1 TIMOTHY 1
1
1I hundampa Pasien le i lamet pa uh Khris Jesu thupiehna tawh Jesu Khris’ sawltahpi keima Paul in,
2upna sungah ka ta tahtah ahi Timothy tungah:#Sawl 16:1
Pa Pasien le i Topa Jesu Khris kung panin hepina, khuotuona le lungnopna om taheh.
Thuhilna Man Lote
3Macedonia gam lam manaw-in ka pei lai-a kang gensa ma bangin Ephesus khuo-ah tam inlen, mi pawlkhat in thuhilna dang khatpo a hil lo nading ule, 4upna tawh a kithei Pasien’ vaihawmna#1:4 Ahi sihle “gelna” ahi lo, kinielna a piengsah thei phuotawm tangmite le mong nei lo khanggui ciemtena po-ah amate a kipumpieh lo nadingun thu na hil thei nadingin kang hanthawn hi. 5Ahi vangin tam bang thuhilna’ a tupna pen lungsim siengtho, ei le ei kitheina hoi, le upna tahtah pana a pei itna ahi hi. 6Tua itna panin mi pawlkhatte pielmangin a khietna nei lo holimna lamah a kihei vua, 7a thugente ule kiptaha a thugente uh telsiem lopi-in Pasien’ thukham hil sie po a suoh nuom na lai uhi.
8Tu-in mi khat in thukham pen ahi banga a zah nah leh hoi hi, ci i thei hi. 9Tami a ci nopna in thukham pen midihte dinga kibawl ahi sih a, thukham palsatte le thu mang lote, Pasien mi ahi lote le mawneite, a siengtho lote le mi thanghuoite, a nu a pa thatte, tuolthatte, 10nu le pa mawna a bawlte, pasal le pasal mawna a bawlte, sila zua-a sum bawlte, zuouthu gente, zuouthu tawh a kiciemte a kipanin thuhilna a man tawh a kilebul mite dinga kibawl ahi hi, ci theisiemna ahi a, 11tua pen thupha tawh a kidim a minthang Pasien in keima ei kepsah lungdamna thu tawh a kituoh hi.
Hepina Zieha Lungdamna
12Ama’ nasem dingin keima ei se a, mi muonhuoi bangin ei ngaisun ahi ziehin i Topa Jesu Khris tungah ka lung a dam hi. 13Masang lai-in migensie pa, mi bawlsie pa, le mi ngongtat pa ka hi vangin, uplana zieh le theilana zieha a gamta ka hi ziehin khuotuona ka nga a,#Sawl 8:3; 9:4-5 14Khris Jesu sunga a om upna le itna tawh kei adingin i Topa’ hepina a dimlet hi. 15Khris Jesu in mawneite hundam dingin leitungah ang pei hi, ci-a kigen pen a man hi a, a unpi-in san dingin kilawm hi, tua mawneite lahah kei a siehuoi pen ka hi hi. 16Ahi vangin tua thu hang ma-in ama umin kumtawm hinna a nga ding mite’ ette thei dingin Jesu Khris in a gilo pen keima sungah ahi theina za tawh lungduoina ei lah thei nadingin khuotuona ka nga zo ta hi. 17A si thei lo, a kimu thei lo, le ama beh Pasien ahi, kumtawn Kumpipa tungah patawina le minthanna om zing taheh. Amen.
18Ka ta Timothy aw, keima in masang lai-a nang tawh kisai genkholna thute tawh kizui-in tami thuhilna kang pie hi. Tua thute zui-in gal dona pha na do thei nadingin, 19upna le kitheina lungsim hoi nei in. A sie le a pha theina lungsim a nuol ziehun mi pawlkhatte in tembaw kisie bangin a upna uh a kisiesah vua, 20amate lahah Pasien gensiet lo nading a sin dingin Satan tunga ka apsa Hymenaeus le Alexander-te kihal uhi.
Currently Selected:
1 TIMOTHY 1: ZBOTF01
Highlight
Copy
Compare
Share
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
