HEBREW 3
3
Moses a Nasempa, Khris a Tapa
1Tua ahi ziehin vantung lam hlatna a nga a siengtho ka kithuopite aw, eite in i pulah uh sawltahpi le siempu lienpa Jesu thu lungngai un. 2Moses zong Pasien’ inn sung zosie-ah#3:2 Adang tang laibute ah “zosie” ci om lo hi. a muonhuoi ma bangin ama zong nasep a guonpa tungah a muonhuoi hi.#Gam 12:7 3Ahi vangin a inn sangin a innlam pa a kipatawi zawh ma bangin Jesu pen Moses sanga a thupi zaw patawina nga dingin a kilawm hi. 4(Bangzieh ahei cile inn zosie pen a lam mi khat om a, ahi vangin sil zosie a lampa Pasien ahi hi.) 5A nua cienga a kigen ding thute tungah teci pang dingin tu-in Moses pen nasem khat bangin Pasien’ inn sung buppi-ah muonhuoi hi. 6Ahi vangin tapa khat hina tawh Khris pen Pasien’ inn sungah muonhuoi hi. I muonna le i kisahtheipi uh lametna i tuhkip leh ama’ innkuonpi i hi uhi.#3:6 Adang tang laibute ah “a tawpkhah dongin” ci kibelap hi.
Uplona Zieha Thuhilna
7Tua ahi ziehin Lai Siengtho in a gen ma bangin,
“Tu-in ama’ aw na zah uleh
8gamlahah ze-etna hun sunga a ledo bangun,
na lungtang uh khausah sih un.
9Kum sawmli sung ka silbawlte a mu vangun,
tua munah na pu na pate un ei na ze-et uhi.
10Tua ahi ziehin tua khang mite tungah
ka lung a thah a,
keima in, ‘A lungtang uh lampiel zing a,
ka lampite a thei sih uhi,’ ka ci hi.
11Ka lung a thah a,
‘Ka tawlngahna-ah
amate a lut sih ding uhi,’ ci-in ka kiciem hi,” a ci hi.#Late 95:7-8
12Sanggamte aw, note a koima po in a hingzing Pasien kung panin ang pielmangsah uplana lungsim a nei migilo na nei khah lo nadingun kidawm un. 13Ahi vangin “tuni” a kici sungin mawna solna ziehin koima in na lungsim uh na khausah lo nadingun nisimin khatlekhat na kihanthawn un. 14Bangzieh ahei cile eite in i kimuonna masa pen a tawp donga i tuhkip nah leh Khris’ pawlte i suoh zo ta uhi. 15Lai siengtho in,
“Tuni-in ama’ aw na zah uleh,
ledo lai hun bangin na lungtang uh khausah sih un,” na ci hi.#Late 95:7-8
16Za zo napi a ledo lai koite ahi uh ahei? Moses makaina nei-ah Egypt gam a nuasie mi zosie hi lo uh amah? 17Hizongle kum sawmli sung ama koi tunga lungthah ahei? Mawna a bawl zieh vua gamlahah a pumpi a puamatte tungah hi lo amah? 18Ka tawlngahna munah amate a lut sih ding uhi, ci-in ama in a tomlaw, thu mang lote tung simlo koi tungah hi ding ahei?#Gam 14:1-35 19Tuaci’n up lona ziehin amate a lut thei sih uhi, ci thu i thei hi.
Currently Selected:
HEBREW 3: ZBOTF01
Highlight
Copy
Compare
Share
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
