DANIEL 6
6
Daniel Kithasawm
1Darius in kumpi gam buppi vai sai dingin gamkhen uhpi za le sawmni koi dingin pha a sa a, 2tuale amate tungah vaisaipi mi thum koi-in, tuate lahah Daniel zong khatin kihal hi; kumpipa in sup le bai a tuo lo nadingin tua gamkhen uhpite in tam teng tungah thu a puoh uhi. 3Daniel in koima’ bat zawh lo pilna a nei ziehin adang vaisaipite le gamkhen uhpite lahah kituom khai a, kumpipa in gam buppi vaihawm dingin koi sawm hi. 4Tuaci’n vaisaipite le gamkhen uhte in kumpi gam tawh kisai-in Daniel tungah mawmat nading hamlap a tangsui uhi. Ahi vangin ama thumanin a thoptat sih a, ama tungah sietna a kimu zo lo ziehin amate in mawmat nading hamlap ahi a, sietna ahi zongin a muzo sih uhi. 5Tua mite in, “A Pasien’ thukham tawh kisai-in i mu lo buong uleh tami Daniel tungah i mawmat nading uh hamlap dang i mu zo sih ding uhi,” a kici uhi.
6Tuaci’n vaisaipite le gamkhen uhpite kidap kupin kumpipa kungah a pei vua, “Kumpipa Darius aw, na khan sau taheh! 7Kumpipa aw, ni sawmthum sung nangma kung simlo mi khatpo kung ahi sihle pasien khatpo kunga thungen poma humpi kuo sungah kikhie ding hi, ci-in thupiehna lai le khamna lai khat bawl lacin hoi ding hi, ci-in kumpi gam sunga vaisaipite, gamkaih uhpi hute, gamkaih uhpite, thu kuppite, le mangpite zosie ka kithukim uhi. 8Kumpipa aw, tu-in Medes-te le Persia-te upadi a kikhel lo bangin a kikhel lo nadingin tua lai tungah na suoi kai in,” a ci uhi. 9Tua ahi ziehin Kumpi Darius in thupiehna lai le khamna lai tungah suoi a kai hi.
Humpi Kuo Sungah Daniel
10Daniel in tua thupiehna lai suoi kikai zo ci a thei vangin Jerusalem lam nga-in tawlet honsa-a om a inndan tungnungah pei-in nidanga a bawl ngai bangin ni khatin thumvei khupdinin a Pasien tungah thu ngenin ama a phat hi. 11A sawmdapte a pei ule Pasien mai-ah Daniel in hepina a nget laitah a tuoh uhi. 12Tua ciengin amate in kumpipa kung a neh vua, tuale thupiehna lai tawh kisai-in, “Kumpipa aw! Ni sawmthum sungin nang kung longal pasien ahi sihle mihing tunga thu ngen poma humpi kuo sungah kikhie ding hi, ci-in thupiehna lai tungah suoi kai zo hi lo na mah?” a ci uhi. Kumpipa in, “ Medes-te le Persia-te upadi a kiphel thei lo ma bangin tam thu pen thukip ahi hi,” ci-in a dawng hi. 13Tua ciengin amate in kumpipa a dawngkia vua, “Kumpipa aw, Judah gam panin na salte lahah khat ahi Daniel in nang le na suoikaina khamna lai a thuse sih a, tuale mahin ni khatin thumvei thu a ngen zawsop hi,” a ci uhi.
14Kumpipa in tua mawsahna thu a zah ciengin lung gim mama hi. Ama in Daniel hunkhie nuom a, ni tum dongin ama a hutkhiet nading hanciem thei tawpin a sem hi. 15Tua ciengin kumpipa kungah a sawmdapte pei-in ama kungah, “Kumpipa aw, thei in. Medes le Persia-te’ upadi banga kumpipa in a bawlsa khamna lai ahi sihle thupiehna lai pen kikhel thei lo hi,” a ci uhi.
16Tua ciengin kumpipa in thu pie-in Daniel a zawpi vua, humpi kuo sungah a khiesuh uhi. Kumpipa in Daniel kungah, “Thuman taha a na naseppieh na Pasien in hing hunkhie taheh,” a ci hi. 17Suongtum khat kila-in humpi kuo vangah kikoi a, tuale Daniel tawh kisai-in thu a kikhel khah nawn lo nadingin kumpipa in ama’ seal tupna khutsip le a uliente’ seal tupna khutsip tawh a ciemte hi. 18Tua ciengin a kumpi inn sungah kumpipa pei-in ama in zan tawntungin an a ngawl hi; ama kungah bangma an kipuoh lo a, zong kimu thei lo hi.
Humpi Lahah Daniel Kihunkhie
19Khuo a vah lien tahin kumpipa tho-in humpi kuo lamah mallangin a pei hi. 20Daniel opna humpi kuo gei a tun ciengin Daniel kungah patau tahin kiko a, “Daniel aw, a hing zing Pasien’ nasempa, thuman taha a na nasep pieh na Pasien in humpi panin ang hunkhie zo ei mah?” a ci hi. 21Tua ciengin Daniel in kumpipa kungah, “Kumpipa aw, na khan sau taheh! 22Ama mai-ah kei nuol baang loin ei kimu ziehin keima ei liemsah lo nadingun ka Pasien in a vantung mite sawlin humpite’ kam a humpieh hi; tuale kumpipa aw, keima in na mai-ah zong bangma khielna ka bawl sih hi,” a ci hi. 23Tua bepin nahpitahin kumpipa lungdam a, humpi kuo sung panin Daniel a lahdawh nadingun thu a pie hi. Tuaci’n humpi kuo sung panin Daniel kiladawh a, ama in a Pasien a muon ziehin a ci tungah liemma khat beh kimu lo hi. 24Daniel a leheh teng- amate, a tate ule a zite utawh- kizawpi-in humpi kuo sunga khieh dingin kumpipa in thu a pie hi. Humpi kuo tawdop a tun masangun humpite in amate na zothaw-in a gu a tangin a tepguoi uhi.
25Tua ciengin Kumpi Darius in leitung muncin tenga a om mi zosie, nam zosie le ham zosiete tungah tam bangin lai a hlah hi: “Note in a kicing nopsahna thupha nga ta un! 26Keima in thupieh khat ka bawl a, ka uhna kumpi gam sunga om mi zosie in Daniel’ Pasien mai-ah zatahin citun ding uhi:
Azieh pen ama a hing zing Pasien hi a,
kumtawnin ama a om zing hi.
A kumpi gam kisusie ngai lo ding a,
a vaihawmna tawp ngai lo ding hi.
27Ama in suotasahin hunkhie a,
ama in vantung le leitungah lim le nalamdangte a bawl hi;
azieh pen humpi thahatna panin
Daniel a hunkhie zo hi,” a ci hi.
28Tuaci’n tami Daniel pen Darius uh sung le Persia mi Cyrus uh sungin a daupei mama hi.
Currently Selected:
DANIEL 6: ZBOTF01
Highlight
Copy
Compare
Share
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
