in Pathian bia tukin tawkdun khawm leleu unna, imah dek pahsuh un.

9 Topa in Moses nelah hitin hilh hi 10Topa i piakmi ngam hengin, na lo an na cop uhten a masabel tel khat cu thiampi nelah pia un hi. 11Topa i cosan mi na hihnak tukin, thiampi in Topa i nelah a cuangin biakpiaknak bawl tuk hi. Mahmi cu thiampi in Sabbath ni a zingleh ten pia tuk hi. 12Topa i nelah biakpiaknak na bawl ni uhin, kum khat a kimmi sonbang ngawl tuucang pa khat vang halkang biakpiaknakin mang un hi. 13Mahmi tuah mun khatin olif thau tuah cawhhelmi sangvut vawh khat cu an tuah biakpiaknakin mang un. Hihi cu Topa i nelah namtui mi hi. Mah hum pen sabittui khuat nih vang pia cih un. 14An tuah biakpiaknak Pathian nelah na piak uh laih ngawlin anthak na lak uhte cu a sial hei in hihen, a phan hei in hihen, cangho bawlin hei hihen, ei pahsuh un. Hi daan cu na casuan uh tian a kumkhua in zui leleng un hi.

Ankung Cop Puai

(Mipum 28:26-31)

15 Topa i nelah cangtel masabel na piak ni uh, Sabbath ni a zingleh pepan ni pi salih kimno in sial unna,#Suah 23:16; 34:22; Daan 16:9-12; 16ni sawm nganakin, a vei salihnak Sabbath a zingleh ten na anthak uhte cu Topa i nelah pia un hi. 17Innkua pa khatin cangho phil nih ten Topa i nelah pia un. Cangho phil khat cu sangvut leel lang tuah naman helin bawl unna, an tuah biakpiaknakin, Topa i nelah pia un. 18Mahmi cangho tuah kum khat kim sonbang ngawl tuucang salih, khuicang pa khat le keel pa nih cu Israel mi in, na pia un hi. Mah mite cu an tuah biakpiaknak le sabittui biakpiaknak tuah halkang biakpiaknakin, Topa i nelah pia un hi. Mah biakpiaknak cu Topa ca in, a namtui mi hi. 19sualhah biakpiaknakin keelcang pa khat le lemnak biakpiaknak tukin kum khat kim tuu pa nih pia un. 20Mah cangho le tuu pa nih cu thiampi teita tukin thiampi in, Topa i nelah pia hen. Hih biakpiaknak hi a thiangthomi biakpiaknak hi. 21Mah ni-in kuamah nadek pahsuh un. Pathian biak tuk bekin khawm un hi. Ilai banglaiah a um haw hei in, na casuan uhten hi daan cu kumkhua in zui leleng haw tuk hi.

22Na lo a, an na cop uhten lo ngi tianin la pahsuh un. Ansang zei tuk hei in hawhleh pahsuh un. Mah mite cu mi ca-ngah le ngamdangmi tei lak tukin zam un hi. Keimah cu Topa na Pathian uh ing.#Thiam 19:9-10; Daan 24:19-22;

Kum Thak Puai

(Mipum 29:1-6)

23 Topa in Moses nelah hi bangin hilh hi. 24Ha salihnak ni sawm ni cu a dangno in, nipi ni-in cang un. Pengkul a tum haw ten Pathian bia tukin khawm un. 25Nadek pahsuh unna, Topa i nelah biakpiaknak bawl un hi.

Lemnak Ni

(Mipum 29:7-11)

26 Topa in Moses nelah hi bangin hilh hi;#Thiam 16:29-34; 27Ha salihnak ni sawm ni-in Israel tei sualhahnak tukin kum sial bawlmi biakpiaknak bawl un. Mah ni ten imah ei pahsun un. Pathian biaknak munah khawm unna, Topa i nelah biakpiaknak bawl un hi. 28Sualhahnak tukin biakpiaknak na bawl ni uh a hih hangin nadek pahsuh un hi. 29Mah ni an a eitu cu Pathian i miphunin sialcih hi tukma toh hi. 30Mah ni-in, nadektu cu Topa amah loli in thitik tuk hi. 31Ilai banglai a um haw hei in, hi daan cu na casuan uh hempoh tei zui tukmi hi. 32Mah ha, ni kuah ni, nitum pepanin, ni sawm ni nitum tian a cuangin, na can uhmi ni hi tuk a, imah ei pahsuh un.

Deubuk Puai

(Mipum 29:12-40)

33 Topa in Moses nelah hi bangin ti hi.#Daan 16:13-15; 34Deubuk puai cu ha salih ha, ni sawm le ni nga ni pepan ni salih sung hi tuk hi. 35Amasabelin Pathian bia tukin khawm unna, nadek pahsuh un. 36Ni salih sung nisialin biakpiaknak bawl un hi. Ni liatnak ni ten Pathian bia tukin khawmkhawm lehleu unna, biakpiaknak bawl un. Pathian biak ni a hih hangin nadek pahsuh un hi. 37Hi puai cu Topa bia tukin khawmdunin, Topa i nelah upat na piak uh hun hi, mah hum pen nisial a kulmi an luih biakpiaknak, halkang biakpiaknak, an tuah biakpiaknak, a dang biakpiaknak le sabittui biakpiaknak na bawl uh hun vang hi. 38Hi puai cu na can leleng uhmi Sabbath ni i humah betmi hi. Hi biakpiaknak vang hi Topa i lak a, na piak leleng uhmi laksawng le thutepdunnak kim tukin bawlmi biakpiaknak le mai lungtho a, piakmi biakpiaknak humah betleh mite hi.

39Ha salihnak ni sawm le ni nga ni-in, na lo uh ante na cop ceng uhten ni salih sung puai bawl un. Mah puai a, ni masabel cu a cuangin nipi ni-in, na cang un.#Suah 23:16; 34:22; 40Mah ni ten na thingngah uh lak pen a phabel le suhsau ceh le a ceh bommi thingkakte la unna, Topa na Pathian uh upatnak puai bawl un hi. 41Ni salih sung puai bawl un. Hi daan cu na casuan uhten a zui leleng haw tukmi hi. 42Israel mite cu Topa in Izipt ngam pen a puitul ten deubuk thawthongah um haw hi, tih cu na casuan uhten a theih hawnak tukin hi. 43Israel mi hempoh cu deubuk sungah ni salih sung um un hi. Amah Topa cu na Pathian uh hi.

44Mah hangin Topa a upatnak haw tukin biaknak puai bawl ten, a zui haw tukin a hum a daan cu Israel tei nelah Moses in pia hi.

Currently Selected:

THIAMPI NADEHNAK 23: NBF1

Highlight

Copy

Compare