HEBREW 12
12
Ette ding Jesu
1Tua ahi ziehin i kimkot-ah taza taha a tam teci meiilomte in ei tuomcip lang kalsie, vangih zosie le ei gahcip mawnate#12:1 Adang tang laibute ah “ei nawngkaisah bai mawna” ci-in kigiel hi. hemkhie-in i masang vua kikoi tai kidemna-ah thuohzawhna tawh tai ciet vai. 2I upna a piengsah pa le a bukimsah pa, ama mai-a kikoi lungdamna ziehin zumna khawh a sa lo, singlamte tungah gimna thuohin Pasien’ topha zietlamah a to Jesu mittuhna’n nei vai.
3Note lungkie-in na thanem lo nadingun mawnei mite’ huotbawlna a thuoh pa ngaisun un. 4Mawna tawh na kidona vuah note in sisan luonna za cieng dongin na do nai sih uhi. 5Note in tapate bangin hing hopi-in ang hanthotnate na mangngil ta vua,
“Ka ta aw, Topa ang thuhilna zangkhai ngaisut sinlen,
dan ang pieh ciengin zong lungkie sin.
6Bang ding ahei cile Topa in a it mite thuhil a,
ama in a san a tate zosie a sat hi,” a ci hi.#Job 5:17; Pau 3:11-12
7Thu ang kihil nadingin gimnate thuoh un. Pasien in tate banga ang bawl uh ahi hi; azieh pen nu le pate’ thu hil lo tapa khu bangci ta ahi ahei? 8Tate zosie in a na tuo uh thuhilna na thuoh khah sih vua ahile ta tahtah hi loin zawlta na hi uhi. 9Tua tham loin, eite in thu ei hil ding leitung pate i nei vua, amate i zatah uhi. Eite in hlagaute’ Pa thu mangin i hingzaw sam sih ding uh amah? 10Azieh pen leitunga i pate in bano khat sung adingin hoi a sah pen bangun thu ei hil vua, hinanle Pasien in ama’ siengthona i nga thei nading ule eite hoi nadingin thu ei hil hi. 11Ei kithuhil laitahin nuom kisa loin na kisa mama a, hizongle tua tawh a kisinsa mite in a nua lam ciengin lungmuonna tawh kipawl dihna ga a ga uhi.
12Tua ahi ziehin a zaw na khutte uh lamto unlen, a thanem na khupte uh khausah un.#Isa 35:3 13Khelbaite kilawi loin a dam sieng thei nadingin na keng vua dingin lamphei siel un.#Pau 4:26
Pasien’ Hepina Niel Lo ding Hilkholna
14Mi zosie tawh kilem ding le siengtho ding lam na del un, bangzieh ahei cile siengthona lo tawh koima in Topa a mu sih ding hi. 15Pasien’ hepina nga loin koima a op lo nading le, sing zungkha po in buoina piengsah a, tua hangin mi tampi a bua lo nadingin pilvang un.#Thkna 29:18 16Numei-pasal pahtatna a bawlte, an kam khat tawh innluoza a khawng, le a Pasien mi lo Isau bang koima a op lo nadingin pilvang un.#Pien 25:29-34 17A nua lam ciengin Esau in thupha ngakia nuomin hlitui naptui tawh a suisui vangin kisiakia nading hunpha mu nawn lo ahi ziehin ama kiniel ta hi, ci thu na thei uhi.#Pien 27:30-40
18A kitham thei, meikuong, khuomiel, lungzinna le huipi, 19pengkul ging, le tua awging a zate in amate tungah tua bang thu a kigenkia lo nadinga a thum vawtna uh mun khat#12:19 Adang tang laibute ah “muol khat” ci-in na giel hi. a tung na hi sih uhi.#Pei 19:16-22; 20:18-21; Thkna 4:11-12; 5:22-27 20(Azieh pen amate in, “Ganhing khat nangawn in tua muolpi a suhkhah leh suong tawh kiseplia ding hi,” ci-a thu kipie pen a thuoh zo sih uhi.#Pei 19:12-13 21A tahtahin, tua a mu pen khu a cizathuoi seng ziehin Moses in, “Zau-in ka ci tun hi,” na ci hi.)#Thkna 9:19 22Ahi vangin note pen Zion muol, a hingzing Pasien’ khuopi ahi vantung Jerusalem, simzawh lo pawibawl vantung mite kisuhtuona, 23vantunga min kikhumsa tapa a ta pente kikhopna mun,#12:23 Ahi sihle “vantungmite, le pawi bawla kituona le kikhopna ah “ mi zosie thu a khen Pasien kung, le a kipicingsah midihte’ hlagau opna, 24thuciemna tha’ palai ahi Jesu kung le Abel’ sisan sanga thu hoizaw a gen sisan kithena mun na tung zo ta uhi.#Pien 4:10
25Tua thu ang gen pa na niel khah lo nadingun pilvang un; azieh pen leitungah amate in thu hilkhol pa a niel ciengin amate suohta zo lo uh ahile, eite in vantung pana thu ei hil pa niel leih bangza tahin suohta la kan zaw lai ding i hi uh ahei!#Pei 20:22 26Tua hun lai-in ama’ awging in leitung kithingsah a, ahi vangin tu-in ama in, “Leitung beh kithingsah loin, vantung zong khatvei ka kithingsah ding hi,” ci-in ei kamciem zo hi.#Hag 2:6 27Tami, “Khatvei tawh” a ci kamteng in a kipiengsah nate ahi a kilawh thei zosie a kipaimang nading le a kilawh thei lote a op suoh thei nading thu a kawh ahi hi. 28Tua ahi ziehin eite in a kilawh zo lo kumpi gam nga zo i hi ziehin i kipah ding vua, tuaci’n eite in zatahna le zauna tawh Pasien tungah san thei biehna i lui ding uhi. 29Azieh pen eite’ Pasien in a haltum thei meikuong ahi hi.#Thkna 4:24
Currently Selected:
HEBREW 12: ZBOTF01
Highlight
Copy
Compare
Share
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
