SUAHTULNAK 36

1“Bezalel, Oholiab le Topa in khutzung thiamnak le thil tih theihnak a piakmi ten Puanbuk ca a kulmi hempoh bawl tukin a theitu a hih haw hangin Topa i thupiakmi bang cikcekin, bawl khawng haw tuk,” ti hi.

Israel Ten Laksawng Tampi Hunpih

2 Topa in khutzung thiamnak a piak zo mite Bezalel, Oholiab le a dang khutzung thiam le nadeh bawm nuam cu Moses in samin, nadek pantik hi. 3Israel miten Puanbuk thiangtho saknak tukin sum le pai a piakmi haw hempoh cu a lak hawah Moses in pia khawng hi. Mah hum pen Israel miten zingsialin, a sum le pai haw cu Moses lakah hunpih haw hi. 4Puanbuk thiangtho saknak na phunkim dektu mithiam ten a nadeh haw zamsanin hung haw a, 5Moses lakah, “Topa in dek tukin a thupiakmi bawlnakin a kulmi sangin tam saw deuhin pia zo haw hi,” tin hilh haw hi.

6Mah hangin Moses in mipi lakah thuthanin, “Numei hihen pano hihen, Puanbuk thiangtho saknak tukin kuamah in sum le pai pia toh pahsuh un,” ti hi. Mahnung cu Israel miten imah hunpih haw ma toh hi. 7A piaksa haw mi cu a bawl haw tuk hempoh a bawl khawng haw hei ten bo awng tukma hi.

Pathian Umnak Puanbuk Sa Haw

(Suah 26:1-37)

8Nadektu tei lak pen khutzung thiambel ten Pathian umnak Puanbuk cu sa haw hi. Puan manpha mepian, sandup le puansan, cherub tihmi ngamsa zuk cuangin coihmi le a canmi puan zun sawm tak haw hi. 9Puante cu a sau lam kaih sawm le kaih li le a zallam kaih nih ten hi. 10Zun nga cu peh haw in, a dang zun nga vang peh haw hi. 11Mah pehmi puan humtabel a mawk veveah mepian puanin, a beng bawl haw hi. 12Puan pehmi pa khatnakah beng sawm nga bawlin, a pa nihnak puan pehmiah beng sawm nga bawlbok haw hi. 13Buk cu umnak pa khatin suak tukin puan khaihnak suikual sawm nga bawl haw in, mahmi in puan thuah nih cu peh hi.

14Puanbuk khuhnak tukin keelmul tuah puan zun sawm le zun khat tak haw hi. 15Zun khatah kaih sawm le kaih nga sau in, kaih nih zal hi. Puan cu tiadun khawng haw hi. 16Puan zun nga cu zun khatah peh haw in, a dang zun luk vang peh leleng bok haw hi. 17A peh haw mi pa khatnak puan mawkah puan beng sawm nga bawl haw in, a pa nihnak puan mawk heiah puan beng sawm nga bawl leleng bok haw hi. 18Buk pa khat suak tukin puan khaihnak daalkual sawm nga bawlin puan thuah nih cu mah daalkual tuah peh haw hi. 19Buk khuhnak tukin a san tuah buhmi tuucang phaw le mah humah khuh tukin saphaw pha bawl haw hi.

20Puanbuk pang cu a tung zawngin bawl haw a, thingha tuah bawl haw hi. 21Pangte cu pek khatah tong sawm sau in, tong khat le a lang ten zal hi. 22Pang pek khat le pek khat peh kawmnak tukin a mawk cu kuat tek haw hi. Pang a venghawngin mahten bawl tek haw hi. 23Hanglam pang tukin pek sawm nih bawl haw in, 24pang tawdam cu ngun tuah bawlmi tawdam sawm li bawl haw hi. A kuatnak zawn haw pen a dotu tukin pang pek khatah tawdam pa nih ten koih haw hi. 25Sak lam pang tuk hei in pek sawm nih bawl haw a, 26pang pek khatah tawdam pa nih tenin ngun tawdam sawm li bawl haw hi. 27Nitumnak lam, buk nunglam pang tukin pang pek luk le, 28buk nunglam kil nihah khaltun pek nih bawl haw hi. 29Hi a kil a pang pek nih cu a tawdam pen a lek a, ummi kual tian, pehdun khawng haw hi. Pangkil nih a, pang pek nih cu mahti bangin bawl khawngmi hi. 30Mah hangin pang pek liat umin pek khatah tawdam pa nih tenin ngun tawdam sawm le pa luk um haw hi.

31Thingha tuah pangzawl bawl haw a, saklam pangah pangzawl pa nga, 32hanglam pangah pangzawl pa nga le nitumnak lam buk, a nunglam pang tukin pangzawl pa nga bawl haw hi. 33Pang laizang zawn a bulh haw mi pangzawl cu kil khat pen kil khat tian sau hi. 34Pang hihen, pangzawl hihen, suikhu luan haw a, pang humah bulhin, suikual sungah pang zawl cu holh haw hi.

35Puanzak cu mepian, sandup, a san mi tuumul le phan mi puan manpha, Cherub tihmi ngamsa zuk cuangin coihmi puan tuah bawl haw hi. 36Puanzak khaihnak tukin thingha tuah khuam pa li bawl haw a, mah khuam cu suikhu luan haw in, suikual a humah bulh haw hi. Khuamte dotu tukin ngun tawdam pa li bawl haw hi. 37Puanbuk sung tumnak puanzak cu mepian, sandup, a sanmi tuumul le phan mi puan manpha, coihmi puanin bawl haw hi. 38Khuam pa nga bawlin, mah humah a kual bulh haw hi, khuam le a zik cu suikhu lot haw hi. Mah khuam tei ca in daal tuah bawlmi tawdam pa nga bawl haw hi.

Currently Selected:

SUAHTULNAK 36: NBF1

Highlight

Copy

Compare