HEBREW 7
7
Melchizedek Siempu Nam
1Tami Melchizedek kici pen Salem kumpipa, Sangpen Pasien’ siempu hi a, ama in kumpite a zawna panin ang kilekia Abraham na dawnin thupha a pie hi. 2Abraham in zong ama tungah a neisa zosie sung panin sawm-ah-khat a pie hi. A masa penin a min a khietna, “Dihna kumpipa,” hi a, tua banah, ‘Kilemna kumpipa,’ a cina ahi, “Salem kumpipa,” zong ahi hi.#Pien 14:17-20 3Ama pen pa nei lo, nu nei lo, khanggui nei lo hi a, hinkhuo kipatna le tawpna zong nei loin, hizongle Pasien’ Tapa tawh kisunin kumtawn siempu-in a om den hi.
4En un, ama bangza-a lien ahiei! Pupi Abraham nangawn in a galvan matte panin sawm-ah-khat ama na pie hi. 5Siempu za a nga Levi suonlehlahte pen Abraham suonlehlahte ma hi napi, a sanggam a mipite kung panin sawm-ah-khat a kai nadingun thupiehna na nga uhi.#Gam 18:21 6Ahi vangin amate khanggui sungah a kihal lo tam pa in Abraham tung panin sawm-ah-khat na sang a, kamciemnate a nga pa zong thupha na pie lai hi. 7A lienzaw pa in a neuzaw pa thupha a pieh pen niel thei ding hi lo hi. 8Thu khatah a si thei mihingte in sawm-ah-khat sang uhi; a thudang khatah ama hing hi, ci-a teci panna a nga mi pa in tua sawm-ah-khat a sang hi. 9Sawm-ah-khat a sang Levi mama nangawn in Abraham tungtawnin sawm-ah-khat pie hi, kici thei ding hi. 10Azieh pen Melchizedek in Abraham a vaidot lai-in Levi pen a pupi’ taai sungah omlai hi.
Melchizedek Tawh Kibang Siempu Dangkhat
11Levi-te siempu hina tungtawnin kicinna kinga hileh- azieh pen mite in tami siempu hina nei-ah thukham a na nga uh ahi a- bang dingin Aaron gui zui ahi lo, Melchizedek gui zui siempu dang khat a pien ding kisam lai ding ahei? 12Azieh pen siempu hina a kikhel ciengin, a thukham zong a kikhel ding kisam hi. 13Tu-in tam bang thute a kigenna pa pen maitam-a na a sem ngai lo minam dang sung pan ahi hi. 14Bangzieh ahei cile i Topa uh pen Judah minam sung pana ang pieng ahina kitel mama a, Moses in tua minam tawh kisai-in siempute thu bangma a gen sih hi.
15Melchizedek tawh a kibang siempu dang khat ang pien ciengin tami thu ang kicien deudeu a, 16tua siempu ang suoh pa pen pumpi tawh kisai a kisam ngainate tungtawna ang suoh hi loin, a kisie thei lo hinna’ vanglietna tungtawna ang pei ahi bo hi. 17Bangzieh ahei cile, “Nang in Melchizedek gui zui-in kumtawn siempu na hi hi,” ci-in ama thu teci a pang zo hi.#Late 110:4 18Thu khatah thupieh lui thanemin a kizah thei tah lo ziehin kituomkhin zo hi. 19(Azieh pen thukham in bangma a bukimsah thei sih hi); thu dang khatah eite in Pasien kung i nai thei nadingin a hoizaw lametna khat ei kipie ahi hi.
20Tam pen kiciemna khat tawh kikipsah hi; bangzieh ahei cile siempu a suoh dangte in kiciemna lo tawh siempu za nga ahi uhi, 21ahi vangin ama kunga thugen mi khat in,
“Topa kiciem zo a,
a lungsim a khel sih ding hi.
‘Nang, tawntung siempu na hi hi,’ ”
na ci ahi ziehin siempu ang suoh ahi hi.#Late 110:4 22Tua ahi ma bangin Jesu zong a hoizaw thuciemna kipsah pa ang suoh hi.
23Tua teng banah sina in amate nasep zopsuoh ding khahtan ahi ziehin siempu masate pen tampi a pha uhi; 24ahi vangin ama hing zing ahi ziehin a siempu za zong a tukip den hi. 25Tua ahi dung zui-in ama tungtawnin Pasien a nai mite a thumpieh dingin hing zing ahi ziehin ama in a tawntungin a hundam thei hi.
26Bangzieh ahei cile a siengtho, paubanna a nei lo, a buabang lo, mawneite lah panin a kikoicing, vantungte tunga a kitawisang tua bang siempu lien pa khat nei ding pen a kilawm mama ahi hi. 27Ama pen siempu lien dangte tawh a kibang sih a, a masa-in ama mawna ading, tua zaw ciengin a mipite mawna adingin nisielin biehpiehna a pieh ding a kisam sih hi; ama in tami pen khatvei beh a bawlna tawh a kimang den dinga a sep ahi ta hi.#Siem 9:7 28Bangzieh ahei cile thukham in siempu liente dingin a thanem mite se a, hizongle thukham nua-a ang pei kiciemna thu in ahile kumtawnin a bukim dinga kibawlsa Tapa a se hi.
Currently Selected:
HEBREW 7: ZBOTF01
Highlight
Copy
Compare
Share
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
