2 THESSALONICA 3
3
Thungetpieh ding Ngetna
1Sanggamte aw, a nukhia penin note lahah a piengsa bang tehtehin mun zosie-ah Topa’ thu a mallangin kizelin a kithan thei nading le, 2mi hoilote le mi gilote kung panin ka suotah thei nadingun thu ei na ngetpieh un; bangzieh ahei cile mi zosie in upna a nei sih uhi. 3Ahi vangin Topa a muonhuoi a, note hing thahat sahin gilopa#3:3 Gk “sietna panin” kung panin ang kem ding hi. 4Note in kang thupiehte uh na zui vua, Topa sungah a zui suoh lai dingin zong kang muong uhi. 5Pasien’ itna le Khris’ thuohzawhna lamah na lungsim uh Topa in lam hing lah taheh.
Thasiet lo ding Hilkholna
6Tu-in kang itte#3:6 Gk “sanggamte” aw, kote tung panin amate#3:6 Adang tang laibute ah “note” ci-in kigiel hi. in a sansa uh ngainate tawh kituoh loin nasep a thada thu umte#3:6 Gk “sanggamte zosie panin a thasie mite” na pelh nadingun i Topa Jesu Khris’ minin thu kang pie hi. 7Bangzieh ahei cile kote nei ette ding vua kilawm ahi lam no mama in na theisa uh ahi hi; note tawh ka opton sungun ka thasie sih vua, 8a man pie loin koima’ an ka mawh neh sih uhi; mi khatpo’ vangih ka suo lo nadingun gimpipi-in sun le zanin na ka semzaw uhi. 9Tua bang neh theina ding thu a nei lo ka hi tuon sih vua, note’ ette ding limpha kang lah nop man uh ahi zaw hi. 10Bangzieh ahei cile note tawh ka opton lai nangawnun zong nasem nuom lo mi poma in an ne sih heh, ci-in thu kang pie zo ta uhi. 11Bangzieh ahei cile note lahah mi pawl khat thasie-in bangma sem loin mi nasepnate-ah kikumthaw-in a op lam uh ka za uhi. 12Tu-in tua bang mite in a anneh ding uh thalaw-in, a na uh a sep khinkhian nadingun kote in Topa Jesu Khris minin thu pie-in ka hanthawn uhi. 13Sanggamte aw, na hoi sep ding cimtah sih un.
14Tami lai sunga ka thugente uh a mang nuom lote ciemte unlen, a maizum thei nadingun na kigop sih un. 15Ahi vangin amate gal bangin ngaisun sih unlen, thu umte#3:15 Gk “sanggam khat” bangin thu hil un.
A Tawpna Hopinate le Thupha Piehna
16Tu-in kilemna Topa mama in na vai zosie vuah a tawntungin lungnopna hing pie taheh. Topa in note zosie hing ompi taheh.
17Keima Paul in ka khut mama tawh tami nosetna lai kang giel ahi hi. Ka laihah zosie tam banga ka ciemte ahi a, tami khu ka lai gieldan ahi hi. 18Note tawh i Topa Jesu Khris’ hepina hing om taheh.#3:18 Adang tang laibute ah “Amen” kibelap hi.
Currently Selected:
2 THESSALONICA 3: ZBOTF01
Highlight
Copy
Compare
Share
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
