DAAN PIAKLEHNAK 8
8
Luah Tukmi Ngampha
1“Tuni ka piakmi thukham hempoh hi komno in zui khawng un hi. Mahti bangin na bawl uh tale nung tuk uh ci, pungzai in, na pu le pa uh lak a, Topa i tepsa mi ngam cu luah tuk uh ci. 2Phillawn ngamkhingah kum sawm li sung Topa na Pathian in pui in, a thupiakmi zui tum haw maw, zui tum haw ma him, tih na lungmu sungah na ngaihsutnak uhte thei nuamin, na lak uh a, haksatnak a hentik daante ngaisung un hi. 3Ngilkialin koih hi. Mahnung ten nangmuh le na pu le pa tei eih awng ngawlmi manna cangho na eih tukin pia hi. Hi bangin a bawlnak cu an bek nunnak hi ma hi, Pathian awnkam hi nunnak hi tih na theihnak tukin hi.#Mt 4:4; Lk 4:4; 4Na vahvaihnak uh kum sawm li sungin na puansilh uhte sia ngawlin, na ke uh vang bum ma hi. 5Pa in, a cano nun a hilh bangin Topa na Pathian uhin nohte cu nun hilhin, bawlsiatnakte na thuak mek uhte vang phawkngil pahsuh un. 6Mah hangin Topa i thupiakmi bangin nung un, a thukham bangin zui unna, amah cu kihca un. 7Topa na Pathian in ngam pha, tuipi le tuikhuk umnak, luam sung le mualhum pen a put tulmi ciktui umnak, 8sangvut le barli sangvut, sabit, thei, taleti, olif le khuaihum tei umnak ngamah nohte cu henpih hi. 9Mah laih ngamah ngilkialin um awng tukma uh ci, tingsam hei in um tukma uh ci. Hih ngamsung pen thik suak tuk a, mualhumteah daal cawh theihnak ngam hi. 10Eih tuk na duhnah hempoh nei tuk uh ci, mahten Topa na Pathian uh cu thangphat tuk uh ci.”
Topa Na Phawkhngil Uhtale
11 Topa na Pathian uh na phawhngilh ngawlnak tukin ngalling un; tuni ka piakmi a daan hempoh pa khat hei pelh ngawlin zui un.#Hos 13:5-6; 12Eih tukin na duhnah uhmi hempoh ngahin, na umnak tuk uh inn phazet na sak celh uhten hei hihen, 13na khui le tuu, na sui le ngun le na sum le pai uhte pungzai in, a tampi nungten, 14pualthau in sal na tannak uh Izipt ngam pen a puitultu, Topa na Pathian uh cu phawkngil pahsuh un. 15Hitih zahin, a zalmi le a lauhuai phillawn, ngu nei ngul le tii tei umnak sung pen pui hi. Hitih zahin, a ko mi le tui um ngawlnak suangpi sung pen nangmu ca in tui puttik hi. 16Phillawn pen na pu le pa tei eih awng ngawlmi manna cangho cu na eih tukin pia hi. Mailam ten na phawhlehnak tukin haksatnak tuah nohte cu khingkhai hi. 17Mah hangin keimu ngilnak le tha neihnak hangin nei in hau ung hi, tin ituk mahten ngaisung pahsuh un. 18Na hauhnak tukin ngilnak huham a piatu cu Topa na Pathian uh hi, tih cu thei leleng un. Hi bangin a bawlnak cu na pu le pa tei lakah thutepnak a bawlmi a kimtik hangin hi, tuni hei in mah thutep cu khohtik tukin deih hi. 19Topa na Pathian uh cu phawkngilin, pathian dadang bia pahsuh un. Na phawkngil uh tale, tuni in ciangno in hilh ing, siatsuah khawng hi tatak tuk uh ci. 20Topa i thu na zui uh ma tale mailamah na not dedeuh uh hun ten hi ngam a minamte a paih laltik khawng bangin nohte vang paih laltik hi bok tuk uh ci.
Currently Selected:
DAAN PIAKLEHNAK 8: NBF1
Highlight
Copy
Compare
Share
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
