GAMLAH VANA 28
28
Nisiel Biehnate
(Pei 29:38-46)
1 Topa in Moses hopi-in tam bangin a gen hi: 2“Israel-te thupie inlen amau’ tungah tam bangin gen in: Keima dinga mei tawh kihal biehna an, a gimnamtui keima-a’ pen a kise hunin ka kungah nei pieh ding uh phawh un. 3Nangma in amate kungah, Tami khu Topa tunga na pieh ding uh mei tawh kihal biehna ahi hi, na ci ding hi: Tatsat lo biehna-in nisielin paubang lo kumkhat a pha tuuno ni na pie ding uhi. 4Zingmawngin tuuno khat na pie ding vua, khuo a mut ciengin#28:4 Heb “nitah ni kikal” adang tuuno khat na pie ding uhi. 5Note in an tawh biehna dingin annel tuituoh ephah khat’ sesawm-suo-sekhat le a kigawi sathau ephah khat’ seli-suo-sekhat zong halin na pie ding uhi. 6Tam pen Sinai Muol tunga kikipsah, Topa tungah a gimnamtui dinga kitatsatlo-a kipie mei tawh kihal biehna ahi hi. 7Dawn thei biehna pen tuuno khatah hin khat’ seli-suo-sekhat hi ding hi; Topa tunga dawn thei biehna dingin siengtho munah lenggazu-cia pen na sung ding uhi. 8Tuuno adang khat pen zingmawnga a khat ma bangin khuo a mut#28:8 Heb “nitah ni kikal” ciengin an tawh biehna le dawn thei biehna tawh na pie ding uhi; note in Topa tungah a gimnamtui dingin mei tawh kihal biehna na lui ding uhi.
Sabbath Biehnate
9Sabbath ni-in kum khat a pha, paubang lo tuuno ni le an tawh biehna-in sathau tawh kihal annel tuituoh ephah khat’ sesawm-suo- seni le dawn thei biehna tawh hi ding hi. 10Tam pen a kitatsatlo meihal biehna le dawn thei biehnate banah Sabbath siela na bawlbe ding uh meihal biehna ahi hi.#Mat 12:5
Hlasiel Biehnate
11Na hlate uh a kipat sielin Topa tungah meihal biehna na pie ding vua, bawngtang guol ni, tuutang khat, paubang lo kum khat a pha tuuno apa sagi hi ding hi; 12bawngtang khatah an tawh biehna-in sathau kihal annel tuituoh ephah khat’ sesawm-suo -sethum zong hi ding hi; tuale tuutang khatah an tawh biehna dingin sathau kihal annel tuituoh ephah khat’ sesawm-suo-seni hi ding hi; 13tuuno zosie adingin an tawh biehna-in sathau kihal annel tuituoh sesawm-suo-sekhat hi ding a, tua khu Topa tungah mei tawh kihal a gimnamtui meihal biehna ahi hi. 14Bawngtang khatah dawn thei biehna-in zu hin khat’ alang, tuutang khatah hin khat’ sethum-suo -sekhat, tuuno khatah hin khat’ seli-suo-sekhat hi ding hi. Tami khu kum khat sungin a hla siela meihal biehnate ahi hi. 15Topa tungah mawna zieha biehna dingin keel apa khat kipie ding hi; tua pen kitatsatlo-a meihal biehna le dawn thei biehnate bana kipie ding ahi hi.
Peisan Pawi Biehnate
(Siem 23:5-14)
16Hla masa a ni sawm le li ni-in Topa’ Peisan Pawi kibawl ding hi.#Pei 12:1-13; Thkna 16:1-2 17Tam hla a ni sawm le nga ni pen pawi bawl ni ahi hi; ni sagi sung tol saw lo an kine ding hi. 18A ni masa ni-in siengtho kikhopna khat om ding a, leitung nate na sem sih ding uhi. 19Topa tungah meihal biehna-in bawngtangno ni, tuutang khat, le kum khat a pha tuuno apa sagi na pie ding uhi; tuate pen paubang lo hi ding hi, ci thei un. 20Amau’ an tawh biehna pen sathau kihal annel tuituoh hi ding hi: Bawngtang khatah annel tuituoh ephah khat’ sesawm-suo-sethum na pie ding vua, tuutang khatah sesawm-suo-seni hi ding hi; 21tuuno sagite khatah sesawm-suo-sekhat na pie ding uhi; 22thoidamna bawl nadingin mawhna zieha biehna-in keel apa khat zong hi ding hi. 23Tam teng pen zingmawng tatsatlo-a kibawl meihal biehnate banah na bawlbe ding uh ahi hi. 24Tua bangma-in mei tawh kihal an tawh biehna ahi, Topa tunga a gimnamtui, ni sagi sung ni sielin na pie ding uhi; tatsatlo-a kibawl meihal biehna le dawn thei biehnate banah tuate kipiehbe ding hi. 25A ni sagi ni-in a siengtho kikhopna khat na nei ding uhi; tua ni-in leitung nasepte na sem sih ding uhi.#Pei 12:14-20; 23:15; 34:18; Thkna 16:3-8
Nipi Pawi Biehnate
(Siem 23:15-22)
26 Topa tungah biehna-in ga masa na pieh ni uh, nipikal pawi sung antha na pieh ni-un a siengtho kikhopna khat na bawl ding uhi; khum ni-in leitung nate na sem sih ding uhi. 27Topa tungah a gimnamtui meihal biehna na lui ding vua, bawngtang ano ni, tuutang khat, le kum khat a pha tuuno apa sagi hi ding hi. 28Amau’ an tawh biehna dingin bawngtang khatah sathau kihal annel tuituoh ephah khat’ sesawm-suo-sethum, tuutang khatah sesawm-suo-seni, 29le tuuno sagite khatah sesawm-suo-sekhat ciet na pie ding uhi; 30note ading thoidamna bawlna-in keel apa khat hi ding hi. 31A tatsatlo-a bawl meihal biehna le an tawh biehnate banah tuate le dawn thei biehna na piehbe ding uhi. Tua teng pen paubang lo hi ding hi.#Pei 23:16; 34:22; Thkna 16:9-12
Currently Selected:
GAMLAH VANA 28: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
