EZEKIEL 7

Israel Ca In Hunbonak Nai

1 Topa in ka lakah, 2“Mihing pa, Ezekiel aw, Cungnungbel Topa Keimah in, Israel ngam tei humah ka otmi cu hihi, hi: na ngampi uh i huntawpnak nai zo.

3“Israel, a hun tawpnak tuk heng zo hi. Ka thinuknak tawk tuk ci, itahim titale na thil bawlmi hangin na humah thukhennak hengtik ing. Na nuncan ningdelhhuai hangin na humah phu la tung. 4Khawih tuk mang, hehpih tuk mang. Ningdelhhuai thil na bawlmi hempoh i hangin nang cu bawlsia tung; mahten Topa ka hihlam thei tuk ci,” ti hi.

5Cungnungbel Topa in, hi bangin ti hi; “Na hum uhah siatlalnak pa khat nung pa khat heng tuk hi. 6A tawpnak hun heng zo hi. Nohte cu a bo uh ci. Bothal zo uh ci. 7Ngamsung a, um nangmuh tei ca in, a tawpnak haw heng pal tuk hi. Mualsang hum khawhuai biaknak munah lungdamin, puai na bawl ngawlnak tuk hun nai zo hi; lungdamnak puai hi ngawltohin thubuai tuah a dimmi hun hi tuk hi.

8“A ngei ngawlin ka thinuknak mual neihzia cu nase zetin tawk tuk uh ci. Na bawl uhmi hangin thukhennak na humah hengtik ing, ningdelhhuai na nuncan uh hangin na humah phu la tung hi. 9Khawih tuk mang, hehpih tuk mang. Ningdelhhuai na bawl uh hangin dantat tung a, Topa ka hihlam thei in nangmuh dantattu ka hihlam vang thei tuk uh ci,” ti hi.

10Israel tei siatlalnak ni heng tuk hi. Thisan luannak pung pepelin; pualthaunak a tawpkhawk tian heng zo. 11Thisan luannak hangin phatngawlnak le siatlalnak suaktik sesem hi. Amuta tuk imah tang tukma: a hauhnak haw, a thupinak haw le a sunloihnak haw cu pa khatno hei tang tukma hi.

12Hun cu heng tuk hi. Thil lei le thil zuak tihte hi imah ngawl a hih huncan nai zo, itahim titale Pathian dantatnak cu mi hempoh humah heng tuk hi. 13Sumbawltu akua nabang hei hihen, a sunmi a ngahleh tian nung tukma; itahim titale Pathian thinuknak cu mi tihkim humah heng hi. Mipha ngawlte cu luat haw tukma. 14Pengkul tumin mi hempoh mansa in um haw; mahnaven kuamah ngaldonakah hawh haw ma; itahim titale Pathian thinuknak cu mi hempoh humah bangtenin heng tuk hi.

Israel Sualnak Hangin Dantatnak

15Lampi ah dodunnak umin, inn sungah natnak le ngilkialnak um hi. Khua pualam a hawhtute cu dodunnakah thi haw tuk a, khuasung umte natnak le ngilkialnakin thi haw tuk hi. 16Mi khenkhat cu luam sung pen khulo hawlvawk bangin mualsang humah tai in, luat haw tuk hi. A kuakua hei hihen a sualnak haw hangin tau haw tuk hi. 17A khut haw zawng khawngin, a khuk haw can tawtok tuk hi. 18Thangkhau puan silhin, a pumpi cingin can tawtok haw tuk hi. A samte met khawngin, a venghawng mualpho in um haw tuk hi. 19A sui le ngunte cu buak bangin lampi ah vawk haw tuk; itahim titale Topa in, a thinuknak a leih ten a sui le ngun ten pan thei tukma. A an duhnahnak paitik thei haw ma, a vonvahtik thei ngawlin sui le ngun ten sualnakah pui haw hi. 20A mawi zetmi a na manpha haw cu a sunsakzet haw hun um hi; mahnaven mahte cu ningdelhhuai milim bawlnakin mang haw hi. Mah hangin Topa in, a hauhnak haw cu mitkem hahin suaktik hi.

21 Topa in, “A na manpha haw cu ngamdangte longtik tung.” Daan siatsuahtu ten lonsakin, nawngkaitik khawng haw tuk hi. 22Sunloihbelmi ka Biakinn cawmin, a nawngkaitik haw hangin, a dang lamah heksan tung; nguca ten keuletin, a nawngkaitik haw hei in, zothong tung.

23“Ihempoh buai khawng hi: ngam sungah thahdunnak dimin, muntihkimah thisan luannakin dim hi. 24Misualbel miphun hi munah hungin, na inn uhte luahtik tung hi. Miphun dangte na Pathian biaknak mun uh ka nawngkaitik nungten, na mi ngilbel uhte hei ten lau haw tuk hi. 25Lungbingnak heng pal tuk hi. Lemdaihnak zei tuk nave uhcin mu awng tukma uh ci. 26Siatlalnak pa khat nung pa khat zuidunin, thuthangpha ngawl cu tui bangin, na lak uhah luang tuk hi. A muhnak haw phuang tukin profet ngen tuk uh ci. Thiampi ten mipite zilh tuk imah nei haw tukma, upate vangin thuhilh theih nei haw tukma. 27Kumpi cu mithi ngai in um tuk hi; a capa vang thinkham lungbingin um tuk a, mipite cu lauthawngnak hangin can tawtok haw tuk hi. Na thil bawl uhmi hangin dantat tung a, midang tei hum a, thu na khen uh bangbokin, na hum uhah thukhen bok tung. Topa ka hihlam na lak uhah lang tuk,” ti hi.

Currently Selected:

EZEKIEL 7: NBF1

Highlight

Copy

Compare