HEBREW 2
2
Thudon Ding Hilkholna
1Tua ahi ziehin eite i tolmang lo nadingin i zahsa thute nahpi tahin i thudon mama uh kul ding hi. 2Bangzieh ahei cile vantung mite tungtawnin thu kigen pen kip a, tua thute mang loin a palsat mi poma in a kituoh mawna dan thuoh uh ahile, 3tua zataha a lien hutdamna thudon loin om leih bangci bangin suotah thei ding i hei? Tua thu pen Topa in amasa-in ei gen zo a, a thugen a za mite in eite tungah a thuman ahina ei lah uhi. 4Pasien in zong limte, a lamdangte, na lamdang tuomtuomte, le a deina banga a hawm Hlagau Siengtho letsongte tungtawnin tua thu teci a panbe hi.
Tuolniemna Tungtawna Lapsangna
5Eite in i gengen ahi ang tung ding leitung pen Pasien in vantung mite’ khut sungah koi lo hi. 6Hizongle mi kimkhat in a teci panna uh mun khatah,
“Na ngaisut tham dingin
mihing bang hi lel a,
na thudon tham dingin mihing
tapa bang hi lel ahei?
7Vantung mite sangin
amate a niemzaw hiau-in
na bawl a,
minthanna le patawina
na khusah a,
8a keng nei vuah sil bangkim koi-in
na uh sah hi,” ci-in teci kipang zo hi.
Tu-in sil bangkim amate uhna nei-ah koi a, Pasien in amate a uhsah lo bangma a om sih hi. Tua hi napi tu tadi-in sil bangkim a uh lam i mu nai sih uhi.#Late 8:4-6 9Ahi vangin vantung mite sanga a niemzaw deu dingin bakhat sung a kibawl pah Jesu in Pasien hepina hang tawh mi zosie adingin sina a ciep thei nadingin ama in sina a thuoh ziehin tu-in minthanna le patawina lukhu kikhusah zo hi, ci i mu uhi.
10Ama ading le ama tungtawnin sil bangkim a piengsah Pasien in ta tampite, minthanna ah a peipi thei nadingin a thuohna tawh hutdamna a bawlcil pa Jesu a bukimsah ding pen a kilawm mawng ahi hi. 11Bangzieh ahei cile a siengthosah pa le a kisiengthosah mite in a unpi-un pa khat beh a nei uhi. Tam thu ziehin Jesu in sanggamte ci-a amate a hlat ding pen maizum lo a, 12ama in,
“Ka sanggamte tungah na min ka phuong ding a,
mihonpi laikimah nangma kang phat ding hi,” a ci hi.#Late 22:22
13Tuale,
“Ama ka muong ding hi,” a cikia hi.
Tuale,
“Pasien ei piehsa tate tawh
tanah ka om hi,” a cikia leuleu hi.#Isa 8:17, 18
14Tua ahi ziehin tate pen cilesa nei mite ahi ziehin, ama in zong sina tungtawnin sina vanglietna a nei dawimangpa a suhsiet thei nadingin ama ma zong tua bang ma-in cilesa nei-in ang pieng phot a, 15si ding a giin ziehun sala a kiman mi zosie a hlakhie hi. 16Bang ding ahei cile ama pen vangtung mite hu dinga ang pei ahi sih a, Abraham’ suonlehlahte hizaw hi, ci ang kicien hi. 17Tua ahi ziehin Pasien nasepna sungah mi lainat siem le a muonhuoi siempu lienpa a suo thei nading le, mipite mawna ziehin thoidamna a bawl thei nadingin sil bangkimah a sanggamte banga ang suo ding ma ahi hi. 18Azieh pen gimna thuohna tawh ama ma na ki ze-et ngai zo ahi ziehin, ama in ze-etna a thuoh mite ei hu thei hi.
Currently Selected:
HEBREW 2: ZBOTF01
Highlight
Copy
Compare
Share
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
