HEBREW 13
13
Pasien a Lungdamsah Nasep
1Khatlekhat na ki-itna uh kipsuoh taheh. 2Khuol mite zin do ding thusim loin om sih un, azieh pen tua bang zindona-ah pawlkhatte in thei khah loin vantung mite zin do ahi gige uhi.#Pien 18:1-8; 19:1-3 3Amate tawh thongkieton bangin kingaisun unlen, thong sunga om mite phawh un; note mama zong bawlsietna a thuoh na hi ziehun#13:3 “pumpi sunga om lai na hi ziehun “ bawlsiet na a thuoh mite na phawh un. 4Mi zosie in kiten kipina thupisah hinlen, nupa lupna zong buasah sih uheh; azieh pen numei-pasal mawna a bawlte le angkawmte tungah Pasien in thu a khen ding hi. 5Sum deigawna panin na hinkhuo uh kemcing unlen na nei bangbang utawh lungkim un; azieh pen ama in, “Ke’n nang kang nuasie ngai sih ding a, zong kang taisan ngai sih ding hi,” ei ci hi.#Thkna 31:6, 8; Josh 1:5 6Tuaci’n eite in kimuonna tawh,
“Topa pen ei panpi pa ahi hi;
ka zau sih ding hi.
Mite in bang ei law zo ding ahei?”
i ci ngam uhi.#Late 118:6
7Note tungah Pasien’ thu ang gen na lamkaite phawh zing un; amau’ luhinzie pana ang pieng thute ngaisunin a upna uh ette un. 8Jesu Khris pen zani, tuni le a tawntungin kibang den hi. 9Thuhilna lamdang tuomtuomte in na kipuimangsah sih un; bangzieh ahei cile a zui mite dinga phatuomna a om lo anneh tuidawn#13:9 Gk “ante zieh hi loin “ tawh kisai ngainate hang tawh hi loin, hepina hanga lungsim khau pen a hoi ahi hi. 10Puonbuh#13:10 Ahi sihle “biehbuh “ sunga nasemte in a neh thei lo maitam khat eite in i nei uhi. 11Azieh pen mawhna zieha biehpiehna dingin siempu lien pa in siengtho muna a peipi sisan kilahna tua ganhingte’ pumpi pen giephuol pulamah kihaltum hi.#Siem 16:27 12Tua ahi ziehin Jesu in ama’ sisan tawh mite a sienthosah nadingin khuopi kot pulamah sina a thuoh hi. 13Tua ahi ciengin eite zong giephuol pulamah pei-in, ama thuoh maizumna thuoh vai. 14Azieh pen tami munah a kip khuopi i nei sih vua, eite in ang tung ding khuopi i suizaw uhi. 15Tua ahi ciengin ama tungtawnin eite in Pasien tungah phatna biehpiehna tatsat loin pie vai. Tua khu ama’ min i pulahna i kamte’ ga ahi hi. 16Sil hoi bawl ding le na neisate uh mi hop ding kitheimaw bawl sih un, bangzieh ahei cile tam bang biehpiehnate in Pasien a lungdamsah mama hi.
17Na lamkaite uh’ thu na mang unlen, amate tungah na ki-ap un, azieh pen amate ahile na hlagau ang vilpieh ahi vua, a nasepnate uh Pasien kunga a pulah ding uh ahi hi. Tami pen lunggimna tawh semsah sih unlen, lungdamna tawh semsah zaw un. Bangzieh ahei cile tua bang hi loin, da pipi-a a sep ciengun note adingin phattuomna a om sih ding hi. 18Ko adingin thu ei nget pieh un; bangzieh ahei cile kote in sil zosie-ah patawi huoi taha sep ding ka dei vua, tuaci’n ko le ko kitheina lungsim siengtho ka nei lam uzong ka theicien uhi. 19Na kung vuah a sawt lo-a kang pei baikia thei nadingin tua banga thu nei ngetpieh dingun kang thum hi.
Thupha Piehna
20Kumtawn thuciemna sisan ziehin tuucing lien pa, sina panin i Topa Jesu a thokiasah pa, kilemna Pasien in, 21ama’ deina banga na sep thei nadingun sil hoi bangkim ah ang bucingsah pa, Jesu Khris tungtawnin eite#13:21 Adang tang laibute ah “note” ci-in kigiel hi. lahah ama’ lungkimna banga na a sem ama tungah a tawntungin minthanna om den taheh. Amen.
A Tawpna Hanthotna le Hopinate
22Sanggamte aw, na kung vuah tomkimin lai hing hlah zo ka hi ziein, kang hanthotnate nei thuoh kenkon dingun kang thum hi. 23I sanggam pa Timothy kihla zo ta hi, ci thu na thei un; a hunlapin ama ang tun khah leh note tawh i kimu ciengin ama tawh zong kang haw ding hi. 24Na makaite zosie ule misiengthote zosie ei na noset pieh in. Italy gam pana ang hawte in zong ang noset uhi. 25Note zosie tawh hepina hing om taheh.#13:25 Adang tang laibute ah “Amen” kibelap hi.
Currently Selected:
HEBREW 13: ZBOTF01
Highlight
Copy
Compare
Share
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
