2 TIMOTHY 2
2
Khris Jesu’ Galkap Hoi
1Tua ahi ciengin nang ka tapa aw, Khris Jesu sunga om hepina sungah thahat in; 2teci tampite tungtawnin kei tung pana na zahsa thute, midangte zong a hilsawn thei ding mi muonhuoite tungah na ap in. 3Khris Jesu’ galkap hoi khat bangin hamsatna ei thuohpi in. 4Galkap a sem lai mi koima in nisim vaite ah a kisawpawi sih hi; tua galkap pa’ lungtup in nasep a guon a bupa lungkimsah ding ahi hi. 5Kidemna sungah a kihal mi koima in thuhlun tawh kituohin a dem sih leh lukhu a nga sih hi. 6Lohlo nasem pa in zong lo-a pieng gate a nga masah dinga a kilawm ahi hi. 7Ka thugen ngaisun in, bang ding ahei cile Topa in sil bangkimah theina ang pie ding hi.
8David’ suonlehlah ahi sina panin a thokia Jesu Khris phawh in, tua khu keima hil lungdamna thu ahi a, 9tua thu ziehin gimna ka thuoh a, tuolthat khat bangin kolbulna cieng nangawn ka thuoh hi. Hizongle Pasien’ thu kol kibul thei lo hi. 10Tua ahi ziehin a teelsa mite in zong Khris Jesu sunga hutdamna le tawntung minthanna a ngaton thei nadingun amau’ ziehin sil bangkim ka thuoh hi. 11A muontah mama thu in:
Ama tawh i siton uleh
eite zong ama tawh i hington ding uhi;
12eite in i thuohzawh uleh
ama tawh zong i mangton ding uhi;
eite in ama i niel uleh
ama in zong eite ei niel ding hi;#Mat 10:33; Luk 12:9
13eite i muonhuoi sih uleh zong,
ama a muonhuoi zing hi,
azieh pen ama le ama ki niel thei lo hi.
A Kipahta Nasempa
14Tam thu theisah inlen, thu ginalo, thu ngai mite a siesah thei bep ding kam kinielnate a pel nadingun Pasien#2:14 Adang tang laibute ah “Topa” ci-in kigiel hi. mai-ah amate thuhil in. 15Maizum om lo thuman thutah mantaha a gen, ama in a pahtat nasempa khat bangin Pasien tungah na ki-ap thei nadingin na thei tawpin bawl in. 16A thanghuoi a mawhna kamte na pel in, azieh pen tua bang thute in Pasien up lona lamah mite pui semsem ding a, 17a thugente uh zong a dam thei lo a bantawn hima bangin kizel ding hi. Tua bang mite lahah Hymenaeus le Philetus zong a kihal vua, 18ama gel in thawkiana tung zo hi, ci-in thuman thutah panin pielin mi pawlkhatte’ upna a subuoi uhi. 19Ahi vangin Pasien’ khuombul kiptahin ding a, tam bangin kiciemte hi: “Topa in ama-ate’ thei hi,” ci thu le, “Topa mina a kilo mi zosie in gitlona panin kihemkhie heh,” ci thu ahi hi.#Gam 6:5
20Inn golpi khat sungah ngun le kham beh a om sih a, sing le lei tawh a kibawl vanzahte zong a om hi, pawlkhatte a thupi-a zah ding, pawlkhatte pen a kithangzah ding ahi hi. 21Ka gensa silte#2:21 Gk “tam thute” panin amau le amau a kisiensuo mi zosie pen nasep hoi namcin sem dingin a baisa-a om, inn neipa dinga kimanna a nei, a thupi-a zah dinga a ki-apsa vanzahte a suoh ding uhi. 22Khangno lunggulnate pel inlen, lungsim siengtho panin Topa a hlan mite tawh dihna, upna, itna le kilemna del in. 23Hizongle a mothuoi le theitel lopi-a kam kiselnate tawh na kicisaw kha sin; tuate in kihaunate piengsah hi, ci thu na theisa ahi hi. 24Topa’ nasempa#2:24 Gk “Sila “ pen mi tawh kihau poma lo ding a, tuale mahin mikim tungah a nunnem, thuhil lam a kiva, a lungduoi, 25ama a langpang mite lungnemna tawh a hil mi hi ding hi. Pasien in amate kisiasahin thuman thutah theina pie theikha ding a, 26tuale dawimangpa’ thang panin ama’ deina lam sem dinga a matsa mite a suohta thei ding uhi.
Currently Selected:
2 TIMOTHY 2: ZBOTF01
Highlight
Copy
Compare
Share
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
