TITUS 3
3
Gamtat Hoite Zomsuoh in
1Amate in gam-uhte le thuneite’ thu mangin, sil hoi zosie sem dingin a baisa-in a om vua, 2koima tungah kamsie ham loin mi tawh kihau kisel ding a pelh nading ule nunnemin mi vannuoi tungah gamtat khuoheh hoi a lah thei nading uh amate na phawhsah in. 3Bangzieh ahei cile eite mama zong hun khat lai-in mi mawlawm, thu mang lo, a lampiel mangte, cilesa lunggulna le nopsahna tuomtuomte’ sila i na hi ngai vua, eite in gitlona le hazatna sungah i hun i nite zangin, mite in ei muda a, eite khatlekhat zong a kimuda ngaite i hi uhi. 4Ahi vangin i Hundam pa uh Pasien’ migitna le itna ang kilaa tah ciengin, 5eite sepsa dihna khatpo zieh hi loin, tui#3:5 Gk “sawpsiengna “ tawh suokiana le Hlagau Siengtho zieha thasuona tungtawnin, ama’ ei khuotuona hang tawh ama in eite ei hunkhie hi. 6Ama in i Hundam pa Jesu Khris tungtawnin eite tungah tua Hlagau siengtho cingtahin ang sungsuh hi. 7Tua pen ama’ hepina tawh eite dih ei kitangsah a, i lamet uh ahi kumtawn hinna tawh kizui-in gouluote i suo nading ahi hi.
8Tam thu kigen pen a man ahi hi.
Pasien a umsa mite in kidawm taha nasep hoi sem dinga amau le amau a kipumpieh thei nadingun amate in tami thute a thupisim ding uh ka dei hi; tam thu teng pen mi zosie adingin sil hoi tungtuong pen le sil phatuom pen ahi hi. 9Ahi vangin a mot huoi kiselnate, khangsimnate, kihaunate le thukham vai-a kiselnate na pel in, azieh pen tua thute in phattuomna le kimanna a nei sih hi. 10Kikhen nading a piengsah mi poma khatvei ahi sihle nivei thu na hil zaw ciengin na thudon nawn sin. 11Tua bang mite pen a kisiesa mi le mawna tawh a kidim mi ahi a, ama le ama a kimawpai ahi lam na thei hi.
Thugen Nukhiate le Thupha Piehna
12Artemas ahiei, Tychicus ahiei na kunga kang sawl ciengin Nicopolis khuo ka kungah nang haw thei nadingin hing hanciem ta’n, bangzieh ahei cile khumnah phalbi sung a tam dingin ka khensat zo hi.#Sawl 20:4; Eph 6:21-22; Col 4:7-8; 2Tim 4:12 13Khuolzinna lamkalah bangma tasap nei lo dingin upadi siempa Zenas le Apollos-te na hi thei za-in na hu in.#Sawl 18:24; 1Cor 16:12 14Mite ommawh loin tasap awnghu thei ding le nasep hoite sem dinga amau le amau a kipieh nadingun na kisin pelmaw uheh.
15Keima tawh a om mi zosie in nang ang noset uhi. Upna sungah ei it mite ei na noset pieh in. Note zosie tungah hepina hing om taheh.#3:15 Tang laibute ah “Amen” kibelap hi.
Currently Selected:
TITUS 3: ZBOTF01
Highlight
Copy
Compare
Share
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
