SUAHTULNAK 37
37
Thutiam Kuang Bawl Haw
(Suah 25:10-22)
1Bezalel in Thutiam Kuang cu thingha tuah bawlin, tong nih le lang sau, tong khat le lang zal, tong khat le lang sang hi. 2A sunglam hihen, a pualam hihen sui ngek luanin, a kimsuakin sui tuah bawlmi hi. 3Suikual pa li bawlin langkhat lamah pa nih veve in, a ke pa liah bulh hi. 4Thingha tuah a zawnnak ngolh pa li cu bawlin suikhu luan hi. 5Thutiam Kuang zawnnak cu langkhat lam veve a, suikualah holh hi. 6Thingkuang sin cu sui ngeh bawlin tong nih le lang sau in tong khat le lang zal hi. 7A kuang sin i langkhat lam mawk veveah Cherub tihmi ngamsa zuk pa nih sui tuah bawlin, 8mawk khatah pa khat veve koih hi. Adangno hi ngawlin a sin tuah pehdun khawng hi. 9Cherub tihmi ngamsa zuk cu a humah a ha haw phalhin, kuangsin cu a ha haw in lim hi. Mai hekdunin kuangsin cu zo veve haw hi.
Cangho Luihnak Tuk Cabuai Bawl
(Suah 25:23-30)
10Amah in thingha tuah cabuai bawlin tong nih sau, tong khat zal, tong khat le lang sang hi. 11Sui ngek tuah luanin, a kimsuak cu sui tuah khup hi. 12A mawk khapnak cu zung li zal, bawlin, a kimsuak cu sui leleng tuah khup hi. 13Suikual pa li bawlin, a ke el cabuai kil liah bulh hi. 14Mah suikual pa li cu cabuai zawnnak a lentu a hih hangin cabuai mawk khupnak zawnkekah bulh hi. 15Zawnnak ngolh cu thingha tuah bawlin suikhu luan hi. 16Cabuai hum a inmi biakpiaknak a, man tukin pakante, keute, khuat le kuangte cu sui ngekin bawl haw hi.
Meivaknak Khuam Bawl
(Suah 25:31-40)
17Amah in meivaknak khuam cu sui ngek tuah bawl hi. A tawdam le a khuam cu pha zetin sukmi sui tuah bawl hi. A mawitiktu pak, a kuhkuum le a palh cu a khuam tuah pehdun khawng haw hi. 18A khuam pen a kak pa luk tulin langkhatah kak thum veve um haw hi. 19A kak tihkimah almond pak bangin a kuhkuum le a palh tuah a mawitiktu pak pa thum ten um haw hi. 20Meivaknak khuamah almond pak bangin a kuhkuum le a palh tuah a mawitiktu pak pa li um haw hi. 21A kak kop khat nuaiah pak kuhkuum pa khat ten um hi. 22Pak kuhkuum le a kak cu meivaknak khuam tuah pehdun khawng haw hi; sukmi sui pa khat tuah bawlmi hi. 23Meivaknak khuam pa khat humah meivak salih bawlin caiceh le daal kuangte cu sui tuah bawl hi. 24Meivaknak khuam le a na hempoh bawlnakin sui pawng za khat mang hi.
Namtui Halnak Biaklandawh
(Suah 30:1-5)
25Thingha tuah namtui halnak tukin biaklandawh bawl hi. A tung le a vang cu canve hi, tong khat sau le zalin, tong nih sang hi. A hum a bulhmi thingzum cu biaklandawh tuah pehdun khawng hi. 26A humah hihen, a hum a thingzum bulhmi le a mawk pa li hihen, suikhu luanin, a kimsuak cu sui tuah khup hi. 27Suikual pa nih bawlin mah biaklandawh puaknak ngolh holhnak tukin a mawk lek a, nuailam mawk nihah mah suikual cu bulh hi. 28A zawnnak ngolh cu thingha tuah bawlin suikhu lot khawng hi.
Sathau le Namtui Bawl
(Suah 30:22-38)
29A thiangthomi sathau thihnak tukin situi le zimui bawltu tei a bawl mek haw bangin a namtui zetmi zimui bawl hi.#Suah 30:22-38;
Currently Selected:
SUAHTULNAK 37: NBF1
Highlight
Copy
Compare
Share
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
