GAMLAH VANA 27
27
Zelophehad’ Tanute
1Tua ciengin Joseph’ tapate sung panin Manasseh’ tapa Machir, Machir’ tapa Gilead, Gilead’ tapa Hepher, Hepher’ tapa Zelophehad’ tanute a nai-ah a pei uhi. A tanute’ min pen: Mahlah, Noah, Hoglah, Milcah, le Tirzah ahi hi. 2Amate, Moses le siempu Eleazar mai, makaite mai le mihon zosie mai, kikhopna buh tunkotah a ding vua, 3“Ka pa uh gamlah ah a si hi; Korah tawh kipawlin Topa langpanga a kikhawmte lahah ama a kihal kha sih hi, ahi vangin ama’ mawna zieha si ahi bo hi; ama in tapa a nei sih hi. 4Ama in tapa a nei lo ziehin bang dingin a be sung panin ka pa uh’ min kiphiet talawm ding ahei? Ka pa sanggamte lahah ka luo ding uh ei pie un,” a ci uhi.
5Moses in Topa mai-ah amau’ thu a tut hi. 6Topa in Moses kungah tam bangin a gen hi: 7Zelophehad’ tanute thugen a dih ahi hi. A pa uh’ sanggamte lahah amate zong gamh na pie ding a, a tung vuah a pa uh’ gamh na tungsah ding hi.#Gam 36:2 8Israel-te tungah, ‘Pasal khat tapa nei loin a si leh ama’ gamh a tanu na luosah ding uhi. 9Ama in tanu a nei sih leh ama’ gamh a sanggam pasalte na luosah ding uhi. 10Ama in sanggam pasal a nei sih leh ama’ gamh pen a pa’ sanggam pasalte na luosah ding uhi. 11A pa in sanggam pasal a nei sih leh ama’ gamh pen a be sunga a sanggam kinaipi pen na pie ding vua, ama in tua gamh a tang ding hi,’ ci-in na gen ding uhi,” a ci hi.
Moses’ Zalaih ding Joshua Kise
(Thkna 31:1-8)
12 Topa in Moses kungah, “Abarim muol vumah kato inlen, Israel-te tunga ka pieh leitang en in. 13Na mu zaw ciengin na sanggampa Aaron ma bangin nang zong na mite kung na zuon ding hi. 14Azieh pen Zin senel gamah keima#27:12-14 Heb ah “keima tawh” ci om lo hi. le mihonpite ka kihau lai-un ka thugen nei langpang uhi. Nang in amau’ mitmu-in tua tuite-ah ka siengthona na lah sih hi. (Tam teng pen Zin senel gam, Kadesh gam Meribah tui-a thupiengte ahi hi.)#Thkna 3:23-27; 32:48-52 15Moses in Topa hopi-in ama kungah, 16-17“Mihonte, a cing nei lo tuute a bah lo nadingin mi zosie’ hlagau a uh Topa Pasien in tua mipite lahah a sungtum a pusuoh thei ding, amate a pui ding le a lutpi ding, tua mihonte a uh dingin mi khat se in,” a ci hi.#1Kum 22:17; Ezk 34:5; Mat 9:36; Mrk 6:34 18Tuaci’n Topa in Moses kungah, “A sunga Hlagau nei mipa ahi Nun’ tapa Joshua zawpi inlen ama tungah na khut ngam in.#Pei 24:13 19Siempu Eleazar le mihon zosie mai-ah ama dingsah inlen amau’ muna-ah za pie in. 20Israel mihon zosie in a thu a man thei nadingin thuneina pawlkhat ama na pie ding hi. 21Ahi vangin Topa mai-ah Urim tawh ama dinga thu a dawhpieh ding siempu Eleazar mai-ah ama a ding ding hi; ama’ thu tawh ama le a oppi Israel-te zosie, le mihon vannuoi pusuoh ding a, ama’ thu ma tawh a sungtum ding uhi,” a ci hi.#Pei 28:30; 1Sam 14:41; 28:6 22Tuaci’n Topa’ thupieh bangin Moses a gamta hi. Ama in Joshua kai-in siempu Eleazar le mihon zosie mai-ah dingsah hi; 23ama tungah a khut ngam a, Topa in Moses tungtawna a gen bangin ama tungah thuneina za a pie hi.#Thkna 31:23
Currently Selected:
GAMLAH VANA 27: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
