KILAHNA 3
3
Sardis Hlattuom Pawlpi Tunga Thu Kigen
1“Sardis khuo hlattuom pawlpi’ vantungmi tungah giel in: Pasien’ hlagau sagi le aasi sagi a nei pa’ thugen tam bang ahi hi:
“Na nasepte ka thei a, a hing min na puoh vangin a si na hi bo hi. 2Khanglo inlen, a si dihtaha om a hing lai mite thakhausah in. Bangzieh ahei cile ka Pasien mai-ah na nasepnate a bucingin ka mu sih hi. 3Tua ciengin na sansa le na zahsa thute phawhkia inlen, tua thute zui-in kisiakia in. Na khahlaw sih leh na kungah guta bangin kang pei ding a, kang pei hun ding na thei sih ding hi.#Mat 24:43-44; Luk 12:39-40; Kln 16:15 4Hizongle Sardis khuo ah a puonsil uh a niehsah lo mi themkhat na nei lai hi. Amate a kilawm ahi ziehin puonpaa silin kei tawh vah kawikawi ding uhi. 5Na guolzaw leh nang zong amate bangin puonpaa ang kisilsah ding a, hinna laibu sung panin na min ka phiet sih ding hi. Ka Pa mai le ama’ vantungmite mai-ah na min ka pulah ding hi.#Pei 32:32-33; Late 69:28; Kln 20:12; Mat 10:32; Luk 12:8 6Hlattuom pawlpite tunga Hlagau thugen khu bil nei poma in za taheh.
Philadelphia Hlattuom Pawlpi tunga Thu Kigen
7“Philadelphia khuo hlattuom pawlpi’ vantung mi tungah giel in:
A siengtho, a thuman pa, David’ tawhtang nei pa,
a hon ciengin koima in kha zo loin,
a kha ciengin koima in a hon zo lo pa’
thugen tam bang ahi hi:#Isa 22:22; Job 12:14
8“Na nasepnate ka thei hi. En in, koima in a kha zo lo kot honsa khat na mai-ah ka koi hi. Thahatna themno khat beh na nei vangin ka thu zui-in keima’ min na nuol lo lam ka thei hi. 9Na mai-ah Jew mi hi lo napi ka hi uhi, ci-a zuou a gen Satan’ pawlte peisahin na kephungah ka bawhsah ding a, tuaci’n nang kang it lam amate ka theisah ding hi.#Isa 49:23; 60:14; 43:4 10Lungduoi tahin thuohzawhna thu tawh kisai ka thu zui zo na hi ziehin, leitunga teng mite sittel nadingin leitung buppi-a ang tung ding hahsatna hun panin kang kem ding hi. 11Keima kang pei bai ta ding hi; koima in na kumpi lukhu ang lahpieh lo nadingin na neisate tukip in. 12Guol na zaw leh ka Pasien’ biehinnpi sungah khuompi kang suohsah ding a, tua panin na pusuoh ngai nawn sih ding hi. Ama tungah ka Pasien’ min le ka Pasien kung vantung pana ang kumsuh Jerusalem khuo tha ahi, ka Pasien’ khuopi’ min le keima’ min tha ka giel ding hi.#Kln 21:2; Isa 62:2; 65:15 13Hlattuom pawlpite tunga Hlagau thugen khu bil nei poma in za taheh.
Laodicea Hlattuom Pawlpi Tunga Thu Kigen
14“Laodicea khuo hlattuom pawlpi’ vantungmi tungah giel in: Pasien’ siem nate’ a bul,#3:14 Ahi sihle “a kipatna “ a muonhuoi le a thuman teci ahi Amen’ thugen tam bang ahi hi:#Pau 8:22
15“Na nasepnate ka thei hi; vot lah vot lo, sa lah sa loin na om hi. Na vot leh vot kicien inlen, na sat lezong sa kicien vet lacin ka dei hi. 16Tuaci’n vot lah vot lo, sa lah sa loin lum lemlem na hi ziehin ka kam sung panin kang sekhie ding hi. 17Azieh pen nang in, ‘Kei ka hau a, ka nuomsa hi. Tasap bangma ka nei sih hi,’ na ci hi. Hinanle a genthei, a hepihuoi, a zawng, a mittaw, le a guohtanga om na hi lam na kithei sih hi. 18Tua ahi ziehin na hau thei nadingin kei kung panin mei tawh a kihalsiengsa kham, guohtanga om na hi lam mite ang muna panin na zum sel nadingin na sil ding puonpaa, khuo na mu thei nadingin mitza na lei nadingin thu kang hil hi. 19Keima in ka itte phawhsie-in thu ka hil hi.#Pau 3:12; Heb 12:6 20Ngai in! Kotkhah gei-ah dingin kot ka kiu hi; ka aw za a, kot nei hon leh na sungah hing lutin nang tawh an netonin, nang in zong kei tawh an na neton ding hi. 21Keimama guolzo-in ka Pa tawh ama’ topha tungah ka toton ma bangin, a guolzo pa zong ka topha tungah keima tawh a toton thei nading mun khat ka pie ding hi. 22Hlattuom pawlpite tunga Hlagau thugen khu bil nei poma in za taheh,” a ci hi.
Currently Selected:
KILAHNA 3: ZBOTF01
Highlight
Copy
Compare
Share
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
