DANIEL 5
5
Belshazzar’ Pawi
1Kumpi Belshazzar in a ulien tulkhat adingin pawi lienpi khat bawl a, mi tulkhat mai-ah zu a dawn hi.
2Belshazzar in a zu lungnop kawmin kumpipa le a uliente, a zite le a meite zu dawn nadingin amate in Jerusalem biehinnpi pana a pa Nebuchadnezzar in a na lah kham hai le ngun haite a lah nadingun thu a pie hi. 3Tuaci’n amate in Jerusalem Pasien’ biehinnpi pana a kila kham hai le ngun#5:3 Theodotion Vg: Aram ah “le ngun” om lo hi. haite peipi-in kumpipa le a uliente, a zite le a meite in tuate tawh zu a dawn uhi. 4Amate in zu dawnin ngun le kham, sumngo, sia, sing le suong pasien-te’ min a phat uhi.
Kawm Tunga Kigiel Lai
5Thakhatin mihing’ khut khat kilang a, meivah tunna gei, za a kizut kumpi inn kawm tungah lai giel ang kipan pai hi. Tua khut in lai a giel laitahin kumpipa in a en khinkhian hi. 6Tua ciengin kumpipa mai daang gawpin a ngaisutna in ama zausisah a, a khut a kengte zawmangin a khup tegel a tun dildel hi. 7Kumpipa in aisan theite, Chaldea-te, le bumtawite va hlan ta un, ci-in kiko hi; tuale Kumpipa in Babylon mipilte kungah, “Tami lai kigiel sim thei-in a khietna ei gen thei tapo puon sandup kisilsah ding a, a ngawngah kham khi ki-awsahin kumpi gam sungah a zalien a thumna-in kikoi ding hi,” a ci hi. 8Tua ciengin kumpipa’ mipil zosie a lut vua, ahi vangin amate in tua lai kigiel sim thei loin, kumpipa kungah a khietna zong a gen thei sih uhi. 9Tua bepin Kumpi Belshazzar nahpi-in zausi-in a mai kangdang a, a uliente a lung uh a buoi hi.
10Kumpinu in kumpipa le a uliente thu kikup a zah ciengin pawi khaamna inn sungah a lut hi. Kumpinu in, “Kumpipa aw, na khan sawt taheh! Na ngaisutna ziehin kizausisah sinlen, na mai dangsah sin. 11Na kumpi gam sungah a siengtho pasien-te’#5:11 Ahi sihle “ a siengtho, pasien hlagau” hlagau a nei mi khat a om hi. Na pa hun lai-in tua mipa in pasien-te’ pilna tawh a kibang thuthuh theina, thu theitelna le pilna a nei hi. Na pa Kumpi Nebuchadnezzar in mitphiel siemte, aisan theite, Chaldea-te, le mibum theite’#5:11 Aram ah “na pa kumpipa” kibelap uhpi-in ama na koi ngai hi. 12Azieh pen kumpipa in a min Belshazzar a phuopieh Daniel sungah mang khieh theina, thu hahsate dawn theina, le thubuoite vensah theina ahi koima in a bat zawh lo pilna, theina, thu theitelnate kimu hi. Tu-in Daniel hlansah in, tua hile ama in a khietna ang gen thei ding hi,” a ci hi.
Kawm Tunga Lai Kigiel a Khietna Kigen
13Tua ciengin kumpipa mai-ah Daniel kipeipi hi. Kumpipa in Daniel kungah, “Nang pen Daniel a kici pa, Judah gam sung pana ka pa kumpipa in ang mat Judah mite lahah sila khat hi lo na mah? 14Nang sungah pasien-te’#5:14 Ahi sihle “pasien’ hlagau khat” hlagau a op lam ka na za zo a, thuthuh theina, thu theitelna, le koima in a bat zawh lo pilna na sungah a op lam kimu hi. 15Tu-in tam lai kigiel a sim ding le a khietna ei gen dingin mipilte, aisan theite ka mai-ah ang kipeipi zo ta a, ahi vangin amate in tua thu a khietna a gen thei sih uhi. 16Ahi vangin nangma in a khietna na gen thei a, thubuoite zong na vengsah thei hi, ci-in ka na za zo hi. Tu-in tua lai kigiel na sim thei a, a khietna nei gen thei leh, puon sandup ang kisilsahin na ngawngah kham khi ang ki-awsah ding a, kumpi gam sungah a za lien a thumna-in ang kikoi ding hi,” a ci hi.
17Tua ciengin Daniel in kumpipa mai-ah dawng a, “Na letsongte nangma adingin koi in. Ahi sihle na nuommante midang khat pie in! Hizongle kumpipa adingin tua lai kigiel kang simpieh ding a, a khietna kang theisah ding hi. 18Kumpipa aw, Sangpen Pa Pasien in kumpi-in na pa Nebuchadnezzar koi a, zalietna, vang le thupina a pie hi. 19Tuale ama tunga a pieh zalietna ziehin ama mai-ah mi zosie, minam zosie, le ham zosie citun uhi. Ama in a tha nuomte thatin a hinkhawi nuomte hinkhawi a, a patawi nuomte patawi-in, a daisah nuomte daisah hi. 20Ahi vangin a lungsim kisangsahin kisathei tahin a gamtat nadingin a lung a khau ciengin a kumpi topha panin kiladawh a, ama kung panin a vang kihawhmang hi. 21Mihingte lah panin kinotmang a, a lungsim zong ganhing lungsim nei dingin kibawl hi. Gam sakolte tawh tengtonin bawngtang bangin lopa kinesah a, Sangpen Pa Pasien in mihingte’ kumpi gamah thunei a, kumpi gam a pieh nuom pa tungah pie hi, ci thu a thei masangsie van daitui in a pumpi tehlopsah den hi. 22Tuale a tapa nang Belshazzar in tam thu zosie na thei sieng vangin na lungsim na niemkhieh tuom sih hi. 23Nang in Vantung’ Topa na do a, nang le nang na kitawisang hi! Ama’ biehinn sunga haite nangma kungah ang kitawi zo a, nang le na uliente, na zite le na meite un tuate tawh zu dawn zo ta uhi. Khuo a mu lo, khuo a za lo, a theithei lo, ngun le kham, sumngo, sia, sing le suong pasien-te’ min na phat uhi; ahi vangin a vanglietna sungah na hinna hu uh omin na gamtatna zosie uh ang saipieh Pasien na zatah sih uhi.
24“Tuaci’n a opna panin tua khut ang kisawlin tam lai ang kigielsah ahi hi. 25A kigiel lai tam bang ahi hi: MENE, MENE, TEKEL, le PARSIN. 26Tua thu a khietna tam bang ahi hi: MENE, Pasien in na kumpi gam vaihawmna hunte#5:26 Aram ah “hunte” ci om lo hi. sim zo a, tawpsah zo hi. 27TEKEL, nang ang kitawikhai zo a, na leh zo sih hi. 28PERES,#5:28 “Parsin” kici khat guoha genna ahi hi. na kumpi gam kikhen khamin Media le Persia-te kipie zo hi,” a ci hi.
29Tua ciengin Daniel puon dupsan silsah dingin Belshazzar in thu pie a, a ngawngah kham khi awsahin a kumpi gam sungah a za lien a thumna dingin tangtawhna kinei hi.#Pien 41:42
30Khum zan mama-in Chaldea-te’ kumpipa Belshazzar kithat pai hi. 31#5:31 Aram ah 6:1 Kum sawmguh le kum ni a phah kumin Mede mi Darius in kumpi gam nga hi.
Currently Selected:
DANIEL 5: ZBOTF01
Highlight
Copy
Compare
Share
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
