SUAHTULNAK 26

Topa Umnak Puanbuk

(Suah 36:8-38)

1“Ka umnak tukin Puanbuk thiangtho cu coihmawi puan manpha, mepian, sandup le a sanmi puan zun sawm tuah bawl un. Cherub tihmi ngamsa ha nei zuk cuangin, mawi zetin coihmi puan tuah bawl un hi. 2Puan cu a sau lam kaih sawm le kaih li, a zallam kaih nih ten bawl un. 3Mah puan zun nga cu pehdun khawm unna, a dang zun nga vang pehdun khawm leleng un hi. 4Mahti bangin na pehdun khawm uhmi puan humtabel i mawkah mepian puan tuah a kual na bawl un. 5Puan pehmi pa khatnakah a beng sawm nga bawl unna, a pa nihnak puan pehmiah a beng sawm nga in bawlbok un hi. 6Puanbuk cu buk pa khat suah theihnak tukin sui tuah bawlmi puan khainak kual sawm nga bawl unna, mah tuahin puan thuah nih cu na peh un.

7“Puanbuk khuhnak tukin keelmul tuah tahmi puan zun sawm le zun khat bawl un. 8Zun khat cu a sau lam kaih sawm le kaih nga le a zallam kaih nih ten bangve khawng haw tuk hi. 9Zun nga cu zun khat suak tukin peh unna, a dang zun luk vang zun khat kim bok tukin peh un hi. A zun luknak cu Puanbuk i mailamah heh nihin hepbuah un hi. 10Na peh uhmi mawk khatlamah puan beng sawm nga bawl unna, a dang na peh uhmi puan mawk heiah beng sawm nga leleng na bawl un hi. 11Puan khaihnak sawm nga cu daal tuah bawl unna, Puanbuk pa khat suak tukin na pehsa uhmi puan pa nih cu mah daal tuah khaih un hi. 12Puanbuk puan a valmi a lang cu Puanbuk nunglamah khaisuk tuk hi. 13Puanbuk a sau zawngin, a khai mi, puan valmi kaih lang veve cu Puanbuk khuhtu in, a sik lamah khai tuk hi.

14“A san tuah nipmi tuucang phaw le a dang saphaw tuah puanbuk khuhnak bawl un.

15“A tungto tukmi Puanbuk khaltun cu thingha tuah bawl un. 16Khaltun cu pek khatah tong sawm sau tuk a, tong khat le lang zalin, 17a pehdunnak pen a mawk cu kuat un hi. Khaltun venghawngin mahti bangin na bawl khawng un hi. 18Khaltun na bawl uhten hanglamah pek sawm nih bawl unna, 19a tawdam cu ngun tuah bawlmi tawdam sawm li koih un. Akua na kuatnak zawn pen a dotu tukin khaltun pek pa khatah ngun tawdam pa nih ten bawl un. 20Saklam khaltun ca tukin pek sawm nih bawl unna, 21khaltun pek pa khat ca tukin tawdam pa nih ten ngun tawdam sawm li bawl un hi. 22Puanbuk nunglam nitumnak lamah khaltun tukin pek luk bawl unna, 23Puanbuk nunglam kilah pek nih bawl un hi. 24Puanbuk kil pa nih a, khaltun pek nih cu a taw lam pen a lek tianin pehdun khawng haw tuk a, a pa nihin mahti bangin bawlmi hi khawng tuk hi. 25Mah hangin khaltun pek liat um tuk a, pa khat nuaiah ngun tawdam pa nih ten ngun tawdam sawm le pa luk um tuk hi.

26Thingha tuah pangzawl bawl unna, pangzawl pa khatah pa nga, 27a dang pang khatah pangzawl pa nga le nunglam nitumnak lamah pangzawl pa nga bawl un. 28Pangzawl laizang zawn a, zawl cu kil khat pen kil khat tian a saumi hi tuk hi. 29Suikual bawl unna, pang humah bulh un hi. Pangzawl cu mah suikual sungah holh un hi. Pang hihen, pangzawl hihen suikhu luan un. 30Mualhum pen ka lakmi bangin puanbuk cu na sa un hi.

31“Mawi zetin coihmi puan manpha le mepian, a san le sandup tuumul tuah puanzak bawl un. Mah puanzak cu Cherub tihmi ha nei ngamsa zuk mawizet tuah coihmi hi haw tuk hi. 32Ngun tawdam pa li pen a dingmi suikhu lotmi, thingha khuam pa li humah suikual tuah puanzak cu khaih un hi. 33Puanbuk khuhnak tuah a pehdun mi puan khaihnak pen puanzak cu khaih un hi. Mah puanzak limah suangpeek pa nih koihnak Thutiam Kuang cu koih un hi. Puanzak cu Mun Thiangtho le Mun Thiangthobel dantu hi tuk hi.#Heb 6:19; 9:3-5; 34Mun Thiangthobel a, ummi Thutiam Kuang cu a sin na sin un hi. 35Puanzak pualamah cabuai koih un hi. Mah cabuai cu saklam mawkah koih unna, meivaknak khuam cu hanglam mawk cabuai ngaldenah koih un.

36“Puanbuk i mailam heiah puanzak bawl unna, mepian, a san, le a sandupmi puan, coihmawi mi puan manpha tuah bawl un. 37Mah puan zaknak tukin suikhu lotmi thingha khuam pa nga bawl unna, sui tuah bawlmi puan khaihnak tuah awktik un. Mah thingha khuam dinnak tukin daal tuah bawlmi tawdam pa nga bawl un hi.

Currently Selected:

SUAHTULNAK 26: NBF1

Highlight

Copy

Compare