DAAN PIAKLEHNAK 9

Topa i Thu Ngai Haw Ma

(Suah 32:1-35)

1Maw Israel mite, ngai un! Jordan ngun tanin, nangmuh sangin a ngeng deuh le a ngildeuhmi hinnam tei umnak ngam luah tuk uh ci. A khuapi haw cu ngeng zetin, a kulhtian cu van khong hi. 2A mihingte cu dingsau in, ngilsih haw hi; tawmi bang haw a, kuamah i neh tuk hi kha moh haw ma hi, tih cu na theih zo uhmi hi. 3Mahnaven atu na mitmuh uhin, Topa na Pathian uh cu na mai uhah mei alh bangin hawh tuk hi. Mailamah not dedeuh tuk uh ci a, amah in neh tukin a tepsa bangin ngalte cu hawlvawkin siatsuah khawng tuk uh ci.

4Mah ceng ten, “Topa na Pathian uhin, a hawlvawk ten, ‘ka phatnak uh hangin, hi ngam luah tukin henpih hi,’ ti pahsuh un. Na phatnak uh hangin kha ma hi, hih hinnamte hi mipha ngawl leita a hih haw hangin Topa in hawlvawk hi saw hi. 5Mipha na hih uh hangin le na bawl uhmi a dik hangin Topa in, a ngam haw pia kha ma hi. Hi hinnamte hi a phatngawl haw hangin le na pu le pa uh Abraham, Isaak le Jakob tei lak a thutepnak a bawlmi a kimtik tum hangin hawlvawk tuk hi. 6Piak tak na hih uh hangin hi bang ngampha hi Topa in nohte pia kha hihim ma hi, tih cu ciangno in thei un. Thungai in titale nohte cu mi lungmu ngoltolte hi uh ci.

7“Topa na Pathian uh cu a thinuktik uh ci, tihvang phawkngil pahsuh un. Izipt ngam pan na tul phut uh pepan tuni hilai mun na hen uh tian Topa cu langpang leleng laih uh ci. 8Sinai Mual hei pen Topa cu a thinuktik uh ci, nangmuh siatsuah khawng nuam tianin, a thinuk hi. 9Topa in nangmuhte tuah thutepnak a bawlmi ngatnak suangpeekte la tukin mualhumah hawh ing. Mahlaiah sun sawm li le zan sawm li sung imah ei le in ngawlin um ing.#Suah 24:18; 10Mah nungten Topa in suangpeek pa nih pia hi. Mualhum a, na tawhdun khawm ni uhin mei alh sung pen na lak uhah a hilhmite cu ama khut hihim tuah hi suangpeek humah ngan hi. 11Hi zuh hi! Ni sawm li le zan sawm li nungten thutep a ngatnak suangpeek pa nih cu Topa in keimah pia hi.

12“Topa in ka lakah, ‘Manlangin mualhum pen tolhsukin, itahim titale na mihingte, Izipt ngam pen na puitulmi ten thil nawngkai le thil sual bawl haw hi. A zui haw tuk thu ka piakmite pialin, amu ca in milim bawl zo haw hi.’

13‘Topa in ka lakah, ‘mi lungmu ngoltol hihim haw hi, tih cu thei zo toh ing. 14Mah hangin kham nuam pahsun. Leihum pen a nun haw pailal tukin amuhte cu phiat mang tuk tum ing. Amu sung pen amuhte sangin hau saw le ngil saw miphun pa khat tultik tung hi,” ti hi.

15“Mah hangin mualhum pen tolhsuk ing. Mualhum pen mei alh pi cu tul zuzut hi. 16Mah hun ngeican um ngawlin Topa a Pathian uh i thupiakmi cu siatsuahin, khuicang zuk cu thik tuah bawlin Topa i humah sual tatak uh ci tih cu ka mitin mu ing. 17Mah hangin na maicang uhah suangpeek cu sepin, keh belhtik ing. 18Mahnung ten Topa i mai ah sun sawm li le zan sawm li sung leihumah bokleh ing; Topa i humah na sual uh hangin le a thin na uktikleh uh hangin mahtin um ing a, an hei ei mang, tui vangin mang hi. 19Nangmuh siatsuah khawng tuk tianin, a thin a uk hangin Topa i thinuknak cu lauzet ing hi, mahnaven Topa in ka thu cu theihpih hi.#Heb 12:21; 20Topa cu Aaron humah thah nuam tianin, a thinuk bok hi; mah hangin Aaron ca vangin ngetsak nek bok ing. 21Na sual mualphonak uh cu thik tuah na bawl uhmi khuicang milim cu la in, mei sungah vawk ing. Sukeh khawng ing. Ngawi vamin, a vam cu mualhum pen a luangmi luino ah hak ing.

22 Topa na Pathian uh cu Taberah, Massah le Kibroth Hattaavah ah na um uh laih hei in, a thinuktik zo uh ci.#Suah 17:7; Mipum 11:3, 34; 23Kadesh Barnea na um uh laih vangin a piak tukmi ngamah hawh tukin le luah tukin hah naven, a thu cu elin langpang uh ci; Topa cu muang ngawlin a thu vang zui ma uh ci.#Mipum 13:25-14:38; Daan 1:21, 26; Heb 3:16; 24Ka theih tung pepan Topa langpangtu hi leleng uh ci.

25Mahti bangin nangmuh siatsuah khawng a tum hangin Topa i mai ah sun sawm li le zan sawm li sung ka mai lei tawngkha tian bok ing. 26Thungen ing a, “Maw Topa Pathian, na baantha ngil le na huham tuah Izipt ngam pen na suahtulmi na mihingte hi siatsuah zal pahsun hi. 27Na salpa Abraham, Isaak le Jakob ngaisung inna, hi tei lungmu ngoltolnak, nawngkainak le sualnak hi imah simsial kha pahsun. 28Mah hi ngawlin, na that khawng ngangai tale, a thutep bangin a mihingte cu Kanaan ngamah henpih thei ma hi, tin Izipt miten ti haw tuk si. A huat hangin tulpihin phillawnah a venghawng haw in that khawng hi, tin Izipt miten ti haw tuk hi. 29Itahim titale amuhte cu na thawm ngengnak le na baantha ngilnak tuah na tulpihmi le nangma hinnam hi tukin na ten sa mi hi haw hi,” tin ti ing.

Currently Selected:

DAAN PIAKLEHNAK 9: NBF1

Highlight

Copy

Compare