EZEKIEL 6

Topa In Milim Biaknak Lawl

1 Topa in ka lakah, 2“Mihing pa, Ezekiel aw, Israel mualsangte khi zo inna, ka thu cu hilhin hi. 3Israel mualsang tei lakah Cungnungbel Topa i awnkam cu hilhin hi. Cungnungbel Topa in, mualsangte, mualniamte, hawkluamte le munlawn tei lakah ka otmi hi a theihnak haw tukin na hilhin hi. Mipi tei milim a biaknakte siatsuah tukin ngalnam pa khat hah tung. 4Biakpiaknak biaklandawhte cu siatsuah khawng hi tuk a, namtui halnak biaklandawhte cu sukkeh khawng hi tuk hi. Mahlai a mihing hempoh cu a milim haw mai pen thah khawng hi haw tuk hi. 5Israel tei luang cu khua tihkimah khenkhek khawng tung, a nguh haw vang biaklandawh tei kimkotah theh zau khawng tung. 6Israel ngamsung khua hempoh cu siatsuah khawng hi haw tuk a, biaklandawh le a milim haw cu vahkeh khawng hi haw tuk; a namtui halnak biaklandawhte cu sukeh khawng tung, a bawlmi haw hempoh cu pailal khawng tuk hi. 7Khua tihkimah mihingte cu that haw in, a nung calam ten Topa ka hihnak cu thei haw tuk hi.

8“Mi khenkhat cu thahnak pen luattik tung a, miphun hempoh tei lakah khen khek tung a; 9ngam hempoh ah salin cang haw tuk hi. Upnak nei ngawlin a lungmu sung haw pen kei cu zamsanin, keimah sangin milim a deih saw deuh haw hangin dantatin, mualpho in ka umtik cu mahlai pen thei in cing haw tuk hi. Thil pha ngawl le thil nawngkai a bawl haw hangin amuh le muh ningdelh duncop haw tuk hi. 10Keimah cu Topa hi ing a, ngallinnak ka hilhmi cu zolnak thong kha ma tih thei haw tuk,” ti hi.

11Cungnungbel Topa in, “Na baibengin, ke tawh inna, Israel tei ningdelhhuai le thil sual a bawl haw hangin thasia zetin kapin hi. Ngal, pamnak le natnakin maw thi haw tuk hi. 12Lam khawla umte cu natnakin thi haw; lam nai umte cu ngalkhutin thi haw tuk; a tang calamte cu an ngawlin thi haw tuk hi. Ka thinuknak cu nasezet thuak haw tuk hi. 13Miluangte cu milim tei lakah, biaklandawh tei elkim le mualhum tihkimah hei hihen, cehhing thingkung nuai le sasua kungpi nuai tihkim le a milim haw lakah hihen, halkang biakpiaknak mun tihkimah khen khek khawng hi haw tuk hi. Mi hempoh ten Topa ka hihnak cu thei haw tuk hi. 14Hi zuh hi, ka khut ka zak ten a ngam haw cu siatsuah khawng tung hi. Hanglam phillawn pen saklam a ummi Riblah khua tian calubuak seh khawm bangin suaktik tung; Israel tei umnak ilai banglai ah hei hihen khawih tuk mang. Mi hempoh ten Topa ka hihlam thei haw tuk tin,” ti hi.

Currently Selected:

EZEKIEL 6: NBF1

Highlight

Copy

Compare