EZEKIEL 8

Ezekiel In Pathian A Muh Vei Nihnak

(8:1-10:22)

Jerusalem Ah Milim Biaknak

1Sal ka tannak uh kum luk kum, ha luk ha, ni nga ni-in, sal mat Judah mi hotute cu ka innah khungin thuson ung. Thakhat thu in, Cungnungbel Topa i khut cu a huham tuah ka humah heng hi. 2Ka zoto le mei bangin mihing pian bang mu ing. A tai nuailam cu mei bang hi; a tai humlam cu nawt ciangmi daal bangin de hi.#Ezk 1:27; 3Khut bangkekin keimah sawkin, ka sam pen man hi. Pathian i hawvangin huih lakah cawi in, Jerusalem ah koih hi. Pathian a thinuktiktu milim a koihnak haw Biakinn saklam kongkhah sunglam kongka ah hawhpih hi.

4Mahlai Khebar Ngunpi mawkah ka umlaihin, ka muhmi, Israel Pathian i umnak mun hi tih langtiktu, a de zetmi vaknak mu ing.#Ezk 1:28; 5Pathian in, “Mihing pa, Ezekiel aw, saklam zo hemin ti hi!” Ka zoto le Pathian thinuktiktu milim cu kongkhah el a, biaklandawhah umin mu ing.

6Pathian in, “Mihing capa, hi a bawl haw mi hi mu cim? Ka mun thiangtho pen a khawlanakah keimah a hawlvawk pepeltu, Israel tei bawlmi ningdelhhuai nate hi zo hemin! Hi sangin a ningdelhhuai sesem mu tuk ci,” ti hi.

7A pualam inntual tumnak kongkhahah hawhpihin, pang awng pa khat keimah lak hi. 8“Mihing pa, Ezekiel aw, hilai pen pang keulet hemin ti hi!” Ka keulet le kongka pa khat mu ing. 9“Tum inna, mahlai a, ningdelhhuai a bawl haw khi zo in ti hi!” 10Ka tum le ka zoh ten pang humah ngulzukte, a dang ngamsa thiang ngawl zuk a suai haw cu mu ing. 11Mahlai ah Israel hotu upa sawm salih um haw in, Shafan i capa Jaazaniah vang tel bok hi. Namtui halnak kuang cawi tek haw in, namtui a halmi haw pen meikhu kaito ngut hi. 12Pathian in, “Mihing pa, Ezekiel aw, Israel hotu ten khuathim sungah a bawlkuh haw mi mu a cim? Khan pa khat sungah a dimin ummi milim bia li haw! Amuh ten, ‘Topa in mu sapma poh! A ngam uh nunghek zo ti haw hi.’ ”

13 Topa in ka lakah, “Hi sangin a nawngkai saw a bawl haw mi mu tuk laih ci,” ti hi. 14Mah hangin Biakinn saklam kongkhahah hawhpihin, numei ten a pathian haw Tammuz#8:14 Tammuz a tih haw mi cu hampa a thih ten thi bokin, a tawtleh ten nungleh bok hi tin um haw hi. a thih hangin a kah lih haw lak hi.

15 Topa in, “Mihing pa, Ezekiel aw, hihi mu cim? Hi sangin a ningdelhhuai saw mu tuk laih ci,” ti hi. 16Biakinn sunglam khanah hawhpih leleu. Mahlai ah Topa i inn thiang kongka el biaklandawh le inntual laklawhah mihing sawm nih le pa nga um haw hi. Mun thiangtho cu nunghek sanin, ni suahnak lam hekin, kun haw in, a suak limi ni cu bia haw hi.

17 Topa in, “Mihing pa, Ezekiel aw, hi khi mu cim? Hi Judah miten hi na muhmi ningdelhhuai a bawl haw hum pen a ngamsung haw muntihkimah thisan luannak zaitik pepel haw naven, a thincim haw ma laih. Biakinn sung loli ah hungin a bawl haw hangin ka thinuk dedeuh hi. Iti zahin mitkem hahin kaw kei a zotsak haw hi zo tehin! A naal hawah thingkakte khaih haw hi. 18Ka thinuknak nase zetin thuak haw tuk hi. Kuamah khawih tuk mang, hehpih tuk mang. Ka lakah a aw neih tawp haw tuah thungenin, au haw tuk naven theihsak tuk mang,” ti hi.

Currently Selected:

EZEKIEL 8: NBF1

Highlight

Copy

Compare