SUAHTULNAK 35

Sabbath Can Tuk Daante

1Moses in Israel mi hempoh cu munkhatah khawm khawngin, a lak hawah, “Topa i thupiakmi na bawl tuk uh mite cu hi bangin hituk hi; 2Ni luk sung na dek un hi; mahnaven ni salih ni cu nangmu ca in ni thiangtho hi a, ni sunglawi, na nadehnak uh pen na colh ni uh, Topa i ca in thianthohtik mi ni hi tuk hi. Mah ni ten akua hei hihen na a dek tale thah hi tuk hi.#Suah 20:8-11; 23:12; 31:15; 34:21; Thiam 23:3; Daan 5:12-14; 3Hi sabbath ni-in, na umnak pawpoh uhah mei lam pahsuh un hi,” tin hilh hi.

Pathian Puanbuk Ca Piakmi

(Suah 25:1-9)

4Moses in Israel mi lakah, “Topa i thupiakmi bangin, 5Topa i lakah sumpi pia un hi. Sumpi a pia nuam hempoh ten sui, ngun, daal; 6mepian, san dang, a sanmi, tuumul puan manpha, keelmul tuah tahmi puan, 7tuucang phaw, a san a buhmi, saphaw pha le thingha, 8meivaknak situi, sathau thih tuk le zimui namtui a phunkim, 9suang manpha a san le Thiampi Sang i silh tuk awmbelh tuk le angki thiangtho sungsilh hum a belh tuk suang manpha pia un,” ti hi.

Puanbuk Nate

(Suah 39:32-43)

10“Nangmu lak a, khutzung lam thiam hempohin Topa i thupiakmi hempoh cu bawl un hi. 11Pathian umnak inn tukin puanbuk le a humkhuh, pangte, puan khaihnak kualte, pangzawl, khuam le a tawdamte, 12Thutiam Kuang le a zawnnak ngolhte, kuangsin le kuang limtu puanzakte, 13cabuai, cabuai zawnnak ngolhte le a nate, Pathian lak a, piak tuk cangho, 14meivaknak khuam le a nate, mei inn le mei inn ca situi, 15zimui namtui halnak tuk biaklandawh le a zawnnak ngolh thih tuk sathau, zimui namtui, puanbuk tumnak kongka puanzak 16halkang biakpiaknak biaklandawh le biaklandawh hum a, dapmi daal khocang, biaklandawh zawnnak ngolh le a nate, khut somnak kuang le a tawdam, 17Puanbuk upnak puanzak, a khuam le a tawdam, kongkhah puanzak, 18Puanbuk le a upnak ca tukin na bahnak le a khau, 19mun thiangtho sung a, thiampi tei man mi puan sunglawi le a man phami, thiampi Aaron le a capa tei thiampi na a deh haw ten a silh haw tukmi puan thiangtho cu bawl haw hen hi,” tin Moses in ti hi.

Israel Ten Sumpi Pia Haw

20Mah nungten Moses lak pen Israel mite cu a umnak ten hawah pin haw hi. 21Thiampi puan thiangtho bawlnak tuk, Topa i Puanbuk saknak tuk le buk sung nadehnak tukin a kulmi hempoh cu a pia nuamte le lung a thotu ten Topa i lakah sumpi pia haw hi. 22Numei hihen, pano hihen hungin mawitiknak a, belhmi a phunkim le bengbet, khut zungbut, lawngawh le sui tuah bawlmi nate cu pha zetin pia haw hi. Mi hempohin Topa i lakah pia tukin a ngaihsutmi haw sum le pai, sui tuah bawlmi nate cu Topa i lakah hunpihin pia haw hi. 23Mepian, sandup le a sanmi tuumul hihen, keelmul tuah tahmi puan le a san a buhmi tuucang phaw le saphaw phazet hihen, a neitu in Topa i lakah pia haw hi. 24Ngun hihen, daal hihen a pia theitu ten Topa i lakah pia haw in, thingha a neitu ten inn saknak tukin pia haw hi. 25numei khutzung thiam ten pat kai in mepian, sendaang le a sanmi tuumul puan, nim tuah takmi puan manpha bawlin Topa i lakah pia haw hi. 26Numei khutzung thiam ten keelmul nimin bawl haw hi. 27A puitu haw ten a thiangthomi sungsilh angki le awmbelh humah belh tukin suang manpha a san pia haw in, 28mei-inn vak tuk situi, thihtuk sathau le zimui namtui haal tukin situi le zimui pia haw hi. 29Israel mi hempohin numei hihen, pano hihen, Moses lak pen Topa i thupiak a theih haw bangin a nadehnak tukin a piak nuam haw mi sumpi cu Topa i lakah pia haw hi.

Puanbuk Ca Nadektute

(Suah 31:1-11)

30Moses in Israel tei lakah, “Judah phun sung pen Hur i tupa Bezalel, Uri i capa cu Topa in teng zo hi. 31Topa in Bezalel cu a hawvang tuah dimtikin, khutzung thiamnak, thil bawl thiamnak le khutzung thiamnak tuah bawl theih tukmi theih theihnak nei in, 32pungsan a phunkim suai theihnak le sui, ngun le daal tuah mahmi bawl theihnak nei hi; 33suang manpha tah thiamnak, thingtuah zuk bawl thiamnak le khutzung thiamnak a phunkim nei hi. 34Bezalel cu Dan hin sung pen Ahisomak i capa Oholiab lakah a khutzung thiam haw cu midang zilh thiamnak vang Topa in pia hi. 35Suang humah suang kuat thiamte, thing humah laingat le zuksuai thiamte, pungsan suai thiamte le mepian, sandup le a sanin tak thiam, puan hum a, coih thiam tei thiamnak bangin Pathian in Bezalel le Oholiab lakah thiamnak nase zetin pia hi. Nadeh a phunkim thiam haw in, pungsan a phunkim suai thiam haw hi.

Currently Selected:

SUAHTULNAK 35: NBF1

Highlight

Copy

Compare