SUAHTULNAK 25

Biakbuk Ca Sumpi

(Suah 35:4-9)

1 Topa in Moses lakah, 2“Ka lakah sumpi pia tukin Israel mite hilhin hi. A pia nuam hempoh tei a piak zah haw babangin, na sangin hi. 3Na san tukmi sumpi cu sui, ngun, daal, 4mepian, sandup le sandang tuumul puan, puannem le keelmul tuah bawlmi puan, 5a san tuah buhmi tuucang phaw, saphaw phun pha, a nemmi thingha; 6mei inn ca in zinan le noih tuk sathau, a namtui mi haal tuk zimui; 7thiampi tei awmkhaih le awmbelh hum koih tukmi suangval san le suangval dadang hi tuk hi. 8Amu lakah ka um theihnak tukin, Israel miten ka ca in puanbuk thiang sa haw tuk hi. 9Ka puanbuk thiang le a sung a, na hempoh cu ka lak tukmi bangin bawlin hi.

Thukham Koihnak Thingkuang

(Suah 37:1-9)

10“Thingha thing tuah a zallam tong nih le lang, a vang tong khat le lang, a sanglam tong khat le lang a kim mi thingkuang pa khat bawlin hi. 11A sunglam hihen, a pua lam hihen, suikhu luan unna, a mawk cu suipek tuah kim un hi. 12Suikual pa li bawl unna, langkhat lamah pa nih veve in, a ke pa liah bulh un hi. 13Thingha thing tuah a zawnnak ngolh bawl unna, suikhu luan un hi. 14A zawnnak ngolh cu thingkuang mawk a, suikual sungah holh un hi. 15Hi zawnnak ngolh cu suikual sungah zam tukmi hi a, lak tul tuk kha ma hi. 16mah kuang sungah ka piak tuk thukham ngatmi suangpeek pa nih koih un hi.

17“A sin cu sui ngek tuah bawl unna, a zallam tong nih le alang le a vang tong khat le lang hi tuk hi.#Rom 3:25; Heb 9:5; 18A sin i langkhat lam mawk veveah sui tuah seekmi Cherub ha nei ngamsa zuk pa nih bawl unna, 19mawk khatah pa khat ten koih un hi. 20Cherub pa nih cu a humah a ha haw phalhin, kuang sin khuh haw tuk a, maitondunin kuang sin zo veve haw tuk hi. 21Kuang humah a sin cu koih unna, kuang sungah ka piak tukmi thukham ngatnak suangpeek pa nih koih un hi. 22Mahlai pen nangmuh tawk tung a, kuangsin le a hum a, ummi Cherub pa nih laklawh pen Israel tei ca in ka thukham hempoh pia tung hi.

Pathian Lakah Piakmi Cangho Koihnak Cabuai

(Suah 37:10-16)

23“Thingha in cabuai pa khat bawl unna, tong nih sau, tong khat zal le tong khat le lang sang tuk hi. 24Mah cabuai cu sui ngek leih unna, a mawk kimsuak un hi. 25A mawk khuhnak cu bok thum zalin bawl unna, sui lelengin bawl un. 26Suikual pa li in bawl unna, a ke umnak killi ah bulh un. 27Mah suikual pa li cu cabuai zawnnak ngolh lentu hi haw tuk a, cabuai mawk khupnakah bulh un hi. 28A zawnnak ngolh cu thingha tuah bawl unna, suikhu tuah leng bawl un. 29Kuang, keu, khuat le kuangte cu inmi biakpiaknak tukin sui ngek tuah bawl un. 30Cabuai cu Thutiam Kuang maiah koih unna, ka ca in, na luih uhmi cangho thiang cu cabuai humah koih leleng un hi.#Thiam 24:5-8;

Meivaknak Khuam

(Suah 37:17-24)

31“Meivaknak khuam cu Sui tuah bawl un. A tawphah le a khuam cu seekmi sui tuah bawl unna, a mawitiktu pak, a kuhkuum le a pak cu a khuam tuah pehdun khawng haw hen hi. 32A khuam pen a kak pa luk um tuk a, langkhat lamah kak thum veve um haw tuk hi. 33A kak hempoh ah almond pak bangin a kuhkuum le a pak tuah a mawitiktu pak pa thum ten um tuk hi. 34A khuamah almond pak bangin a kuhkuum le a pak tuah a mawitiktu pak pa li um tuk hi. 35A kak kop thum i nuai tekah pak kuhkuum pa khat ten um tuk hi. 36A kuhkuum le a kak cu a khuam tuah pehdun khawng haw tuk a, seekmi sui ngek pa khat tuah bawlmi hi tuk hi. 37Mah meivaknak khuam pa khat humah mei salih vak unna, a mailam al tukin vak un hi. 38Caiceh le daalkuang vang sui ngek tuah bawl un. 39Hi meivaknak khuam le na hempoh bawlnak tukin sui pawng za khat mang un. 40Mualhum a, ka lakmi inn luangpi bang kek khin komno in bawl un hi.#Nung 7:44; Heb 8:5;

Currently Selected:

SUAHTULNAK 25: NBF1

Highlight

Copy

Compare