PHILIPPI-TE 2

Khris’ Kiniemkhiehna Ette Ding

1Tua ahi ciengin Khris sungah kihansuona, itna tawh kihenepna, hlagau sunga kipawl theina, kilainatna le kilungsietna khatpo a op leh, 2lungsim kibang kuo-in, itna kibang nei a, lungsim kihuolin kithutuoh unlen, ka lungnopna kicingsah un. 3Huoihamna le kihisahna tawh bangma sem loin, kiniemkhiehin noma sangin midangte a hoizaw-in ngaisun un. 4Noma’ phattuomna ding beh ngaisun loin, midangte’ phattuomna ding zong ngaisutpieh un. 5Khris Jesu sunga a om#2:5 Ahi sihle “note in na nei uh” tami lungsim, note sungah zong omsah un.

6Ama in Pasien’ pienzie nei napi,

Pasien tawh kizakim ding a tu tentun sih a,

7ama le ama kihawmsuohsah tawmin,

sila lim la-in mihing bangin ang piengzaw hi.

8Tuaci’n mihing mel hing puo a,

ama le ama kiniemkhieh tawmin,

a sina tanpha-in thu mangin,

singlamte tung nangawnah sina a thuoh hi.

9Tua ahi ziehin Pasien in ama thupi tahin tawisang a,

min zosiete sangin a thupizaw min a pie hi.

10Tuaci’n vantung, leitung le

lei nei-a om zosiete in Jesu’ minin

a khupdin ding vua,

11Pa Pasien’ minthan nadingin leii zosie in

Jesu Khris khu Topa ahi hi,

ci-in a pulah ding uhi.#Isa 45:23

Leitungah Khuovahte Bangin Tang ding

12Tua ahi ziehin ka itte aw, note in ka thu nei man zingsa ma bangun, ka op sung beh hi loin, tu ka op lo sungin zong ei mangzaw kan lai unlen, zauna le linna lungsim tawh na hutdamna uh na cingtahsah un. 13Bangzieh ahei cile ama’ lungkimna banga na sep nop nading ule na sep thei nadingun note sunga na ang sem pa, Pasien ahi hi.

14Phun lo niel loin sil bangkim sem un, 15tua hile lungsim kawi le a letat khang mite laizangah mukawh om lo, nuol bei le khielna a nei lo Pasien’ tate na suoh ding vua, leitungah aasi bangin na tang ding uhi.#Thkna 32:5 16Hinna thu na tuhkip ziehun Khris’ ni ang tun ciengin kei pen a mawh tai le a mawh sep ka suo lona thu ka kisiel thei ta ding hi. 17Ahi vangin na upna ziehun silpieh ding le biehpiehna-a gaw dingin ei kisungsuh nanle note zosie tawh lungdamin ka kipah veve hi. 18Tua ma bangin note zong kipahin keima tawh a lungdamton ding na hi uhi.

Timothy le Epaphroditus

19Note’ thu ka zahna ziehin keima zong ka lungnop tuom nadingin a sawt loin na kung vuah Timothy kang sawl ding hi, ci-in Topa sungah ka kinem hi. 20Note’ phattuom nadinga ang lunghimawpi tahtah ding ama bang koima dang ka nei sih hi. 21Amate in a unpi-un Jesu Khris’ phattuom nading sui loin amau’ phattuom nading a sui uhi. 22Hizongle tapa in a pa tawh na a septon bangin, ama in lungdamna thu nasepna-ah keima tawh na semton zo a, note in zong Timothy’#2:22 Gk “ama’ “ manphatna na thei uhi. 23Tua ahi ziehin ka vai ding a kitel zaw lien ciengin ama ang sawl pai dingin ka kilamen hi. 24Keima zong a sawt loin ang haw thei dingin Topa tungah muonna ka nei hi.

25Ka sanggampa, ka naseppi le ka galkappi pa, ka kitasapna ei seppieh, na kamtai pa#2:25 Gk “sawltahpi” Epaphroditus zong na kung vuah sawl ding kisam hi, ci-in ka ngaisun lai hi. 26Bangzieh ahei cile ama in note zosie ang ngai ngetngut a,#2:26 Adang tang laibute ah “ang mu nuom mama uh a” note in a dam lona thu na zah ziehun ama zong a lunghel mama hi. 27Ama pen a cina tahpi hi a, zong a si dihtah phiel ahi hi. Hizongle Pasien in ama hepi a, ama beh hi loin kei zong ei hepi hi. Tua hi sihle ka dana a kibelap to sawnsawn ding ahi hi. 28Tua ahi tah ziehin note in ama na mukia ciengun na lungdam thei nading ule ka lunghimawna a kiem tuom nadingin ama kang peisah ding ka kin semsem hi. 29Tua ahi ciengin Topa sungah lungdam tahin ama na sang unlen, tam bang mite na patawi bo un. 30Bangzieh ahei cile ama pen Khris’#2:30 Adang tang laibute in “Topa” ci-in giel hi. nasepna dingin note in nei seppieh thei lo uh nasepnate a sem dinga a hinna khamin a silaw dihtah vawt pa ahi hi.

Currently Selected:

PHILIPPI-TE 2: ZBOTF01

Highlight

Copy